(6) လံပြိုင်လောင်း

ကျွန်တော်ရို့၏ “အမှောင်ကိုခွင်း၊ အလင်းကိုဆောင်၊ ရခိုင်အလင်းရောင်”ဘလော့သည် အိန်တာနက်ထက်မှာ တက်လာသမျှ ရခိုင်ဘာသာနန့် ဆောင်းပါး၊ကဗျာ စသည်တိကို ရှာဖွီတင်ဆက်ဖို့အတွက် စမ်းသပ်ပြုလုပ်နိန်ပါသည်။ လိုအပ်ချက်တိဟိပါက c'box မှာအမှာစာရေးထားခကတ်ပါ။ အတတ်နိုင်ဆုံး အကောင်းဆုံးဖြစ်အောင် ကြိုးစားနိန်ပါသည်။ ဆက်သွယ်ချင်ပါက alrevelation@gmail.com ကိုဆက်သွယ်နိုင်ပါရေ။

(6) လံပြိုင်လောင်း

(6) လံပြိုင်လောင်း
---------------

အကျွန်ုပ်ရို့အချေခါ မြောက်ဦးမြို့မှာ သျှစ်သောင်းဘုရားပွဲရောက်တိုင်း အောင်တပ်ချောင်းမှာ နှစ်တိုင်းပြိုင်လောင်းပွဲဟိပါရေ။ (၁၂) ဆယ့်နှစ်လံပြိုင်လောင်းတိ ကန်ကမကန်။ နာမည်ကြီး (၁၂) လံပြိုင်လောင်းထဲမှာ ဒိုင်းကျီပြိုင်လောင်းလည်း ပါပါရေ။ ဒိုင်းကျီဆိုသည်မှာ “ဗားဗူဟိယင့် ဆန်ဟိယင့် ဒိုင်းကျီဟိယင့် ရီဟိယင့်” စကားကို ကြားဖူးကတ်ပါဖို့။ အောင်တပ်ချောင်းတဖက်ကမ်း အခု သင်္ဘောဆိပ်တဖက်ကမ်းကပါ။ ဇာဖြစ် ”ဒိုင်းကျီဟိယင့် ရီဟီယင့်” ခေါ်ရေလဲ အချေခါ လားကြည့်ရောက်ကြည့်ခီရေအခါ အဘာလဲ မြောက်ဦးလက်ကောက်ဈီးက အလောမာဖြူမင်းတည်ရေ ”ကန်လှ” ကံက အဘာခေါ်ရလောက်အောင်ကြီးပါရေ။ အချေခါ ကန်လှကံမှာ ကံသျှာတိုင်ကို အသူကျော်ဖို့လဲ အိုးခြမ်းပစ်တမ်းကဇတ်ပါရေ။ အကျွန်ုပ် ဆယ့်သုံးဆယ့်လေးအရွယ်မှာပင် ကံသျှာတိုင်ကို ကျော်အောင်ပစ်နိုင်ပါရေ။ အန်တန်ချေလောက်အားကောင်းသူဆိုကေ ထိုဖက်ဒေဖက်ကမ်းကို ကျော်တောင်မကလို့ အရီးအကေးယာ အိမ်ခေါင်ကိုကျော်ပျာ မြောက်ဦးမြို့၏တခုတည်းသော ဗစ္စကုရုံ၏သံဖြူခေါင်ကိုလားကျလို့ အဆဲအဆူခံရရေလူတိလည်းဟိပါရေ။ ဒိုင်းကျီကံ ဇာလောက်ကြီးရေလဲဆိုကေ ကန်လှကန်ရေ ဒိုင်းကျီကန် ထက်ဝက်လောက်တောင်မဟိပါ။ ဒိုင်းကျီကန်ထက်ဝက် ကံသျှာတိုင်ကို ဆင်ပေါက်ကြီးဖြစ်ဖြစ် ကျွဲပေါက်ကြီးဖြစ်ဖြစ် ပစ်လို့မရောက်နိုင်ပါ။ လောက်လှဲကွနန့်ပစ်ကေလည်း မရောက်ပါ။ ယေဇူး ဒိုင်းကျီဟိယင့် ရီဟိယင့်ဆိုစွာကို သဘောပေါက်မိပါရေ။ ဒိုင်းကျီကန်မှာ ပျိုင်းတိ ဘဲတိ ကန်ကမကန်ဟိပါရေ။ အိမ်မွီးဘဲတိမဟုတ်ပါ။ ဘဲရိုင်းတိပါ။ ကမ္ဘာအဆုံးထိပျံနိုင်ရေ ဘဲတိပါ။

