“အမှောင်ကိုခွင်း၊ အလင်းကိုဆောင်၊ ရခိုင်အလင်းရောင်။” စာပီမြင့်မှ လူမျိုးမြင့်ရေ။ စာပီပျောက်ကေ လူမျိုးပျေက်တေ။ ရခိုင်လူမျိုးလွတ်လပ်ချင်ကေ ရခိုင်စာကို အယင်သင်ကတ်။
ကျွန်တော်ရို့၏ “အမှောင်ကိုခွင်း၊ အလင်းကိုဆောင်၊ ရခိုင်အလင်းရောင်”ဘလော့သည် အိန်တာနက်ထက်မှာ တက်လာသမျှ ရခိုင်ဘာသာနန့် ဆောင်းပါး၊ကဗျာ စသည်တိကို ရှာဖွီတင်ဆက်ဖို့အတွက် စမ်းသပ်ပြုလုပ်နိန်ပါသည်။ လိုအပ်ချက်တိဟိပါက c'box မှာအမှာစာရေးထားခကတ်ပါ။ အတတ်နိုင်ဆုံး အကောင်းဆုံးဖြစ်အောင် ကြိုးစားနိန်ပါသည်။ ဆက်သွယ်ချင်ပါက alrevelation@gmail.com ကိုဆက်သွယ်နိုင်ပါရေ။

ဦးခိုင်ပြည်စိုးနှင့် တွိ့ဆုံမိန်းမြန်းချက်



၂၀၁၀ ခုနှစ် သြဂတ်စ်လ ၁ ရက်နိန့်က ရခိုင်တိုင်းရင်းသားများ တိုးတက်ရေး ပါတီမှ အတွင်းရေးမှူး အဖွဲ့ဝင် ဦးခိုင်ပြည်စိုးနှင့် သူတပည့် ဖြစ်သူ နှစ်ဦးအား ရဲ SP နှင့် စရဖမှ (စစ်တွေ)အမှတ် ၁ ရဲစခန်းကို ခေါ်ယူပြီး စစ်ဆေးမိန်းမြန်းမူများ ပြုလုပ်ခသည်။ ခေါ်ယူ စစ်ဆေးမိန်းမြန်းမူနှင့် ပတ်သက်ပြီး နိရဉ္စရာကမိန်းမြန်းရာ ဦးခိုင်ပြည်စိုးမှ အဂုပိုင် စတင် ပြောကြားသည်။



ဖြေ။ ။ သြဂတ်စ်လ ၁ ရက်နိန့် ညဇာဖက် ၄ နာရီလောက်မှာ ကျွန်တော်နန့် ကျွန်တော် တပည့်နှစ်ယောက်ကို အမှတ်(၁) ရဲစခန်းက လာခေါ်ရေ။ တချက်ချေ မိန်းစရာဟိရေဆိုပြီးကေ ခေါ်ယူလားပါရေ။ ယင်းမှာသို့ ခေါ်ယူလားရေအခါမှာ ကျွန်တော်ကို စာရွက်တိကိုထုတ်ပြရေ။ ယင်းမှာ ဇာတိပါရေလဲဆိုကေတော့ခါ ဒေ " ၂၀၀၈ ဥပဒေ နှိုင်းယှဉ်ချက်" ဆိုရေ စာတန်း တခုပါရေ။ နောက်တခု "ကိုလိုနီကျွန်သပေါက် ၂၂၆နှစ် ကြာပြီး သောအခါ" ဆိုရေ စာတစောင် ပါရေ။ ယင်းစာတိစွာ ကျွန်တော်ဘားကရရေလို့ သူရို့က ယူဆပြီး ကျွန်တော်ကို မိန်းပါရေ။ ယင်းခါ ကျွန်တော်ကပြောရေ။ ဒေချင့်တိက ကျွန်တော်ဘားကမဟုတ်ပါ။ ဒေစာရွက်တိကိုဖတ်ဖူးလားလို့ ကျွန်တော်ကိုမိန်းပါရေ။ ကျွန်တော်ဖတ်ဖူးပါရေ။ ဇာမှာဖတ်ဖူးရေလဲလို့ဆက်မိန်းရေခါ အိန်တာနက်မှာ ဖတ်ဖူးပါရေလို့ကျွန်တော်က ယင်းပိုင်ပြောပြပါရေ။ ဒေဟင့်တိက လူတကာဖတ်လို့ရရေ ကိစ္စတိပါလို့ ကျွန်တော်ပြောပြပါရေ။ ယင်းကိစ္စတိနန့်ကျွန်တော်ကို အဓိကမိန်းပါရေ။

