အမှားမလုပ်ဖူးရေလူလို့ လောကမာ မဟိ၊ တခါအမှားလုပ်ဖူးထားရေလူရေ တခါ လည်းအမှားမ လုပ်ဖူးသူနန့် စာကေ နောက်တခါထပ်မမှားဖို့မတွက် သတိပိုထားဖို့ ထင်ရေ။ ယင်းဇူးနန့် အမျိုးသားအချင်းချင်းကြားမာ ဟိ ခကတ်တေပဋိပက္ခတိကို အယင်ဆုံးပြန်လည်ဖြေယှင်းကတ်ရပါဖို့။ ယင်းပိုင်ဖြေယှင်းရေနီရာမှာ အမှားလုပ်မိ ဖူးခရေလူကလည်း မှားကြောင်းကိုရိုးသားပွင့်လင်းစွာဝန်ခံရဖို့ဖြစ်တေပိုင် ကျန်လူတိကလည်း ကြည်ဖြူစွာခွင့် လွှတ်နိုင်ကတ်ရပါဖို့။ အချင်းချင်းကြားမှာ ယုံကြည်မှုမဖြစ်မနီ တည်ဆောက်ကတ်ရဖို့ အချိန်ကျနီပါယာ။ လား နီကျလမ်းအတိုင်းလားနီကတ်လို့ တခုလည်းခရီးမပေါက်၊ အရာမရောက်စွာကို လက်တွိဒိဌဓမ္မ လက်ဟိအခြေ အနေ တိက ဖော်ပြနီပါယင့်။ အေယှင့်က ပထမဆုံး၊ အရေးအကြီးဆုံးနန့် ယင်နိုင်သမျှအယင်ဆုံး အကောင် အထည်ဖော်ကတ်ရဖို့ အလုပ်ဖြစ်ပါရေ။

အမျိုးသားရီးအတွက်လူတိုင်းမာ တာဝန်ဟိရေ၊ လူတိုင်း အမျိုးသားရီးမာ နိုင်ရေတာ ၀န်ကို ယူကတ်ရဖို့၊ ကိုယ့် တိုင်းပြည်၊ ကိုယ့်လူမျိုး ဂနိဇာအခြေအနေကိုရောက်နီယာ လဲဆိုစွာကို အပြန်အလှန်စိုင်းစားသုံးသပ်ကတ် ဖို့လိုရေ၊ ရခိုင်အရေးကို ရခိုင်တိမစိုင်း စကားကေ ဇာအောက်သားလေ့လာစိုင်းစားပီးဖို့မဟုတ်။ ဇာကုလားလေ့ စိုင်းစား လိမ့်မေမဟုတ်။ အေအချိန်မာ မစိုင်းစားနိုင်၊ မဆင်ခြင်နိုင်၊ မသုံးသပ်နိုင်၊ ပြန်လည်ပြု ပြင်ရီးကိုမလုပ် နိုင်ကတ်တေ မကြာရေတနိန့်မာ ရခိုင်သားတိ ”ထောက်ကျာ” ဆောင်းသူဆောင်း၊ မဆောင်းကေ ”မောင်ရွှေရိုး အက” ကဖို့ ပုသိမ်ထီးဝယ်ထားလီ ကတ်ပါဖိ။

သူလုပ်ဖို့လိုလို၊ ကိုယ်လုပ်ဖို့လိုလို စောင့်နီကတ်ရဖို့အချိန်မဟုတ်ပါယာ၊ ယင်းပိုင် စောင့်ခရေအချိန် အတိုင်း အတာကျော်လွန်လားခပါယာ။ ယင်းဇုနန့် အမျိုးသားရီးအ ပေါ်မှာ စစ်မှန်ရေစေတနာအရင်းခံနန့် လုပ်ကိုင်နီ ကတ်တေလူတိ၊ အဖွဲ့တိကို ပြည် သူတိအနီနန့် ကိုယ်စွမ်းဥာဏ်စွမ်း ဟိသလောက် ထိထိရောက်ရောက်ပူး ပေါင်းပါဝင်ကတ်ဖို့ ပြောချင်ပါရေ။ ယပြီးကေ ရခိုင့်အရေးမာ ငါရို့နန့်မဆိုင်၊ ငါရို့ကကျောင်း သားရာ၊ ငါရို့က ၀န်ထမ်းရာ၊ ငါရို့က လယ်၊ တောင်ယာလုပ်နီစွာရာ၊ ငါရို့ကစက်ရုံ မာလုပ်နီစွာရာဆိုပြီးကေ ဖာသိဖာသာ မနီ သင့်ပါဗျာလ်။