အခုနောက်ပိုင်း ဗွီဒီယိုတိမှာ ကြည့်ရပါရေ။ (၆) လံပြိုင်လောင်းချေတိနှင့် ပျော်နီကတ်ရရေ ရခိုင်သားတိ။ ရခိုင်ပြည်မှာ ဖက်ခွက်တိလုပ်ပစ်လိုက်လို့ ဇာမျှလောက် သစ်တောတိပြုန်းလားခပျာလည်း ပေါ်နီရေ။ ယေကေလည်း စင်္ကာပူမှာ နယူယောခ့်မှာ ဖက်ခွက်ကို ယောက်ဖခေါ်ချင်နီကတ်တေ ရခိုင်သားတိ ရခိုင်သမတိက ကန်ကမကန်။ ဇာပိုင် အာရီယံတိလည်းဂု။ တချို့ကပြောကတ်တေ ဆီဆွတ်အာရီယံလို့။ အာရီယံမှာလည်း ဆီဆွတ်ဟိရေလား။ စဉ်းစားစရာဖြစ်နီပါရေကား။ ခြောက်လံချေပြိုင်လောင်းတိနှင့် ဗမာစကားတခွန်း ရခိုင်စကားတခွန်းသံကျပ်ထိုးလို့ ရခိုင်သားတိပျော်ကြီးကျနီကတ်တေ။ သံကျပ်ထိုးကေ ကိုယ့်ရခိုင်စကားနန့်ထိုးပါပလင်။ ဇာဖြစ်တေလဲ။ မျန်မာစကားတခွန်းနှစ်ခွန်းပါမှ သာယာရေလား ဖက်ခွက်တိ။

ပုဏ္ဏားကျွန်းက ပြိုင်လောင်းပြိုင်ပွဲ ဗွီဒီယိုကို ကြည့်ရလို့ ၀မ်းသာအားရဖြစ်မိပါရေ။ ရခိုင့်ရိုးရာအစဉ်အလာကို မပျောက်ပျက်အောင်ထိမ်းသိမ်းဖော်ထုတ်နိုင်ကတ်စွာကို ၀မ်းသားဂုဏ်ယူမဆုံးဖြစ်မိပါရေ။ နောင်လာအစဉ်အဆက် ဆက်လက်ထိမ်းသိမ်းဖော်ထုတ်နိုင်ပါစီလို့ ဆုလည်းတောင်းပါရေ။ အားလည်းပီးပါရေ။ ပုဏ္ဏာကျွန်းဝရစ်တောင်ဆိုစွာ မင်းဖလောင်းတည်ခရ ရခိုင်ပြည်မှာ အကြီးဆုံးကျောက်နှင့်တည်ထားရေ စေတီပါ။ အုပ်နှင့်တည်ထားရေ စေတီမဟုတ်ပါ။ ရခိုင်ပြည်က ဘုရင်တိ စေတီတည်ကေ အုပ်နှင့်မတည်ပါ။ အုပ်နှင့်တည်ရေ စေတီတည်ကိုမြင်ကေ မူးမတ်ပြည်သူတိတည်ရေ စေတီဖြစ်ကြောင်းအတိအကျသိပါရေ။ ဇာလောက်ပင်မြင့်လီ။ မိုးကိုထိုးလီ အုပ်နှင့်တည်ရေစေတီ နာမည်မကြီးပါ။ ပြောချင်စွာက ပြိုင်လောင်းပွဲစည်ကေလည်း ၀မ်းသာဖို့မကောင်းပါ။ ၀မ်းနည်းဖို့ကောင်းပါရေ။ (၆) လံပြိုင်လောင်းချေတိနှင့် ဖက်ခွက်အောက်မှာ သံကျပ်ထိုးနီရရေ ရခိုင်သားတိကို ၀မ်းနည်းမိပါရေ။ စာနာမိပါရေ။ အမှန်ဆို (၆) လံပြိုင်လောင်းမှာ ပြိုင်လောင်းစရင်းမ၀င်ပါ။ ပိုက်တမ်းချရေ ထွင်းလောင်းချေတိပါရာ။ ပြိုင်လောင်းမဟိရေခါ ယင်းပိုက်တမ်းချရေ ထွင်းလောင်းချေတိကို ပြိုင်းလောင်းလုပ်လို့ ပြိုင်နီကတ်ရရေ။ ၀မ်းနည်းဖို့ကောင်းပါရေ။ ကိုယ်ရို့ဘ၀ ဇာအဆင့်ကိုရောက်နီပျာလဲ သိသင့်ပါရေ။ ဘ၀င်မမြင့်သင့်ပါ။ အတိတ်နှင့်ပစ္စုပ္ပန်ကို နှိုင်းယှဉ်သင့်ပါရေ။ ထိုသောအခါ အခုလက်ဟိ ကိုယ်ရို့အနီအထားကို သဘောပေါက်ပါလိမ့်မည်။ ထိုသောအခါ ဘ၀င်မြင့်စရာ အကြောင်းမဟိပါ။