မိန်း။ ။ ယင်းစာတန်းတိကို သူရို့ကဇာပိုင်ရဟိစွာပါလဲ။


ဖြေ။ ။ ဆရာတော် ရမ္မာဝတီ အသျှင် ပညာစာရကို ဖမ်းဆီးပြီး ကျောင်းကနိန်ပြီးကေ ပစ္စည်းတိ အားလုံးကို သိမ်းဆည်း ယူဆောင်လားပါရေ။ ယင်းအထဲက စာတန်း နှစ်စောင်ကို သူရို့က ကျွန်တော်ဘားကရရေ စာတန်းဆိုပြီး ကျွန်တော်ကို စစ်ဆေးမိန်းမြန်းစွာပါ။ ကောင်းကောင်းမွန်မွန် စစ်ဆေးမိန်းမြန်းပါရေ။

ိမိန်း။ ။ ဆရာတော်ဘားက သိမ်းဆည်းရမိရေ အထဲမှာ ပါရေ နိုင်ငံရေး စာတန်းဆိုတော့ခါ ဆရာတော်က နိုင်ငံရေးနန့် ဆက်နွယ် ပတ်သက်မူများ ဟိပါသလား။

ဖြေ။ ။ ဆရာတော်စွာ သမိုင်းသုတေသီ တဦးဖြစ်တေအတွက် တရားဝင်ရေ စာတန်းနန့် တရားမ၀င်ရေ စာတန်းတိပါ ဆရာတော်ဘားမှာ ဟိနိန်စွာဖြစ်ပါရေ။ စာရေးဆရာ သမိုင်းသုတေသီ တဦး အနိန်နန့် မှတ်တမ်း မှတ်ရာ အနိန်နန့် သိမ်းဆည်းထားစွာသာ ဖြစ်ပါရေ။ ဆရာတော်စွာ နိုင်ငံရေးထက် သမိုင်းသုတေသီနန့် လူမူရေး လုပ်ငန်းတိကိုသာ စိတ်ဝင်စားပါရေ။

မိန်း။ ။ လက်ဟိ ဆရာတော်သီတင်းသုံးခရေ မဟာမုနိ ဗုဒ္ဓ၀ိဟာရ ကျောင်း၏ အခြေအနိန်က ဇာပိုင်ဟိပါလဲ။


ဖြေ။ ။ နောက်ဆုံး ဗုဒ္ဓမဟာဝိဟာရကျောင်း၏ အခြေအနိန်ကို ပြောမယ်ဆိုလို့ဟိကေ ယင်းကျောင်းထဲမှာ တခုလည်းမဟိပါဗျာယ်။ အဆောက်အဦးရာ ကျန်ခဗျာယ်လို့ကျွန်တော်ရို့သိရပါရေ။ ယင်းမှာဟိရေ အချေတိကို ညနိန့်ခါ (သြဂတ်(စ်)လ ၂ ရက်)ညဇာဖက် ၄ နာရီလောက်မှာ အားလုံးကိုထုတ်ယူလားပါရေ။ အမှတ်(၁) ရဲစခန်းကို ရွေ့ထားရေ။