ကိုယ့်တိုင်းပြည် ကိုယ့်လူမျိုးကိုအဂင့်ဂင့်ချစ်တေဆိုကေ ပါးစပ်ကပြောနီရုံလောက် နန့်မပြီးပါ၊ အနီးစပ်ဆုံး၊ လက်ဟိဖြစ်ပျက်နီရေအခြေအနေတိကို လေ့လာပနာ အ ကောင်းဆုံးအဖြေတခုရလာအောင် ကြိုးပမ်းလုပ် ဆောင်ကတ်ဖို့ အားလုံးမာတာဝန် ဟိပါရေ။ကိုယ်တိုင်ကိုယ်ကျ ပါဝင်လုပ်ကိုင်ဖို့ အခြေအနေမပီး သိမ့်ကေတောင်မှ တာဝန်ယူလုပ်ဆောင်နီကတ်တေ ပုဂ္ဂိုလ်တိကို နုတ်နန့်ဖြစ်ဖြစ်၊ စာချေနန့်ပင်ဖြစ်ဖြစ် ပြော သင့်ရေလို့ထင်ပါရေ။ ယင်းပိုင်အလေ့အကျင့်မျိုးတိကို အဂုကပင်လေ့ကျင့်ထားနိုင်မှ တနိန့်နိန့် တချိန်ချိန်မှာ ဒီမိုကရေစီစနစ်နန့် ဖက်ဒရယ်ပြည်ထောင် စုပင်ဖြစ်လာလာ၊ အချုပ်အခြာအာဏာပိုင်ရေ ရခိုင့်ပြည်သူ့သမတ နိုင်ငံပင်ဖြစ်လာလာ အစိုးရနန့်ပြည်သူကြားမာ အပြန်အလှန်ထိမ်းညှိလားနိုင်ရေ အလေ့အကျင့် တခုဖြစ်လား ပါဖို့။ ယင်းပိုင်ရာမဟုတ်ဘဲ ကိုယ်နန့်မဆိုင်ဆိုပနာ တုံဏိဘာဝေနီ ကတ်ဖို့ဆိုကေ ရခိုင်ပြည်သူ့သမတနိုင်ငံ ဖြစ်လာကေတောင် ရခိုင်အာဏာသျှင်စနစ် စနစ်ဆိုးအောက်က ရုန်းထွက်နိုင်ကတ်ဖို့မဟုတ်ပါ။

တဖက်မာ ယင်းပိုင်ပူးပေါင်းဆောင်ရွက်တေပိုင် အခြားတဖက်မာလည်း မိမိရို့လက်ဟိ ရောက်ဟိနီထိုင်ကတ် တေ လူမှုပါတ်ဝန်းကျင်အသိုင်းအ၀ိုင်းကနီပြီးကေ ကိုယ့် တိုင်းပြည်၊ ကိုယ့်လူမျိုးအတွက် စီးပွါးရေး၊ လူမှုရေး၊ ကျမ္မာရေ၊ ပညာရေး၊ စိုက်ပျိုး ရေး၊ မွီးမြူရေး စရေကဏ္ဍအသီးသီးက အကျိုးဟိနိုင်ရေစွာတိကို လေ့လာမှတ် သားကတ်ရပါဖို့။ ဂနိဆိုကေ ရခိုင်သားတိစွာ ကမ္ဘာအနှံ့မှာ ရောက်ဟိအခြီချနီထိုင်နီ ကတ်ပါယာ။ မတူကွဲပြား ခြားနားရေ လူ့ပါတ်ဝန်းကျင်ပေါင်းစုံမာ ဟိလီကတ်ပါဖို့ထင် ရေ။