ဆယ့်နှစ်လံပြိုင်လောင်းဖော်ထုတ်ဖို့အတွက် မလေးသျှားက အစ်ကိုကြီးထွန်းအောင်ကျော် တကူးတက အပင်ပန်းခံဖော်ထုတ်ပါရေ။ ယင်းချင့်ကို ပညာတတ် ရခိုင်ပြည်ကို ကယ်တင်ချင်ပါရေဆိုသော ဘင်္ဂလားဒေခ်ျ့က ဘုန်းကြီးတပါးက (ဆန်မရ ဆားမရ) အလုပ်တိကိုလုပ်နီရေဆိုပနာ ဝေဖန်ပါရေ။ သူ့ဆိုလိုရင်းက ယင်းချင့်ထက်အရေးကြီးရေ ကဏ္ဍတိမှာ ယင်းပွေသာတိကို သုံးသင့်ရေ။ အေနီရာမှာ (ယင်းချင့်ထက်အရေးကြီးရေ) ဆိုရေ အထူးပြုချက်ကို သတိထားမိပါလိမ့်မည်။ ဦးထွန်းအောင်ကျော်ဖော်ထုတ်တေ ဆယ့်နှစ်လံပြိုင်လောင်းက ရခိုင်သားတိအတွက် အဓိကအရေးကြီးဆုံးဖြစ်ပါရေ။ မြတ်ဘုရားကလည်း စိတ်ရာပဓာနလို့ဟောပါရေ။ ရခိုင်သားကိုကယ်တင်ဖို့အတွက် စိတ်ဓါတ်ကိုမြင့်အောင်လုပ်ခြင်းသည်ပင်လျှင် ပဓာနအကျဆုံးဖြစ်ပါရေ။ ယင်းကို သာမညလို့ ရှုမြင်သည်များမှာ သာမညပုဂ္ဂိုလ်များ၏သာမညအတွေးအခေါ်များဖြစ်ပါသည်။ စံမထိုက်ပါ။ အကျွန်ုပ်ရို့ သာမညအတွေးအခေါ်များနောက်သို့မလိုက်သင့်ပါ။ (ခြောက်) လံပြိုင်လောင်းက တဆင့် (သျှစ်) လံပြိုင်လောင်း သျှစ်လံပြိုင်လောင်းကတဆင့် (ဆယ်လံ) လံပြိုင်လောင်း ဆယ်လံပြိုင်လောင်းက (ဆယ့်နှစ်လံ) ပြိုင်လောင်းကို ပြန်တက်လှမ်းနိုင်ကတ်ပါစီ အာရီယံရခိုင်အပေါင်းရို့။ အချေခါ (၈) လံပြိုင်လောင်းကျကေ မကြည့်ချင့် လှည့်ပြန်ပါရေ။ ဖြားချချိန်ခါပြိုင်လို့။ (ခြောက်) လံပြိုင်လောင်းဆိုကေ ဝေလာဝီး။ ယေဇူး ဖြားကျပြိုင်လောင်းတိနှင့် ပျော်မနီကတ်ဖို့ ရောင့်ရဲတင်းတိမ်မနီကတ်ဖို့ မြင့်မြတ်သော ဘီစီ ၃၃၂၅ ဖွား ရခိုင်သားအပေါင်းအား နှိုးဆော်တိုက်တွန်းအပ်ပါသည်။

(ရက္ခိတရို့ဆုံရပ်မြီမှ)