မိန်း။ ။ တခုလည်းမဟိဗျာယ်ဆိုကေတော့ခါ ဇာတိကိုယူလားပါရေလဲ။

ဖြေ။ ။ ကျောင်းမှာစာရွက်စာတန်းတိ တခုလည်းမဟိပါဗျာယ်။ ယင်းသမိုင်းဝင်ပစ္စည်းတိ အားလုံးပါလားလားခပြီးပါဗျာယ်။

မိန်း။ ။ စစ်တွေမှာ ဆရာတော် ဖမ်းဆီးခံရရေ အပေါ်မှာ ဇာပိုင်အမြင်တိဟိကတ်ပါရေလဲ။

ဖြေ။ ။ စစ်တွေမြို့ထဲမှာ အခြေအနိန်က ဇာပိုင်ဟိရေလဲဆိုကေတော့ခါ ဆရာတော်မှာ တကယ်တန်း မာတုကာနန့် တစုံတရာ ငြိစွန်းမှုဟိခကေဆိုလို့ ဟိကေ ယင်းမှုနန့်ရာ အရေးယူသင့်ရေ။ ကျန်ရေသမိုင်းဝင်ပစ္စည်းတိ၊ အချက်အလက်တိ၊ ပြီးကေ အချေတိကိုတော့ခါ တခုလည်းမလုပ်သင့်လို့ ယင်းပိုင်အမြင်တိဟိနိန်ကတ်ပါရေ။

မိန်း။ ။ ဆရာတော်စွာ မာတုကာမ (အမျိုးသမီး)နန့် တကယ်ဖေါက်ပြန်မူ ဟိခပါသလား။

ဖြေ။ ။ ကျွန်တော်ရို့ပထမကြားရေသတင်းအရ ဆရာတော် အသျှင်ပညာစာရကို မာတုကာမကိစ္စနန့် ဖမ်းရေလို့ ယင်းပိုင်သတင်းရပါရေ။ .ကေလေ့ လက်ဆုတ်လက်ကိုင် ဇာသူမှပြနိုင်စွာ မဟုတ်ပါ။ မြင်စွာလည်းမဟိပါ။ ယင်းကြောင့် မာတုကာမကိစ္စနန့် ဖမ်းရေဆိုကေတော့ခါ ကျွန်တော်ရို့က ဝိနည်းတော်အရ အရေးယူလိုက်ကေ၊ သိက္ခာချလိုက်ကေ ဆရာတော်မှာ ပြီးလားဗျာယ်။ ကျန်ရေကိစ္စတိက အရေးမကြီး၊ ယင်းပိုင်ထင်ခပါရေ။လူဝတ်လှဲလိုက်စွာနန့် ပြီးလားလိမ့်မေလို့ ကျွန်တော်ရို့တင်ခရေ။ အဂုကတော့ခါ ယင်းပိုင်မဟုတ်ဘဲနန့် ဆရာတော်ကို ဇူလိုင်း (၂၇) ရကနိန့်မှာ ဖမ်းယူလားပြီးပါရေ။ ဓမ္မသုခကျောင်းကိုရောက်တေအခါ လူဝတ်လှဲရေ။ ယင်းကနိန်ပြီးကေ ဘုန်းကြီးကျောင်းကို ပြန်မပို့ဘဲနန့် ရဲစခန်းကိုခေါ်ယူလားပါရေ။ ရဲစခန်းကိုခေါ်ယူလားရေအခါ အေနိန့်ထက်ထိ ရဲစခန်းမှာ စစ်ဆေးရေး လုပ်နိန်တုန်းလို့ကျွန်တော်သိရပါရေ။