ယကေလေ့ ကျနော် အဓိကဦးစားပီးပြောချင်ရေလူတိကတော့ ငါး၊ ပုဇွန်ဖမ်း/မွေးမြူ ရေးလုငန်းတိမှာ လုပ် ကိုင်နီကတ်တေလူတိနန့် စိုက်ပျိုးရေးကဏ္ဍတိမာ လုပ်ကိုင်နီ ကတ်တေ ရခိုင်သားတိကို ပြောချင်ပါရေ။ ဇာဖြစ် လို့လဲဆိုကေ ရခိုင်ပြည်စွာ အားလုံး သိကတ်တေအတိုင်း ယင်းစီးပွါးရေးနှစ်ခုကို အမှီပြုနီကတ်ရလို့ဖြစ်ပါရေ။ ရခိုင့်ပင်လယ်ပြင်နန့် ရခိုင်မြီတိ ဟိနီသမျှကာလပတ်လုံလည်း အမှီပြုနီကတ်ရပါဖို့သိမ့်။

ဥပမာ ထိုင်းနိုင်ငံထဲက စိုက်ပျိုးရေးခြံတိမာ လုပ်နီကတ်တေ ရခိုင်သားတိမကန်ဟိပါ ရေ။ ထိုင်းနိုင်ငံသားတိ စိုက်ပျိုးရေးကဏ္ဍမာ ဇာပိုင်စီးပွါးဖြစ်အောင်လုပ်ကတ်တေလဲ။ နှင်းဆီပန်း၊ အာလူ၊ စပျစ်၊ ကော်ပီဖူး/ပွင့်၊ မလာဥ အစဟိရေ စိုက်ခင်းတိကို ဇာပိုင်နည်းစနစ်တိနန့် လုပ်ကတ်တေလဲ။ ထိုင်းနန့် ရခိုင်ပြည်နန့် ရာသီဥတု ယင်း လောက်ထိအများကြီးမကွာထင်ပါရေ။ ယင်းပိုင် ကိုယ်ရို့လေ့လာမှတ်သားလို့ရလာ ရေ အသိပညာတိကို ကိုနန့်နီးစပ်ရာ ရခိုင်တောင်သူလယ်သမားတိကို ပြန်လည် ဖြန့်ဝီပီးကတ်ပါ။ ဇာအချိန်မာ ရီပီးရေ၊ ဇာအချိန်မာ မြေဆီထည့်ရေ ယင်းပိုင်စွာချေ တိက အမှုမဲ့၊ အမှတ်မဲ့ မနီကတ်ပါကဲ့လို့ တိုက်တွန်းချင်ပါရေ။ အေချင့်စွာ ရခိုင် ပြည် နန့် ရခိုင်လူမျိုးတိုးတက်ဖို့အတွက် အဓိကအခန်းကဏ္ဍတခုဖြစ်ပါရေ။ ရခိုင်ပြည်မာ ရခိုင်လူမျိုး (ခန့်မှန်း ၈၀ ရာခိုင်နှုန်းလောက်)စွာ အေလုပ်ငန်းတိနန့် အသက်မွီးဝမ်း ကျောင်းလုပ်နီကတ်ရစွာကို အားလုံးအသိပါရာ။

