၁ ။ တတိယ ဓညဝတီခေတ်မှာ သူရိယစက္ကမင်းရေ အသျှင်မဟာတိဿ နန့်  အသျှင်ဗါကုလ ရို့ပါးက ရဟိရေ ဓါတ်တော် မွီတော် တိဂို မြတ်စွာဘုရား၏ ဗျာဒိတ်တော်အတိုင်း ဓညဝတီပြည်အတွင်း နှစ်ဆယ့်လေးရပ် တောင်တော်မြတ် တို့ ၌ နွားလားဥဿဘ တမော့ (၆ တောင်ခန့်) ဟိရေ ဇာတီတော် တိမှာ ထည့်သွင်းဌာပနာ၍ ကိုးကွယ်ခကတ်ပါရယ် ။ ယင်းဇာတီတော်တိထဲက ရသေ့တောင်မြို့နယ်အတွင်းမှာ ဟိရေ ဇာတီတော် သုံးဆူမှာ မိုလ်းစဲတောင်တန်း စာရုပဗ္ဗတ(တောင်)၌ ဦးကင်းတော်ဓါတ်ဇာတီ ၊ မေယုတောင်တန်း ကာသိရပဗ္ဗတ(တောင်)၌ လည်ရိုးတော်ဓါတ် ဇာတီ ၊ ရသေ့တောင် ရာဇပဗ္ဗတ(တောင်)၌ ဦးထိပ်တော်ဓါတ်ဇာတီ ရို့ ဖြိက်ဂတ်ပါရေ။

၂ ။ ဒုတိယမြောက်ဦးခေတ်မှာ မင်းဗါဘုရင်ကြီးရေ ဦးရီးတော် ရသေ့ကြီး ဦးသုခ ပါးက ရဟိရေ လက်ယာ လက်ရိုးတော်တော်ဓါတ်ဂို တဖန်ပြန်ဗြီးကေ ဤဇာတီ၌ ဌာပနာ ခပါရေ။ မင်းဗါဘုရင်ကြီး၏ သားတော်ထွီး မင်းဖလောင်းရေ ပုဏ္ဏားကျွန်းမြို့အနီးဟိ သီလပဗ္ဗတ(တောင်)ထက်၌ ဦးရာဇ်တော် ဇာတီဂို တည်ဆောက်ဇိုင် ဤရသေ့တောင် ဇာတီဂို ပုံစံတူ (အရွယ်အစားငယ်) အဖြိုက် ပြုပြင်မွမ်းမံခပါရေ။ တတိယမြောက်ဦးခေတ်မှာ နရအဘယရာဇာ မင်းရေ ဤဇာတီ တောင်ခုလပ်တွင် ဂူလေးပေါက် ထွင်းဖေါက်ဗြီးကေ ဗုဒ္ဓရုပ်ပွါးတော်တိဂို တည်ထား ပူဇော်ခပါရေ။

၃ ။ မင်းဗါဘုရင် အယင် မင်းခေါင်ရာဇာ လက်ထက်မှာ ရသေ့ကြီး ဦးသုခရေ နှမတော် နှစ်ပါးဖြိုက်တေ (မိညို ၊ မိဖြူ) ရို့နန့် အတူ ဤဒေသ ဒိုးဖြူရွာသို့  လာရောက် နီထိုင်ခဗြီးကေ နောက်ခါ ရသေ့ဝတ်လားခပါရယ်။ ရသေ့ကြီးနီခရေ ဂူဂို ကန်တော်ကြီးအနီး မူလရသေ့တောင်၌ ဒေနိတိုင် တွိ့မြင်နိုင်ပါရေ။ မင်းဗါဘုရင်ကြီး ဘင်္ဂလာဂို စစ်အောင်ဗြီးပြန်လာဇိုင် ရသေ့ကြီး၏ ဆန္ဒအတိုင်း လက်ယာလက်ရိုးတော်ဓါတ်ဂို ရသေ့တောင်ဇာတီတွင်လည်းကောင်း ၊ လက်ဝဲ လက်ရိုးတော်ဓါတ်ဂို ကြွီတဲကျွန်းဇာတီတွင် လည်းကောင်း ထည့်သွင်းဌာပနာခပါရေ။ ဘုရားကြီး တစ်ဆူဂိုလည်း တည်ထားကိုးကွယ်ခပါရေ။ ရသေ့ကြီး၏ နှမကြီး မိညိုမှာ ကြွီတဲရွာ၌ အသက်ထက်ဆုံး နီထိုင်လားခပါရေ။ နှမငယ် မိဖြူမှာ မင်းဗါဘုရင်ကြီးနန့် အတူ မြောက်ဦးနန်းတော်သို့ လိုက်ပါလားခပါရေ။