မိန်း။ ။ ဆရာတော်ကို ဇာအမှုတိနန့် တရားစွဲဆိုမေလို့ ကြားမိပါရေလဲ ။


ဖြေ။ ။ ကျွန်တော်ရို့ တရားစွဲဆိုရေ အခါ ဇာအမှုနန့် ဇာတိနန့် စွဲဖို့လဲဆိုစွာကိုတော့ခါ မသိရသိမ့်ပါ။ အဂုက စစ်ကြောရေး ကာလရာဟိသိမ့်ပါရေ။ သူ့ကို ဇာသူနန့်မှလည်း မတွိ့ရပါ။ ဆွမ်းပို့ရေ အကောင်ချေ နန့်ရာတွိ့ရပါရေ။

မိန်း။ ။ ဇာတိဆက်ပြောချင်ပါသိမ့်လဲ။


ဖြေ။ ။ ရခိုင်လူထုတတိ၏ အမြင်ကတော့ခါ ဒေဆရာကို ဂုနက ပြောရေပိုင် တကယ်တန်းသူ့မှာဝိနည်းတော်အရ မာတုကာမနန့် တစုံတရာ ကျူးလွန်းမှုဟိခကေ ဝိနည်းတော်အရရာ အရေးယူစီချင်ရေ။ ကျန်ရေ သမိုင်းဝင်ပစ္စည်းတိ၊ အချေတိကို ဆုံးယှုံးမှုတိကို တယောက်ကလည်းမလိုလားကတ်ပါ။ ဂု ကျွန်တော်ရို့ပြည်သူတိဇာပိုင် မြင်ရေလဲဆိုကေ ရခိုင်လူမျိုးတိ၏ သမိုင်းဝင်ပစ္စည်းတိ ဆုံးယှုံးရရေလို့၊ ယင်းပိုင်ယူဆနိန်ကတ်တေ။အေဆရာတော်ဘားက ဖမ်းဆီးရလားရေ သမိုင်းဆိုင်ရာ အချက်အလက်တိကတော့ခါ ကကောင်းတန်းဖိုးဟိရေစွာတိလို့ အားလုံးကပြောနိန်ကတ်တေ။ ယင်းကြောင့် ဒေစွာတိကို ဇာသူ့ဘားကိုရောက်နိန်လဲ၊ ဇာသူတိက သိမ်းထားလဲ၊ ဒေချင့်တိကို ဇာလုပ်ဖို့လဲဆိုစွာကို ပြည်သူတိအားလုံးက မိန်းခွန်းထုတ်နိန်ကတ်ပါရေ။အဖြေရှာနိန်ကတ်ပါရေ။


(ပြီး)

(ဦးခိုင်ပြည်စိုးမှာ ရခိုင်ပြည်ကွန်မြူနစ် ပါတီ အဖွဲ့ဟောင်း တဦးဖြစ်ပြီး ထောင် ၂၂ နှစ်ချမှတ်ခံခဲ့ရပြီး များမကြာမှီ နှစ်များက ပြန်လည် လွှတ်မြှောက်လာသူ တဦးဖြစ်ပါသည်။ မဟာမုနိ ဗုဒ္ဓ၀ိဟာရ ကျောင်းတွင် စေတနာဝန်ထမ်း ဆရာ တဦး အဖြစ် ဆောင်ရွက်ခဲ့သူ တဦးလည်း ဖြစ်သည်။)

: ----------------------------------- ----------------------------------- ----------------------------------- :

(နိရဉ္စရာ သတင်းဌာနမှ)

0 မှတ်ချက်:

“အမှောင်ကိုခွင်း၊ အလင်းကိုဆောင်၊ ရခိုင်အလင်းရောင်” ဘလော့ကို တမင်တကာလာကတ်တေဖြစ်စီ၊ လမ်းမှားလို့ရောက်လာကတ်တေဖြစ်စီ ကျွန်တော်ရို့ “ရခိုင်အလင်းရောင်” မိသားစုမှ အထူးပင်ကျေးဇူးတင်ပါရေ။ နောက်ထပ်လည်း လာလည်ကတ်ပါလို့ ဖိတ်ခေါ်ပါရေ။