ယင်းပိုင်နည်းတူ တခြားတခြား နိုင်ငံတကာမာ ကျောင်းတက်နီကတ်တေ ရခိုင်လူငယ်ချေတိ၊ အလုပ်အကိုင် လုပ်နီကတ်တေလူတိ၊ စီးပွါးရေးလုပ်ငန်းလုပ်နီကတ်တေ လူတိကလည်း မိမိရို့အတွိအကြုံတိ၊ ယင်းအထဲက ကိုယ့်လူမျိုးအတွက် အကျိုးဟိ နိုင်စွာတိကိုလေ့လာမှတ်သားပနာ ပြန်ပြီးကေဖြန့်ဝီပီးကတ်ပါ။ကျနော်ရို့ ရခိုင် လူမျိုး မာ ဂနိအချိန်ထိ တခြာလူမျိုးနန့်စာက သတင်းအချက်အလက်၊ သဖောထားအမြင်၊ အတွိအကြုံဖလှယ် မှုတိ ကောင်းအားနည်းနီကတ်ပါသိမ့်ရေ။ ဂနိလက်ဟိ သက်ဟိ ထင်ယှား ဟိနီကတ်တေလူတချို့မာ ဘ၀ကို ပီးဆပ် ပနာ ရထားရေအတွိအကြုံတိ ပြောလို့မဆုံးအောင်ဟိကတ်ပါရေ။ ယင်းအတွိအကြုံတိစွာ ရခိုင့်သမိုင်း မာ နောက်လာဖို့မျိုးဆက်သစ်တိအတွက်လည်း ကဂေါင်းအရေးကြီးရေလို့ ကျနော်မြင်ရေ။ ယကေလေ့ ယင်း ကိစ္စတိကို သူရို့ကလွဲပြီးကေ တယောက်လည်းမသိ။ ရခိုင်ပြည် လွတ်မြောက်ရေးအတွက် ဥက္ကဌကြီး ခိုင်မိုးလင်းဦးဆောင်ပနာ ကရင်ပြည်က ရခိုင်ပြည်ထိချီ တက်ခရေလမ်းကြောင်းရေ ကမ္ဘာ့သမိုင်းမာတောင် စာ တင်လောက်တေ။

ယင်းခရီးစွာ အာရှတိုက်မှာ အမျိုးသားလွတ်မြောက်ရေးအတွက် တရုတ်ပြည်က မော် စီတုန်းဦးဆောင်ရေ လီ ရှစ်ထောင်(၈၀၀၀)ခရီးကို ချီတက်ပွဲပြီးကေ ဒုတိယခရီးအ ရှည်ဆုံးချီတက်ပွဲဖြစ်တေ။ ကိုယ်တိုင်ကိုယ်ကျပါဝင်ခ ရေလူတိ အသက်ရှင်ဟိနီတုန်းမာ ယင်းသမိုင်းချေတခုကို လူအများသိအောင်၊ တတ်နိုင်ကေ ကမ္ဘာသူ၊ ကမ္ဘာ သားတိသိအောင် ဖွင့်ပြခစီချင်စွာကတော့ ကျနော့ဆန္ဒပါ။

ကျနော် ဂုပိုင်ရွီးနီစွာတိကို လူတိကတော့ အမျိုးမျိုးထင်နိုင်ပါရေ။ တချို့ကလည်း အကောင်းမြင်နိုင်ရေပိုင်၊ တချို့ကလည်း ”အလကားပါရာဝေ၊ ငပေါကြီးရာ” လို့ ပြောချင်ပြော ကတ်ဖို့။ တချို့ကလည်း ကဲ့ရဲ့သင်္ဂြိုလ်ပြု ချင်ပြုကတ်ပါဖို့၊ တချို့ကလည်း ယင်းသူ ကား ဇာတခုလုပ်နိုင်လို့လဲ ဆိုပနာမီးချင်ကေ မီးကတ်ပါဖို့။ ယင်းပိုင် မီးရေလူဟိ ရေဆိုကေတော့ခါ ယင်းအမီးကိုဖြေယင်းနန့် ကျနော်ဖတ်ဖူးရေအကြောင်းအရာချေတခုနန့် တခါ တည်းမျှဝီပီး လိုက်ပါမယ်။

ယင်းအကြောင်းအရာချေကတော့ အမေရိကန်နန့် ရုရှားစစ်ဖြစ်ချင်ချင် တဖက်နန့်တဖက် အခြေအနေလုံးဝတင်းမာနီရေ အချိန်မှာပါ။ ရုရှားရီငုပ်သင်္ဘောတိ အစွမ်း ထက်မြက်လွန်းအားကြီးလို့ အမေရိကန်က မျက်ဖြူ ဆိုက်၊ ခေါင်းညီးနီရရေအခြေ အနေပါ။ အမေရိကန်တိ ရုရှားရီငုပ်သင်္ဘောတိရန်ကို ပြန်ပြီးတိုက်ခိုက်ခုခံဖို့ အတွက် ဇာလုပ်လို့ ဇာကိုင်ရမှန်းမသိဖြစ်နီပါရေ။ ယင်းပိုင်ဖြစ်နီရေအချိန်မာ အမေရိကန် လွှတ်တော်မာလည်း ယင်းကိစ္စကို အကြိတ်အနယ်ဆွေးနွေးကတ်စွာလည်း တရက်ထက်တရက် အချိန်ရာကုန်လာရေ အဖြေရှာလို့ မရ ဖြစ်နီပါရေလတ်။