၎ ။ တတိယ အင်္ဂလိပ်-မြန်မာ စစ်ပွဲ ဗြီးဆုံးရေခါ ရခိုင်ပြည်ရေ ဗြိတိသျှ အင်ပါယာ လက်အောက်သို့ ကျရောက်လားခပါရေ။ (အေဒီ ၁၈၆၃) မှာ ရသေ့တောင်ဇာတီ၏ မြောက်ဖက်ဟိ ဒိုးဖြူရွာ နန့်  အရှိမြောက်ဖက်ဟိ ( ကိန်းသာမြို့ဟုတွင်ခရေ ) ရသေ့တောင်ရွာ ရို့ဂို ဒေဂု ရသေ့တောင်မြို့ နီရာသို့ပြောင်းရွိ၍ မြို့သတ်မှတ်ကာ မြို့နယ်ဖွဲ့စည်းခပါရယ်။ ရသေ့တောင်မြို့၏အစဦး မြို့သူကြီးတိမှာ နောက်ဆုံး စိုင်းဒင်မြို့စားကြီး၏ သားတော် ဦးအောင်မြတ် နှောက် မြီးတော် ဦးအောင်ဇုံ ရို့ဖြိုက်ဂြတ်ပါရေ။ (အေဒီ ၁၉၉၆-၉၇) မှာ အလိုတော်ပြည့်ဆရာတော်က ဦးစီးဗြီးကေ ရသေ့တောင်ဇာတီဂို ရွှီထီးတင်လှူပူဇော်ခဗြီးကေ ဇာတီဂိုရွှီရောင်အတိနန့်ဖုံးလွှမ်းဇီခပါရေ။ ဒေဂုအခါ ရသေ့တောင်ဇာတီဂို ဇာတီတော်ဝေယျာဝစ္စဂေါပကအဖွဲ့က ထိန်းသိမ်းစောင့်ရှောက် လျှက်ဟိပါရေ။

မှတ်ချက်။

ဤစာကား ရသေ့တောင်ဇာတီတော် ဂေါပက အဖွဲ့ ၏ မှတ်တမ်းမှတ်ရာ တိက ဖြိုက်ပါရေ။ ဒိုးဖြူရွာဂို ဒေဂု ဒုံးဒီကျ လို့ ခေါ်ဗြီးကေ စစ်တပ်တိချထားရေ နီရာဖြိုက်ပါရေ။

အကာအရံ

ရသေ့တောင်ဇာတီတောင်ဂို နဂါးပုံစံနန့် တည်ထားခကတ်ပါရေ။ ရသေ့တောင်ဇာတီ၏ တောင်ဘက်ဂိုပဒုံး ၊ မြောက်ဘက်ဂို အဂေါင်း အဖြစ် အကာအရံနန့် ထားခကတ်ပါရေလို့ ရှိလူကြီးတိက အဆိုအမိန့်ဟိပါရေ။ ရသေ့တောင်ဇာတီ၏တောင်ဘက် ပဒုံးဘက်မှာ ဘီလူးမကြီးက အသျှေဂို နို့တိုက်နီရေပုံရုပ်ထုဂို ထားခကတ်ပါရေ။ ယင်းဂို အသျှင်ဦးမြဝါနန့့် မဟာပညာကျော်ရို့ က အကာကြီး/အကာချေ အဖြစ်ဆိုဗြီးကေ ဘီလူးမကြီးဂို ယင်းမှာအစောင့်အဖြစ်ထားခကတ်ပါရေ။ ယင်းဂိုအစွဲပြုဗြီးကေ အဂုထိ ရသေ့တောင်ဇာတီကို ဘီလူးမတောင်လို့ ခေါ်ဂတ်ပါရေ။ ယင်းရုပ်ထုကိုကား အဂုမတွိ့နိုင်ပါယာ။ မတွိစော်နှစ်ပေါင်း ၁၀၀ ကျော်ယာလို့ ပြောကတ်ပါရေ။ ဒေဂုဘီလူးမတောင်ထက်မှာ ကျိုက်ထီးရိုးပုံစံငယ်ဂိုဖူးမြော်နိုင်ပါရေ။

ဘီလူးမနန့် ရသေ့ တန်ခိုးပြခဏ်း

ဒေချင့်ဂို ဒဏ္ဍာရီဆန်ဆန်ကြားဖူးကတ်ပါရေ။ ရသေ့နန့် ဘီလူးမရို့တန်ခိုးပြဂတ်တေခါမှာ ဘီလူးမ ရှုံးနိမ့်လားခလို့ ရသေ့တောင် တောင်၏အလယ်ကနီ တောင်ဖေါက်ဗနာ ထွက်ဗြီးလားခရပါရေ။ ဘီးလူးမထွက်ဗြီးလားခရေ လမ်းတလျှောက်မှာ ဘီလူးမ၏ ပစ္စည်းတိကျကျန်ခပါရယ် ။ ယင်း၏နာမည်အလိုက်ရွာသျှေတိ ပေါ်ပေါက်လားခပါရေ။

ပွဲတော်ကျင်းပပုံ

ရသေ့တောင်ဇာတီတောင်၏ ဘုရားပွဲဂို အင်္ဂလိပ် မတ်လအကုန် ဧပြီလဆန်း ၊ ဆယ်တန်းစာမေးပွဲအပြီး သင်္ကြန်မကျမီဇီကျင်းပပါရေ။ ၈ ရက်နန့်  ၉ ရက်မှာ တရားပွဲဂိုအယင် ကျင်းပဗြီးကေ ၁၀၊ ၁၁၊ ၁၂ ရက်နိတိမှာ နိလယ်မှာ ပျော်ပွဲရွင်ပွဲအဖြစ် အဓိက ရက္ခိုင့်ရိုးရာလောင်းပြိုင်ပွဲနန့် ကျင်ပွဲ၊ ညဇာဘက်မှာ ဇာတ်ပွဲတိဂို ကျင်းပလားပါရေ။ ၂၀၁၀ ခုနှစ်က စဗြီးကေ ပွဲတော်ဂို နတ်တော်လပြည့်နိမှာ ကျင်းပလားဖို့ လို့ သိရပါရေ။

(ကိန်းသာဘလော့မှ)