တရက်နိခါ အမေရိကန်ရီတပ်သင်္ဘောတိကို ရုရှားစစ်မြီပြင်မာ လက်ဟိဦးဆောင်နီ ရေဗိုလ်ချုပ်တယောက် ယင်းအစည်းအဝေးကို တက်လာပါရေ။ ယင်းအစည်းအဝေးမာ အဖြေရှာလို့မရဖြစ်နီစွာကို သူကအကြံတခုပီး ပါရေ။ သူပီးရေအကြံကတော့ ” ရုရှားရီငုပ်သင်္ဘောတိကို ရီအောက်ကနီ ရီထက်ကိုအလိုအလျောက်ပေါ်တက် လာအောင်လုပ်ရဖို့၊ ယကေ ကိစ္စပြတ်ယာ” ဆိုပနာ အကြံပီးလိုက်ပါရေ။ ယေခါ အစည်း အဝေးခန်းမတခုလုံး မှာ ဟိနီကတ်တေ သမတကအစ ၀န်ကြီးတိ၊ အမတ်တိအား လုံးတိမျက်စိစွာ ယင်းဗိုလ်ချုပ်ပါးကို တပြိုင်တည်း စုပြုံရောက်လာကတ်ပနာ ”ယင်းရု ရှားရီငုပ်သင်္ဘောတိကို ရီအောက်ကနီ ရီထက်ကို အလိုအလျောက်ပေါ်လာ အောင် ဇာပိုင်လုပ်ရပါဖို့လဲ ဗိုလ်ချုပ်” ဆိုပနာ တယောက်တပေါက် ၀ိုင်းမီးကတ်ပါရေလတ်။ ယေခါ ယင်းဗိုလ် ချုပ်က ဇာပိုင်ဖြေရေထင်ကတ်ပါလဲ။

ယင်းဗိုလ်ချုပ်ဖြေလိုက်စွာကတော့ -
”ဇာပိုင်လုပ်ရဖို့လဲဆိုစွာကို ငါ့လာမမီးကဲ့။ ငါစွာ စစ်တိုက်နီရေ ဗိုလ်ချုပ်တယောက်ရာ ဖြစ်တေ၊ သိပ္ပံပညာသျှင် တယောက်မဟုတ်ပါ။ ကျနော့် စိတ်ကူးနန့်အမြင်ကို တင်ပြ စွာရာဖြစ်ပါရေ။ လက်တွိလုပ်ကတ်ရဖို့စွာက သမ တကြီးအပါအ၀င် အစိုးရအဖွဲ့နန့် သိပ္ပံပညာသျှင်တိရာဖြစ်တေ” လို့ပြောလိုက်ပါရေ။ ကျနော်လည်းယင်းပိုင် ကျနော့် စိတ်ကူးနန့်အမြင်သျှေတိကို တင်ပြရစွာရာဖြစ်ပါရေ။လက်တွိလုပ်ကတ်ရဖို့စွာက ရခိုင်သားတိုင်းမာ တာ ၀န်ဟိပါရေ။ ရခိုင်လူမျိုးတခုလုံး ဖွံ့ဖြိုးတိုးစီချင်ရေဆန္ဒနန့် တင် ပြစွာပါရာ။ မှန်စွာကိုပြောဂေ ရခိုင်ပြည် ကြီး လွတ်လပ်ရေးရပါစီ --- လို့ အကျိန်ခံ လိုက်ပါယင့် ----။ ။
အားလုံးကျမ္မာ၊ ချမ်းသာ၊ ပျော်ရွှင်နိုင်ကတ်ပါစီ။

(ခွန်းတိုင်းသက်သီဘလော့မှ)