ဓည၀တီနိဂုံးရွာများသမိုင်းသာခြင်း (အပိုင်း -၂)

ကျွန်တော်ရို့၏ “အမှောင်ကိုခွင်း၊ အလင်းကိုဆောင်၊ ရခိုင်အလင်းရောင်”ဘလော့သည် အိန်တာနက်ထက်မှာ တက်လာသမျှ ရခိုင်ဘာသာနန့် ဆောင်းပါး၊ကဗျာ စသည်တိကို ရှာဖွီတင်ဆက်ဖို့အတွက် စမ်းသပ်ပြုလုပ်နိန်ပါသည်။ လိုအပ်ချက်တိဟိပါက c'box မှာအမှာစာရေးထားခကတ်ပါ။ အတတ်နိုင်ဆုံး အကောင်းဆုံးဖြစ်အောင် ကြိုးစားနိန်ပါသည်။ ဆက်သွယ်ချင်ပါက alrevelation@gmail.com ကိုဆက်သွယ်နိုင်ပါရေ။

ဓည၀တီနိဂုံးရွာများသမိုင်းသာခြင်း (အပိုင်း -၂)

ဓည၀တီနိဂုံးရွာများသမိုင်းသာခြင်း
---------------------------------
မြောက်ဦးမြို့ ကျောက်ရစ်ကေဆရာ မောင်စံလှ စပ်ဆိုသည်။ ကောဇာသက္ကရာဇ် (၁၁၁၆)၊ ခရစ်သက္ကရာဇ် (၁၇၅၄) ခုနှစ် ရွီးကူးပီမူ။

(၁၃) စောင့်ထိန်းမယေမြဲစွာ၊ ထိုအခါတွင်၊ သဒ္ဓါပြင်းပြ၊ ပါရမီနှင့်၊ ရာဇိန္ဒမှာ၊ များလှသံဃာ၊ ထေရ်ငါးရာနှင့်၊ မြတ်စွာဗုဒ္ဓ၊ ကျိန်းအံ့ငှါလေ၊ ၀ိဟာရကို၊ လျှင်ဆွမကြာ၊ သစ်ဝါးရှာ၍၊ တောင်သာပုလု၊ မြရိပ်မြိုင်နှင့်၊ ကတညုတွင်၊ ရုံးစုညီညာ၊ များပြည်သူနှင့်၊ အားကူလှောက်လို့၊ ဆောက်ပြီးခါတွင်၊ ကျယ်စွာမဏ္ဍပ်၊ လွန်တင့်တယ်အောင်၊ ပြုပေလတ်၍၊ ရံပတ်သံဃာ၊ စောဗုဒ္ဓါကို၊ ပင့်ကာလှူငြား၊ ကျောင်းဝိဟာမှာ၊ ကောင်းစွာထားလို့၊ တရားဓမ္မ၊ ရက်မခြားအောင်၊ ကြားနာရ၍၊ သုံးဝသရဏာဂုံ၊ ပြည့်ဖြိုးထုံ၍၊ ငါးစုံသီလ၊ အဋ္ဌဂီဖြင့်၊ ကျင့်ညီမျှလျှက်၊ စန္ဒသူရိယာ၊ မင်းမြတ်စွာနှင့်၊ ပြည်ရွာတိုင်းသား၊ ခဿိန်းသူလေ၊ လူအများမှာ၊ စိတ်ထားကြည်ဖြူ၊ ပီးအလှူနှင့်၊ အယူဖြောင်တန်း၊ သာသနာမှာ၊ ရောင်ဝါထွန်းလို့၊ ပွင့်လန်းခါစ၊ ကျင့်ဆယ်ဖြာနှင့်၊ မင်းရာဇာလျှင်၊ ဗုဒ္ဓစံရာ၊ ကျောင်းဝိဟာသို့၊ လှမ်းကာချီကြွ၊ မာရဇိန်လေ၊ မုနိန္ဒကို၊ ဦးချပြီးခါ၊ ကြောင်းစုံလင်ကို၊ ဘုရင်မင်းမှာ၊ လျှောက်ခြင်းရာကား၊ သုံးဖြာလောက၊ တုမရကေ၊ ညာဏထွတ်ချာ၊ စောဗုဒ္ဓါလျှင်၊ ပြည်ရွာတမည်၊ သို့ဖြစ်ပေ၍၊ စိန္တေမြတ်စွာ၊ ဘဂ၀ါနှင့်၊ တူစွာမခြား၊ ရတနာနှင့်၊ သွန်းကာလုပ်ကေ၊ မြတ်ရုပ်ပွားကို၊ သနားမိတ္တာ၊ ကိုးကွယ်ရန်လေ၊ မှန်ယခုလျှင်၊ ခွင့်ပြုပါဟု၊ ရာဇာမင်းကောင်း၊ နှုတ်ဝါစာက၊ မြွက်ခါတောင်းသော်၊ ကျိုးကြောင်းထောက်ကာ၊ မင်းရာဇာကို၊ မြတ်စွာသုံးလူ့၊ ရွှီကျောင်းပေါ်မှာ၊ ခွင့်တော်ပြုသော်၊ ရှိဦးတင်ကာ၊ နန်းဘုံသာသို့၊ ပြန်လာပြီးမှ၊ မှူးမတ်ဝန်လေ၊ ပန်ရံခလို့၊ သီဟဥဂ္ဂင်၊ ညီလာခွင်မှာ၊ တိုင်ပင်ပြီးထွေ၊ မတ်တန်တန်ကို၊ တာဝန်ခွဲလို့၊ လွှဲပြီးချေသော်၊ ရွှီငွေကြီးသံ၊ တင်မကျန်ဘဲ၊ ငါးတန်လောဟာ၊ ရတနာလေ၊ သပြာချပ်ရွီ၊ ငါးမျိုးစီကို၊ စုပုံပြီးကေ၊ တကုဋေအား၊ ကြံညီဖြူဆွ၊ ငါးစီးဆင်မှာ၊ တင်ပြီးမှလျှင်၊ သတ္တရတနာ၊ ညီးလူလူကေ၊ ထီးဖြူမြတ်ကို၊ ဆောင်းလတ်ပါ၍၊ ရာဇာဘုန်းတု၊ လွန်မြိုင်ဆိုင်ကေ၊ ကတညုသို့၊ ရုံးစုညီညာ၊ အောင်မောင်းညံလို့၊ အောင်သံရွှန်းကေ၊ ချီလှမ်းခါဖြင့်၊ လွန်စွာကြီးကျယ်၊ မဏ္ဍပ်လယ်မှာ၊ ရောက်သည်ကာလ၊ ငါးစီးဆင်၏၊ ဥဂ္ဂင်မှလျှင်၊ ချကြပြီးငြား၊ ရတနာကို၊ ပုံကာထားမှ၊ ထင်ရှားကျော်လတ်၊ ပိသုကာလေ၊ ဆရာမြတ်နှင့်၊ လူနတ်များစွာ၊ ကိုးစားရာလေ၊ မဟာမုနိ၊ ရုပ်ပွားတော်လေ၊ သောင်းကျော်လတ်ကေ၊ မြတ်ဗောဓိကို၊ သွန်းသည့်အခါ၊ နှစ်ကောဇာလျှင်၊ တရာ့နှစ်ဆယ်၊ သုံးခုကယ်တွင်၊ ရောင်ခြည်ဝင်းပ၊ ပူပြင်းတုံကေ၊ ကဆုံလ၏၊ ပြည့်ထရက်မှာ၊ နိဗုဒ္ဓါတွင်၊ စကာသွန်းဘိ၊ ဆုတ်ပက္ခာသို့၊ လွန်လာပြုကေ၊ ဂုရုနိတွင်၊ ထိန်ညီးရူပ၊ လျှပ်စစ်ရောင်သို့၊ ပြောင်ပြောင်လင်းကေ၊ ဆင်းဗုဒ္ဓကို၊ ပဉ္စလောဟာ၊ ရတနာဖြင့်၊ သွန်းကာလုပ်ကေ၊ ခြောက်ရောင်ထင်၍၊ မြင်မညီးအောင်၊ သွန်းပြီးရေလေး။

(၁၄) သွန်းလို့မယေပြီးခါ၊ မြို့ဓညာက၊ မြတ်စွာဗုဒ္ဓ၊ ထေရ်ငါးရာနှင့်၊ ပြန်ကာကြွသော်၊ စန္ဒသူရိယာ၊ မင်းရာဇာမှာ၊ ရောင်ဝါထွန်းညီး၊ လွန်သပ္ပါယ်၍၊ တင့်တယ်လတ်ကေ၊ မြတ်မုနိကို၊ ဦးထိပ်ရိုသေ၊ ဂါရဝေဖြင့်၊ တာရှည်စိတ်ညွတ်၊ သတိုးနွယ်မှာ၊ ကိုးကွယ်လတ်လို့၊ ထပ်ထပ်လီလီ၊ ချိန်နာရီကေ၊ ရာသီရွှိပြောင်း၊ နှစ်လတာလေ၊ လွန်ကြာညောင်းအောင်၊ မင်းကောင်းရာဇာ၊ ဆည်းကပ်လာ၍၊ ကောဇာသက္ကရာဇ်၊ တရာကယ်၍၊ လေးဆယ့်သျှစ်သို့၊ ရောက်လစ်သောခါ၊ မစ္ဆိမာတွင်၊ မြတ်စွာဗုဒ္ဓ၊ ပြည်နိဗ္ဗာန်သို့၊ ၀င်စံကြသော်၊ လောကလူ့ဘောင်၊ ကျိုးများယောင်ဟု၊ ငါးထောင်သာသနာ၊ ထားလတ်ပါကေ၊ ထိုခါကာလ၊ မြို့ဓညာက၊ မင်းရာဇလျှင်၊ အဋ္ဌစတ္တာ၊ အစ်သင်္ချာကို၊ ဖြိုကာခွင်းထ၊ သာသနာနှင့်၊ ညီစွာမျှအောင်၊ တစ်မှစ၍၊ သက္ကကောဇာ၊ ပြုတုံပါကေ၊ စန္ဒာသူရိယ၊ သဒ္ဓါဖြူကေ၊ (လှူဒါနနှင့်)၊ ရောက်ထကောဇာ၊ တခုမှာတွင်၊ ခန္ဓာရုပ်နာမ်၊ ပျက်ချုပ်ပြန်သော်၊ တဖန်နန်းတက်၊ မင်းလီလီကို၊ တွက်ရွီမြောက်ကေ၊ တဆယ့်ခြောက်သို့၊ မပျက်ရောက်ခါ၊ သူရိယာကေ၊ နွယ်လာဝံသ၊ တန်းခိုးပြောင်၍၊ ဘုန်းရောင်ဟိတ်နှင့်၊ စိတြဟု၊ နာမတွင်ခြင်း၊ မြို့ဓညာက၊ ရာဇာမင်းလျှင်၊ ခန်းကြွင်းကြုံလာ၊ ကိန်းသင်္ချာကေ၊ န၀ါခဆ၊ နှစ်ကောဇာကို၊ ဖြိုကာချလို့၊ ထိုမှစဉ်လျှက်၊ နောက်ထပ်မံ၍၊ စိုးစံခြင်းကေ၊ မင်းကိုးဆက်ထိ၊ နန်းတက်ကြရာ၊ ကောဇာနှစ်ကို၊ တွက်စစ်ပါသော်၊ နှစ်ရာကျော်လစ်၊ စွန်းကာကယ်၍၊ လေးဆယ့်သျှစ်တည်း၊ နောက်၌တဖြာ၊ မှတ်စရာကေ၊ ဓညာကနက်၊ ထီးနန်းဘုံဖြင့်၊ ဂုဏ်မချို့ကေ၊ မြို့အသက်ကို၊ ရွီတွက်ပြန်ရာ၊ သတ်သုံညာနှင့်၊ န၀ါရောက်အောင်၊ နန်းဘုံဆောင်မှာ၊ ဘုန်းရောင်တောက်ပ၊ ရှိရာဇာရို့၊ ကျင့်ရာထုံးကို၊ သုံးနှုံးကြလျှက်၊ စန္ဒသူရိယာ၊ မြတ်ရာဇာ၏၊ နွယ်လာဝံသ၊ မျိုးအနွယ်နှင့်၊ စိုးသည်မင်းကို၊ ယှင်းလင်းပြသော်၊ ပဉ္စ၀ိသာ၊ ထိုရာဇာရို့၊ မဟာမုနိ၊ အမည်တွင်ကေ၊ သျှင်ဗောဓိကို၊ နိညိမသွယ်၊ သိမ်တော်ပြင်မှာ၊ ဦးတင်ညွတ်ကေ၊ ဆည်းကပ်တေလေး။

(၁၅) ဤလေလေကေ၊ ဤလေကျော်ရွှန်း၊ ဤသို့စီကေ၊ ဤနှစ်ခန်းတွင်၊ ပြညွှန်းသေချာ၊ နိဂုဏ်းရွာ၌၊ ဓညာရဌ၊ ရွှီနန်းယံမှာ၊ စိုးစံကြကေ၊ ရာဇဖြာဖြာ၊ ပေါင်းများစွာနှင့်၊ မဟာမုနိ၊ ခြောက်ရောင်ပေါ်ကေ၊ ကိုယ်တော်မြတ်၏၊ ထုပ္ပတ္တိကို၊ စိစိစပ်စပ်၊ နောင်အစဉ်လေ၊ ရခိုင်သားရို့၊ သိထားကတ်အောင်၊ လေးရပ်တိုင်းခွင်၊ ဂါမ၀င်နှင့်၊ ရာဇ၀င်ခန်း၊ မြဒိုးဝေ၏၊ ရွီးသည်ကျမ်းကို၊ မှီငြမ်းပြုကာ၊ ဤကဗျာကို၊ ပြည်ရွာညွန့်ဖူး၊ နန်းဘုံဆောင်ဖြင့်၊ ပြောင်ပြောင်တောက်ကေ၊ မြို့မြောက်ဦး၌၊ ပျော်မြူးစဖွယ်၊ ကျောက်ရစ်ကေဟု၊ အမည်သာယာ၊ ရပ်မဟာတွင်၊ ပညာပြည့်ဝ၊ ဟာသဥာဏ်နှင့်၊ မောင်စံလှဟု၊ နာမသညာ၊ ငါဆရာလျှင်၊ ကဗျာစီတန်း၊ သာခြင်းသံကို၊ ကာရံဆန်းနှင့်၊ နှစ်ခန်းမြောက်စွာ၊ ကုံးပြီးပါ၍၊ ဖတ်နာသူများ၊ ဆီးလိပ်ချိုနှင့်၊ ကွမ်းကိုစား၍၊ တန့်နားကြပေ၊ မြို့ဝေသာ၏၊ ကြောင်းရာထုံးကို၊ (ပြောအုံးမည်လေး)။ (ပျောက်)

(၁၆) တခန်းမယေရပ်ခို၊ နောက်ထပ်မံ၍၊ ကာရန်ဆန်းနှင့်၊ တခန်းဆိုမည်၊ မေပျိုသက်ထား၊ ပန်းစံပယ်မှာ၊ မောင်စကားကို၊ ထောင်နားတည်ပါ၊ မြို့ဓညာကို၊ ပိုင်ကာစိုးငြား၊ မင်းဆက်နွယ်လေ၊ နှစ်ဆယ့်ငါးတွင်၊ နောက်ဖျားဆုံးစွန်၊ အုပ်စိုးစံကေ၊ နိုင်ငံမျက်ရှု၊ မဟာနွယ်လေ၊ မင်းကေတုမှာ၊ သားဦးပတ္တမြား၊ လက်ရုံးရောင်ဖြင့််၊ ပြောင်ပြောင်ထွန်းကေ၊ စန္ဒြားကို၊ မင်းဖျားရာဇာ၊ တရံခါဝယ်၊ အင်္ဂါလေးရပ်၊ စစ်သေနာဖြင့်၊ ရံကာပတ်လို့၊ မှူးမတ်စုံစွာ၊ မြို့ဓညာက၊ ထွက်ခါသုတ်သုတ်၊ ခရီးတာကို၊ သင်္ချာထုတ်သော်၊ ဂါဝုတ်နှစ်ပြန်၊ ရပ်မျက်နှာကို၊ မှန်းကာထောက်သော်၊ နောက်မြောက်ယံတွင်၊ ရောက်ပြန်ကာလ၊ ကုန်းကမ်းမြီမှာ၊ ဗိုလ်ခြီဝန်းကေ၊ စခန်းချလို့၊ မြို့ပြအင်္ဂါ၊ လက္ခဏာနှင့်၊ ညီစွာတင့်တယ်၊ ကျုံးပတ်ရံ၍၊ တပ်ခြံဆီးကေ၊ မြို့ကြီးတည်လို့၊ ဂုဏ်ရည်ထူးမြင့်၊ နန်းဝေယံဖြင့်၊ စံမနှုံးကေ၊ ကံသုံးဆင့်ဟု၊ နန်းမြင့်သညာ၊ ထိုမြို့ရွာမှာ၊ ရာဇာစန္ဒြား၊ မတ်တော်ဝန်နှင့်၊ ခြံရံငြားလို့၊ စံစားပျော်ရာ၊ ထိုအခါတွင်၊ ဗိုလ်ပါဆင်မြင်း၊ မိုးတွင်းခါဝယ်၊ ယင်နာရောက်ကေ၊ သီပျောက်ခြင်းကြောင့်၊ နန်းတွင်းဘုံသာ၊ ဆောင်သီဟာတွင်၊ ရာဇာမင်းလှ၊ မတ်များစွာနှင့်၊ တိုင်ပင်ကြသော်၊ ဗေဒကျွမ်းကျင်၊ ကျမ်းစုံသင်၍၊ မြော်မြင်နှမ့်သိ၊ တိုင်းနိုင်ငံမှာ၊ လွန်ကျော်ဇောကေ၊ ပရောဟိဟု၊ က၀ိမတ်ဝန်၊ လျှောက်တင်ဟန်ကား၊ အလွန်ကျော်ကြား၊ မင်းရာဇိန်လေ၊ စနီသားမှာ၊ ထွက်လားချီဘိ၊ ဆန်းစကြုံ၍၊ ကဆုန်ကူးကေ၊ ဗုဒ္ဓူးနိတွင်၊ သိမ့်သိမ့်ကျော်ညာ၊ နောက်မျက်နှာတွင်၊ သိင်္ဂါနန်းမြင့်၊ ဆောက်စိုက်သွယ်၍၊ မြို့ပြည်ပြောင်းကေ၊ အကြောင်းသင့်၍၊ နန်းမြင့်တည်ရာ၊ ပြည်အောင်ချာတွင်၊ နာနာဘာဝ၊ ဖုတ်ပြိတ္တာရို့၊ ၀င်ကာရောက်ကေ၊ ပယောဂကြောင့်၊ မုချအမှန်၊ လူများစွာ၏၊ ခန္ဓာသက်လျှင်၊ ပျက်ရပြန်ဟု၊ ထိပ်စွန်လက်ထား၊ လျှောက်တင်ပုံကို၊ မယုံငြား၍၊ ပယ်ထားပြီးလျှင်၊ နောက်ထပ်မံ၍၊ မတ်ဝန်များကို၊ ပြောကြားအင်ကား၊ မြော်မြင်ဥာဏ်ဟိ၊ အဖြာဖြာကို၊ လိမ္မာတတ်ကေ၊ မတ်က၀ိရို့၊ သဖောလက္ခဏာ၊ ရင်းအချာဖြင့်၊ ရောဂါကင်းကြောင်း၊ တတ်ကြည်ပွန်၍၊ လွန်ထင်ရှားကေ၊ သမားကောင်းနှင့်၊ ဆီးကောင်းနည်းနာ၊ အဖြာဖြာကို၊ လျှင်စွာခဏ၊ သိဟိပြန်သော်၊ ငါ့ထံမှောက်မှာ၊ လျှောက်ထားကြဟု၊ ချသည့်အာဏာ၊ ထိုအခါတွင်၊ သက်ဝါကြီးမြောက်၊ ပညာရွှင်၍၊ ကျော်ထင်လတ်ကေ၊ မတ်တယောက်က၊ တင်လျှောက်တုံကျင်၊ နန်းကြီးသျှင်ကေ၊ ဘုရင်ဘုန်းခေါင်၊ ကြွင်းမကျန်အောင်၊ ကျွန့်စကားကို၊ ရွှီနားထောင်ပါ၊ များမြောင်လူသား၊ ဖြစ်ပွားပါကေ၊ ရောဂါများကြောင့်၊ ပျက်ပြားတုံပါ၊ ဤကြောင်းရာကား၊ မိစ္ဆာစုန်းဖုတ်၊ နတ်ပြိတ္တာလေ၊ နာနာရုပ်ရို့၊ ပြုလုပ်တုံကြ၊ ပရောဂလေ၊ ဒေါသမဟုတ်၊ ကျမ်းအညွှန်နှင့်၊ မှန်သရုပ်ကို၊ ဖော်ထုတ်လျှက်သာ၊ ပြရပါမူ၊ ရာဇာစံမြန်း၊ မြို့တခိုကို၊ ရီညိုဝန်းလို့၊ ညစ်ညမ်းရွှံ့နွံ၊ အင်းအိုင်ရံကေ၊ ပုဇွန်လိပ်ငါး၊ ပျော်မြူးအင်ကေ၊ မှက်ခြင်များ၍၊ တွင်ငြားနာမ၊ များလူဗိုလ်ရို့၊ ခေါ်ဆိုပြောကေ၊ နောပကဟု၊ ဒေသဤမှာ၊ မိုးချိန်ခါတွင်၊ မရွာမသွန်၊ မိုးခေါင်ပြန်သော်၊ ပူလွန်ပြင်းပြ၊ လူများစွာရို့၊ ရောဂါရ၍၊ ၀ါတပုတိ၊ မည်ဟိတွင်ပြီ၊ ဓာတ်နှစ်လီမှာ၊ ကဲလွန်တုံထ၊ ငုတ်တုံပါကေ၊ အာကာသကြောင့်၊ ဥဏှတေဇော၊ တွင်းသဏ္ဍန်မှာ၊ လွန်ပြန့်ပြော၍၊ ပျက်ချောတလီ၊ ပထ၀ီကြောင့်၊ အမှီမရ၊ ၀ါယောကန်၍၊ ၀မ်းသွန်ခြင်းမှာ၊ ထန်ပြင်းလှ၏၊ ထိုကတဖန်၊ ကူးစက်ဟန်မှာ၊ ညှီနံပုတ်ငြား၊ ယိုစီးကျင်ကေ၊ မစင်အားကို၊ ယင်များအုံကာ၊ စားသောက်ပါ၍၊ ပျံကာတခြား၊ လူများစွာ၏၊ အစာများမှာ၊ နားလတ်တုံဘိ၊ ထိုအစာကို၊ ယူကာပွားကေ၊ စားသောက်မိ၍၊ ဖြစ်သည့်ရောဂါ၊ ထိုအနာမှာ၊ မြန်စွာကူးစက်၊ ဤပုံစံသို့၊ ပြန်ကာပြောင်းကေ၊ ထောင်သောင်းဆက်၏၊ တချက်နောက်မှာ၊ ဤရောဂါ၏၊ ဖြစ်ရာမူလ၊ သောက်သုံးနီကေ၊ ရီကစဟု၊ ရှိကမိန့်မှာ၊ စကားလာကြောင့်၊ ခုခါထင်လင်း၊ ဤပြည်ရွာမှာ၊ ရောဂါကင်းအောင်၊ ရီတွင်းရီကန်၊ သန့်ယှင်းရန်ကို၊ ကောင်းမွန်ပြုငြား၊ နောင်တလီတွင်၊ သောက်ရီများကို၊ ကြိုထားတုံပြန်၊ ယင်နားလာကေ၊ အစာများကို၊ မစားရန်တည်း၊ တဖန်သိအပ်၊ စွတ်စိုစိုနှင့်၊ ထိုအ၀တ်ကို၊ မကပ်ယှောင်ခွာ၊ အိမ်တခွင်လေ၊ ပြင်အတွင်းပါ၊ သန့်ယှင်းရာဟု၊ ကျမ်းလာစကား၊ ဤနည်းလာကို၊ ဆောင်ကာထားလျှင်၊ ကြီးထွားလှစွာ၊ ဤရောဂါလျှင်၊ ကင်းကွာလိမ့်မည်၊ မင်းဘုရင်ကို၊ ဦးတင်မြှောက်လို့၊ လျှောက်လတ်ပေသော်၊ ဘုန်းကြွယ်မင်းလှ၊ မတ်တော်ဝန်၏၊ တင်ဟန်များကို၊ ရွှင်အားရ၍၊ များစွပြည်သူ၊ ခဿိန်းသူရို့၊ ထပ်တူထပ်မျှ၊ နည်းယူသင်၍၊ အားအင်ထုတ်ကေ၊ ပြုလုပ်ကြဟု၊ ချသည့်အာဏာ၊ ထိုအခါတွင်၊ ပြည်ရွာအတွင်း၊ ထိုနမူကို၊ စံယူထုတ်ကေ၊ ပြုလုပ်ခြင်းကြောင့်၊ မြို့တွင်းပြည်ရွာ၊ ထိုယင်နာမှာ၊ မြန်စွာကင်းပျောက်၊ ပြည်ကြီးသျှင်မှာ၊ ရွှင်ဝမ်းမြောက်လို့၊ တင်လျှောက်နည်းညွှန်၊ မတ်တော်ဝန်ကို၊ ဆုမွန်ချထွေ၊ သီဟာပျံနှင့်၊ ဝေယျံနန်းမှာ၊ ချီမွှမ်းရေလေး။

(၁၇) ချီမွှန်းမယေသြဘာ၊ ပြုတုံပါကေ၊ ရာဇာထွတ်ထား၊ တအေကာမှာ၊ တေဇာလွှမ်းကေ၊ စန္ဒားလျှင်၊ တည်ထားစံလင့်၊ များဗိုလ်တာရို့၊ ပျက်ကာဆုံးကေ၊ ကံသုံးဆင့်၍၊ ထီးဖွင့်မကြာ၊ တနှစ်တာတွင်၊ စွန့်ခွာပြီးလစ်၊ သက္ကရာဇ်လျှင်၊ နှစ်ရာ့လေးဆယ်၊ ကိုးခုဝယ်တွင်၊ ဌာနေသီရိ၊ သေအချာဖြင့်၊ ဝေသာလိကို၊ ပြောင်းရွှိတည်ထောင်၊ မတ်များမြောင်နှင့်၊ ရွှင်မညီးအောင်၊ စံပြီးနောင်တွင်၊ ပြည်ဘောင်တရိုး၊ ရွှီပြည်သူလေ၊ လူအများရို့၊ စီးပွားတိုးအောင်၊ ပံ့ပိုးကောင်းစွာ၊ ဆယ်မြောင်းတာနှင့်၊ လယ်ယာများပြား၊ တိုးချဲ့ပြန်ကေ၊ စီမံထားလို့၊ တပါးနောက်တွင်၊ တိုင်းပြည်ခွင်၌၊ လူသျှင်အများ၊ သီရောဂါရို့၊ ကင်းကွာငြားအောင်၊ ဆီးဝါးပညာ၊ သင်အံ့ငှါလျှင်၊ တရွာတယောက်၊ မင်းရာဇာကေ၊ ဘဏ္ဍာထောက်လို့၊ တတ်မြောက်အောင်ပင်၊ မြတ်ဆရာနှင့်၊ ဝေသာမြို့မှာ၊ ခေါ်လို့သင်၍၊ လူသျှင်သီးသီး၊ တိုင်းမြို့ရွာမှာ၊ ကျမ္မာရီးကို၊ အားပီးကူညီ၊ တတ်လိမ္မာကေ၊ ဆရာများနှင့်၊ ကုစားစီလို့၊ တလီထိုမှ၊ ရောင်းအ၀ယ်ကို၊ တွင်ကျယ်လှအောင်၊ မောင်းကရာဇူ၊ ဟောင်းသစ်ဟူ၍၊ ညီတူပြုငြား၊ ရွှီပြည်သူရို့၊ သုံးတုံငြားကေ၊ သွန်းထားသေချာ၊ လွန်ကြည်လင်၍၊ ငွေစင်ပြားကေ၊ ဒင်္ဂါးမှာလျှင်၊ မဟာစန္ဒြား၊ မြတ်ဘုန်းမိုကေ၊ ထိုမင်းများ၏၊ မွီးဖွားတုံပြန်၊ စနီနံကို၊ အမှန်ခပ်နှိပ်၊ ကြံစုံပြန်ကေ၊ နွားတံဆိပ်နှင့်၊ ရောင်ဖိတ်ဝင်းဖြာ၊ တဖက်မှာတွင်၊ ရာဇာဆောင်းထိုက်၊ နာရဏီလေ၊ သိင်ဂီစစ်ကေ၊ မကိုဋ်ပုံစံ၊ နောက်တဖန်ကား၊ ကြာလွန်ရှိက၊ မြို့ဓညာမှာ၊ တေဇာပကေ၊ သူရိယရာဇာ၊ ဆက်နွယ်လာဟု၊ ဖော်ကာညွှန်ပြ၊ စုံအညီကေ၊ နီနှင့်လကို၊ ပီသကောင်းမွန်၊ မကိုဋ်တော်၏၊ အပေါ်ထိပ်မှာ၊ ခပ်နှိပ်ပြန်၍၊ ပုံစံနှစ်ရပ်၊ ငါးမူးဟူ၍၊ သုံးယူစွဲကေ၊ မူခွဲခတ်နှင့်၊ တချပ်သုံးရန်၊ နှစ်ပုံစံကို၊ သွန်းပြန်များပြား၊ ရခိုင်ပြည်လေ၊ နယ်အနှံ့မှာ၊ ဖြန့်လတ်ငြားသော်၊ ဖောက်ကားရောင်းဝယ်၊ အသွယ်သွယ်မှာ၊ တွင်ကျယ်ပြန့်ပြော၊ မြစ်နဒီလေ၊ ရီတကြောမှာ၊ သင်္ဘောလှီယင်၊ လောင်းလွန်းကြင်ရို့၊ ထွက်ဝင်သောင်းသောင်း၊ တခြားပြည်က၊ ကုန်သည်ပေါင်းလည်း၊ ရောင်းရန်ဝယ်ရန်၊ လာကြပြန်သော်၊ ကုန်ဝန်တင်ချ၊ သွယ်အယူကေ၊ လွယ်ကူလှအောင်၊ လှပခိုင်မာ၊ ကျောက်များစွာဖြင့်၊ စီကာလုပ်ထား၊ ဆိပ်ကမ်းခြီမှာ၊ ကျောက်လှီကားကို၊ စန္ဒြားမင်းမွန်၊ ပြုလုပ်ပြန်၍၊ ငွေခွန်တိုးပွား၊ ဝေသာလီမှာ၊ လွန်စည်ကားလို့၊ ဘုရားမြတ်စွာ၊ သာသနာကို၊ ပမာနီလ၊ ထိန်ထိန်ဖြာကေ၊ ရောင်ဝါပအောင်၊ မစကောင်းစွာ၊ ဆောင်ရွက်ကာဖြင့်၊ ဝေသာကြငှန်း၊ ရွှီနန်းဆောင်မှာ၊ ဘုန်းရောင်ထွန်းလို့၊ စံမြန်းပျော်ရာ၊ နန်းသက်တာကို၊ ရွီကာတွက်သော်၊ ငါးဆယ်ကျော်၍၊ စွန်းပေါ်ခုနစ်၊ ပွားတက်လာကေ၊ ကောဇာနှစ်ကို၊ တွက်စစ်ပြန်မြောက်၊ ကိန်းသင်္ချာလေ၊ သုံးရာခြောက်တွင်၊ ဘုန်းတောက်ပါရမီ၊ မဟာဆွီကေ၊ သာဂီမင်းမျိုး၊ သက်အရွယ်လျှင်၊ သျှစ်ဆယ့်ကိုးမှာ၊ ပျက်ညှိုးဇာတာ၊ မြို့ဝေသာကို၊ စွန့်ကာတဖန်၊ ရုပ်ခန္ဓာလေ၊ ပျက်ကာယွင်းကေ၊ နတ်နန်းစံလို့၊ တဖန်နောက်မှ၊ သူရိယဟု၊ ရာဇစန္ဒြား၊ မတ်ပေါင်းရံ၍၊ စိုးစံငြားကေ၊ ထင်ရှားကျော်ဟိုး၊ နှင်းသက်ဝေလျှင်၊ လေးဆယ်ကိုးတည်း၊ နွယ်ရိုးဝံသ၊ ဆက်နွယ်ပြန်၍၊ ဘုန်းကံပကေ၊ မောလရာဇာ၊ နန်းစံမှာကား၊ အဋ္ဌာစာရ၊ မင်းပေါလလျှင်၊ ရက္ခပူရီ၊ ဝေသာလီကို၊ ခွန်စီစိုးမြောက်၊ မြဲမသွယ်ကေ၊ လေးဆယ်ခြောက်နှင့်၊ ထိုနောက်တ၀၊ ပြင်းအာဏာနှင့်၊ မင်းကာလလျှင်၊ န၀စတ္တာ၊ မြို့ဝေသာကို၊ စံလာပြီးမြောက်၊ မင်းပြည်ပိုင်လေ၊ စဉ်မပျက်ကေ၊ ငါးဆက်ရောက်သော်၊ ထက်အောက်လွှမ်းကျော်၊ တုမပေါ်အောင်၊ ဘုန်းတော်ကြီးလှ၊ တိုင်းနိုင်ငံကို၊ စိုးပြန်ရကေ၊ ထူလစန္ဒြား၊ တွင်ငြားတဖြာ၊ အာနန္ဒာဟု၊ သညာဘွဲ့ရ၊ ထိုဘုရင်မှာ၊ ကြင်မ၀ကေ၊ အလှကြံညီ၊ ရူပိနီဟု၊ ဒေ၀ီရတနာ၊ ဘွဲ့သညာမှာ၊ ကုမ္မာမိဖုရား၊ လှအောင်ချာကို၊ တောင်ညာထားလို့၊ စံစားတုံလစ်၊ မှတ်သင်္ချာလေ၊ ကောဇာနှစ်လျှင်၊ တွက်စစ်ငါးရာ၊ ရောက်သောခါတွင်၊ သုံးဖြာပိဋကတ်၊ မြတ်ဇိနော်လေ၊ ဟောဖော်ဘိကေ၊ ပရိယာတ်ကို၊ ကြီးချပ်၌မှာ၊ ရွီးထိုးကာဖြင့်၊ သံဃာယနံ၊ ပဉ္စနံကို၊ မင်းမွန်စောထီး၊ မြို့ဝေသာမှာ၊ သံဃာများနှင့်၊ တင်ထားပြီးသော်၊ ပျက်စီးပြန်ခါ၊ နောက်ရာဇာရို့၊ ထပ်ခါပြုစု၊ လုပ်နိုင်ရန်ကို၊ စိတ်ကြံပြုလို့၊ ကောင်းမှုဒါန၊ တာသုံးထောင်နှင့်၊ ဂေါင်အချုပ်ကေ၊ သဂုင်္တ္တဟု၊ နာမတွင်ခြင်း၊ သရက်ရွာနှင့်၊ လက်ကာတွင်းကို၊ စိတ်ရင်းဖြူစွာ၊ လှူလတ်ပါ၍၊ အက္ခရာရွီးမှတ်၊ ကြီးချပ်လွှာမှာ၊ ကောင်းစွာနှိပ်ကေ၊ တံဆိပ်ခတ်လို့၊ မင်းမြတ်ဘုန်းကြွယ်၊ သေအချာဖြင့်၊ ရှည်ကြာမှတ်အောင်၊ ထားလတ်တေလေး။

(၁၈) ထားလတ်ငြားကေ၊ စန္ဒြားရာဇာ၊ အာနန္ဒာလျှင်၊ ဘာသာကောင်းကျိုး၊ စည်ပင်သာအောင်၊ ပြည်ရွာကျိုးကို၊ အားကြိုးစိတ်ကြံ၊ လုံ့လသန်၍၊ စီမံပြုလစ်၊ ရှိဘုန်းကံကြောင့်၊ နန်းစံစိုးကေ၊ ဆယ့်ကိုးနှစ်တွင်၊ သက္ကရာဇ်ကောဇာ၊ တွက်စစ်ခါဝယ်၊ ငါးရာတဆယ်၊ ခုနှစ်ကယ်တွင်၊ ကံခေဆိုးလှ၊ မြတ်ရာဇာမှာ၊ နတ်ရွာကြွသော်၊ သားလှသက်နှံ၊ တိုင်းနိုင်ငံကို၊ ပိုင်စံစိုးဘိ၊ ထူးကဲလွန်၍၊ ဘုန်းကံဟိကေ၊ သီရိစန္ဒြား၊ တသာဂီကေ၊ ဇာနီဖွားမှာ၊ သက်ထားကြင်ယာ၊ သာဝိတာဟု၊ တောင်ညာနှမ၊ နတ်ဆင်းညီကေ၊ ဒေ၀ီလှကို၊ ကဉ္စနမာလာ၊ ဘွဲ့သညာဖြင့်၊ တင်ကာမြှောက်ထား၊ အတန်တန်လေ၊ မတ်ဝန်များနှင့်၊ ခစားရံပတ်၊ ညီးလူလူဖြင့်၊ ထီးဖြူမိုးကေ၊ အုပ်စိုးလတ်လို့၊ လွှမ်းပတ်ကျော်လစ်၊ နန်းဘုံပျံမှာ၊ စံသည်နှစ်ကို၊ ရွီစစ်တွက်ကျုံး၊ နှစ်လေးဆယ်နှင့်၊ စွန်းဝယ်သုံးတွင်၊ ရှိထုံးစဉ်လာ၊ နှစ်ကောဇာလျှင်၊ ငါးရာခြောက်ဆယ်၊ ရောက်ခါဝယ်တွင်၊ သုံးသွယ်ပိဋကတ်၊ စောဗုဒ္ဓါ၏၊ မြွက်ခါထုတ်ကေ၊ မုက္ခပါတ်ကို၊ ပြီးပြတ်စုံစွာ၊ ကြီးချပ်မှာ၌၊ သံဃာများမြောင်၊ ပေါင်းနှစ်ထောင်နှင့်၊ ရွတ်ဆောင်ကျန၊ မြောက်ချိန်ခါဝယ်၊ ငါးရာခြောက်ဆယ်၊ ရောက်လတ်ပေကေ၊ ထိုသည်သက္ကရာဇ်၊ ခန်းကြုံပါကေ၊ ကောဇာနှစ်ကို၊ ဖြိုပစ်ပြီးခါ၊ တစ်သင်္ချာမှ၊ စကာရွီလစ်၊ တက်ပွားပါကေ၊ ကောဇာသစ်လျှင်၊ တွက်စစ်နှစ်ဆယ်၊ ကိုးခုကေတွင်၊ ဘုန်းကြွယ်ရာဇာ၊ စုတိပြန်၍၊ နတ်ထံကြွသော်၊ သိင်္ဂစန္ဒြား၊ သားသက်နှံလျှင်၊ နန်းစံငြားလို့၊ ညာထားနှမ၊ သွန်းရုပ်ဟန်သို့၊ သုဝဏ္ဏနှင့်၊ တူကွမကွာ၊ တိုင်းရက္ခာကို၊ အာဏာဖြန့်မိုး၊ ချုပ်အချာဖြင့်၊ အုပ်ခါစိုးလို့၊ အမျိုးဘာသာ၊ သာသနာကို၊ လွန်စွာမြှောက်စား၊ မြို့ပြည်ရွာလျှင်၊ သာယာငြားအောင်၊ ဆယ်ပါးဓမ္မ၊ ရှိစဉ်လာကေ၊ ရာဇာထုံးကို၊ နှလုံးမျှ၍၊ သင်္ဂဟလေးတန်၊ ဒါန၀ှမ်၍၊ နန်းစံစိုးမြောက်၊ နှစ်ကြာရှည်ကေ၊ ခြောက်ဆယ်ခြောက်တည်း၊ ထိုနောက်တဖြာ၊ နှစ်ကောဇာကား၊ ပဉ္စာန၀၊ ရောက်သောခါ၌၊ ဇရာကျလို့၊ ရာဇဘုရင်၊ ကုသိုလ်ဟုန်လျှင်၊ ကုန်ကာခန်းကေ၊ နတ်နန်းဝင်လို့၊ ထိုပြင်နောက်မှ၊ နှုံးမတန်အောင်၊ ဘုန်းကံပကေ၊ စူဠစန္ဒြား၊ တွင်မည်ဆိုကေ၊ ထိုမင်းသားမှာ၊ ညာထားနှမ၊ တိုက်လေးဆောင်မှာ၊ ကိုယ်ရောင်ပကေ၊ စန္ဒဒေ၀ီ၊ မဟေသီနှင့်၊ ရွှီစီဘုံနန်း၊ မှူးမတ်ဝန်ရို့၊ ပတ်ရံဝန်းကေ၊ စံမြန်းပျော်ရာ၊ တရံခါတွင်၊ ရာဇာမင်းဖျား၊ ဦးရစ်နာလျှင်၊ ဖြစ်လာငြား၍၊ ဆီးဝါးစုံစွာ၊ အဖြာဖြာနှင့်၊ ဆရာအများ၊ အတန်တန်လျှင်၊ ကုပြန်ငြားလည်း၊ ဖြစ်ပွားရောဂါ၊ မချမ်းသာသော်၊ ရာဇာဘုန်းဟိ၊ မတ်စုံလင်နှင့်၊ တိုင်ပင်ညှိလို့၊ က၀ိဥာဏ၊ ရွှီတိုင်းဘုံမှာ၊ ဂုဏ်ရောင်ပ၍၊ သာမယဇ္ဇု၊ ဣသျှုတွင်ထား၊ ကျမ်းသုံးဘုံကို၊ တတ်တုံငြားကေ၊ ဟူးရားအကျော်၊ ပုဏ္ဏားတော်ကို၊ ပင့်ခေါ်ယူလျှက်၊ မင်းရာဇာ၏၊ ဇာတာကွက်ကို၊ တွက်ချက်သောခါ၊ ဗြဟ္မဏာကေ၊ ဆရာမြတ်မှာ၊ ဟောလတ်ရာကား၊ မဟာတေဇ၊ ဘုန်းတော်ဟိန်နှင့်၊ ထိန်ထိန်ပကေ၊ မင်းလှဘုန်းကြွယ်၊ လွန်စည်ပင်၍၊ ရွှင်မညီးကေ၊ သင်းထွီးပြည်တွင်၊ ရှိဝေတ၀၊ အကုသိုလ်လေ၊ ပိုမိုကြီးကေ၊ ခွီးဖြစ်ခလို့၊ သီသတွင်ပြန်၊ ဦးဂေါင်းခွံကို၊ ပင်သန်ရိပ်ဝန်း၊ မြညောင်ညိုလျှင်၊ မျိုကာလွှမ်းလို့၊ ကုန်ခန်းဆောင်းလ၊ ရွက်ကျင်ပြန်၍၊ ဂိမှာန်တွင်းမှာ၊ လီပြင်းထသော်၊ ကိုင်းမခက်သံ၊ ဘယ်ညာလန်၍၊ လှုပ်ပြန်တုံကြ၊ သို့တွက်တာကြောင့်၊ ရောဂါရလို့၊ လျှင်ဆွမကြာ၊ ဦးရစ်နာလေ၊ ရောဂါကောင်းရီး၊ ပင်ညောင်ညိုကို၊ ဖျက်ဖြိုလှီး၍၊ မီးနှင့်လည်းတိုက်၊ ဖွီးဖွီးဖြူ၍၊ ပြာပုံဖြစ်လျှင်၊ စင်စစ်မှန်စွာ၊ ဤအနာမှာ၊ ကောင်းပါလိမ့်မည်၊ မင်းဘုရင်ကို၊ ဦးတင်မြှောက်လို့၊ လျှောက်လတ်ပေသော်၊ ဌာနေသီရိ၊ သင်းထွီးပြည်ဟု၊ အမည်ဟိကေ၊ ဘုမ္မိသုဝံ၊ ရွှီတိုင်းဖောင်မှာ၊ မြရောင်လွှမ်းကေ၊ ညောင်နန်းထံသို့၊ လျှင်မြန်မကြာ၊ မြတ်ဗိုလ်တာဖြင့်၊ ရံကာပတ်ဝန်း၊ လှီနာဝါဖြင့်၊ ချီကာလှမ်းလို့၊ ထူးဆန်းတင့်တယ်၊ များလူသျှင်ရို့၊ ရွှင်မညီးကေ၊ သင်ထွီးပြည်တွင်၊ ရောက်ပေတုံလစ်၊ ပင်ညောင်ညိုကို၊ လှဲဖြိုပစ်လို့၊ မီးတိုက်ပြီးထွေ၊ မိမိပြည်ကို၊ ပြန်သည်ကာလ၊ သမုဒ်ကျယ်ကေ၊ ပင်လယ်ဝတွင်၊ ပြင်းပြလီဟုန်၊ တိုက်လတ်တုံသော်၊ ဗလုံထိုးကြွ၊ ကျွတ်ကျွတ်ဆူ၍၊ ယက်ဖြူဆိုင်းကေ၊ လှိုင်းကြီးထလို့၊ များလှရာထောင်၊ လှီများမြောင်နှင့်၊ ဘုန်းခေါင်စောထီး၊ စီးကာပျော်ရေ၊ လှီတော်ကြီးမှာ၊ ပျက်စီးမြုတ်နစ်၊ သမုဒ်ကျယ်ကေ၊ ပင်လယ်မြစ်မှာ၊ ဧကရာဇ်ဘုန်းကြွယ်၊ သက်ခန္ဓာလေ၊ ရီမှာတုံးကေ၊ ဆုံးလီရေလေး။

(၁၉) ဆုံးပျက်ပါကေ၊ ရာဇမင်းလှ၊ နန်းစံလီကေ၊ သတ္တိသနှင့်၊ သက်ကားငါးဆယ်၊ ခြောက်နှစ်ကယ်တွင်၊ ရောက်သည်ကောဇာ၊ သက္ကရာဇ်ကို၊ တွက်စစ်ပါသော်၊ ဧကာတိအစ်၊ ကိန်းသင်္ချာလျှင်၊ မှန်စွာဖြစ်လို့၊ မြနှစ်ပုံချီ၊ မဟာဆွီကေ၊ ဇာနီမှန်ငြား၊ ဘုန်းတော်ဖြာ၍၊ အာဏာလွှမ်းကေ၊ စန္ဒြားဟု၊ ထင်ရှားကျော်မြောက်၊ ပြည်ရခိုင်မှာ၊ မည်မပျက်ဘဲ၊ ကိုးဆက်မြောက်တွင်၊ ပြတ်တောက်ပြီးထွေ၊ မြို့ဝေသာမှာ၊ ထိုခါတုံးကေ၊ ဆုံးလီရေဟု၊ ကျော့မေနှမ၊ ပန်းဖြူအောင်လေ၊ ပျိုမောင်ချောကို၊ ပြောလတ်ကလျှင်၊ လှပ၀င်းပြောင်၊ ပန်းဖြူအောင်က၊ ဇောင်လည်းတသွယ်၊ သိလိုရာကို၊ ခွဲကာခြမ်း၍၊ မီးမြန်းရေကား၊ တင့်တယ်သန့်ယှင်း၊ လှမေပျို၏၊ ပြောဆိုခြင်းနှင့်၊ မိုးတွင်းအခါ၊ မောင်ရို့ရွာက၊ ကျမ်းစာတတ်လှ၊ သက်ကြီးအိုကေ၊ မောင်ညိုဘ၏၊ ပြောပြခြင်းရာ၊ ၀တ္ထုပုံမှာ၊ မူလျှင်ကွဲကေ၊ နည်းနည်းကွာဟု၊ ထိုခါကာလ၊ ကွဲခြင်းရာကို၊ ထောက်ကာပြလျှင်၊ ယှင်းပါရစီ၊ ရွှီရုပ်သွင်သို့၊ သဇင်ခက်ကေ၊ မောင်သက်ဝီဟု၊ မေရွှီနှမ၊ နှုတ်သံချိုနှင့်၊ ပြောဆိုပြလျှင်၊ မေလှပြောကျင်၊ ရာဇ၀င်၌၊ ဘုရင်မင်းဖျား၊ ဘုန်းတော်ရောင်ဖြင့်၊ တောက်ပြောင်ရွှမ်းကေ၊ စန္ဒြားလျှင်၊ ကြီးများကျယ်စွာ၊ မြစ်သီတာတွင်၊ နာဝါကွဲအက်၊ သက်ခန္ဓာလျှင်၊ ရီမှာပျက်ဟု၊ ဆိုချက်တ၀၊ သက်ကြီးအိုကေ၊ မောင်ညိုဘကား၊ တေဇလျှံကြွား၊ စန္ဒြားကို၊ နဂါးရာဇာ၊ နှစ်ယူကာဖြင့်၊ သဲချာသက်မျှ၊ ယဉ်နုနယ်၍၊ ရွယ်မကြီးကေ၊ သမီးလှနှင့်၊ တူကွနှစ်ဖြာ၊ ဘောဂပြည်လေ၊ ဌာနေရပ်မှာ၊ လက်ထပ်ခါဖြင့်၊ ဟိပါလီရေ၊ သက်ကြီးအိုကေ၊ မောင်ညိုဘက၊ ပြောပြပေလို့၊ ဤသည်နှစ်ဝ၊ စကားလာမှာ၊ ခြားကွာကြဟု၊ မောင်ကပြောခါ၊ သိန်းကျော့ဝေလေ၊ မေအလှမှာ၊ ယှင်းပြရာကား၊ ကမ္ဘာလောက၊ တိုင်းနိုင်ငံလေ၊ အနန္တတွင်၊ များစွဖြာဖြာ၊ ခပ်သိမ်းသူလေ၊ လူအများ၏၊ စကားမှာ၌၊ စဉ်လာတနှုံး၊ ပြောကြပေကေ၊ မြို့ပြည်လုံးနှင့်၊ ရပ်သုံးရွာသုံး၊ နန်းလယ်တွင်မှာ၊ ဘုရင်သုံးဟု၊ ဆိုထုံးဟိရာ၊ ယခုမှာ၌၊ ဆိုကာထားကေ၊ စကားလာလျှင်၊ ရာဇာမင်းသုံး၊ ဆန်းအယဉ်ကေ၊ နန်းစဉ်ထုံးဖြင့်၊ ရွှီဘုန်းထင်ရှား၊ စန္ဒြားကေ၊ မင်းဖျားဘုရင်၊ ဘောဂပြည်လေ၊ ဌာနေနန်းမှာ၊ စံမြန်းသျှင်ဟု၊ စာတင်ထားလို့၊ ရှည်လျားနှစ်တာ၊ ခေတ်များစွာလျှင်၊ ကြာကာပြောင်းရွှိ၊ နောက်နောင်လာကေ၊ ပညာဟိဟု၊ က၀ိဆရာ၊ အဖြာဖြာရို့၊ ကဗျာရတု၊ ဧအံဆို၍၊ ထိုဝတ္ထုကို၊ ပြုစုသောခါ၊ စာနဂိုမှာ၊ အပိုသွင်းလို့၊ ရွီးခြင်းရာကြောင့်၊ ပမာတင်အပ်၊ ရွှီသိင်္ဂီကို၊ ဖိုမှာနှောကေ၊ ကြီးရောစပ်ယောင်၊ နောက်ထပ်တဖြာ၊ ဥပမာနှင့်၊ တူစွာသဘော၊ မုယောတန်လေ၊ ဆွမ်းဆန်ဖွီးမှာ၊ ကြွက်ချီးရောယောင်၊ အဟောရှိလွန်၊ သမိုင်းမှန်မှာ၊ ပိုလျှံမုသား၊ လူများစွာရို့၊ နာသာငြားအောင်၊ နဂါးနန်းဘုံ၊ ယခုဆိုကေ၊ ထိုမင်းဖျားမှာ၊ စံစားလှုံဟု၊ တဖုံတနည်း၊ ရာဇ၀င်မှာ၊ စာတင်ကွဲလို့၊ မှားလွဲပိုလွန်၊ ရွီးထားဟန်ကို၊ ပန်းတန်ယဉ်နွဲ့၊ မောင်ပျိုဖြူမှာ၊ မယုံကဲ့နှောင့်၊ ထိုသည့်ထုံးမူ၊ အလုံးစုံကို၊ ယုံသူတချို့၊ မယုံသူလေ၊ လူတချို့နှင့်၊ နှစ်မျိုးကွဲပြား၊ ပြည်ရခိုင်လေ၊ မဏ္ဍိုင်တွင်းမှာ၊ အငြင်းပွားရေ၊ အမှားအမှန်၊ သိစီရန်ကို၊ တဖန်နည်းငယ်၊ နတ်ဆင်းယောင်သို့၊ မောင်ပန်းကုံးကို၊ ယှင်းအုံးမည်လေ၊ ကြာရှည်နှစ်တာ၊ ဟိသောခါတွင်၊ မဟာစောထီး၊ ပြင်းအာဏာနှင့်၊ မင်းဘာကြီးလျှင်၊ ထိန်ညီးတေဇာ၊ တိုင်းနိုင်ငံကို၊ ပိုင်စံမိုးလို့၊ အုပ်စိုးခါတွင်၊ ရာဇာမင်းဘုန်း၊ နန်းရိပ်မြိုင်မှာ၊ လက်ကိုင်သုံးကေ၊ တိုင်းလုံးကျော်စွာ၊ ဆီးဆရာဟု၊ ကြီးစွာဂုဏ်ဟိတ်၊ သီတင်းဝှန်းကေ၊ နန်းတံဆိပ်နှင့်၊ ပဏ္ဍိတ်ကျော်ခေါင်၊ ဓာတ်များစွာကို၊ ခွဲကာစမ်းကေ၊ ပေါ်ထွန်းအောင်လျှင်၊ နောက်နောင်ရှည်လျား၊ ရခိုင်ပြည်မှာ၊ လူငယ်များရို့၊ သိကြားစီမှု၊ ဆန်းတဖန်လေ၊ ကျမ်းဂန်ပြုကေ၊ ဓာတုစိန္တာ၊ အမည်ဆိုကေ၊ ထိုသည်ကျမ်းက၊ ညွှန်းပြရာတွင်၊ ကမ္ဘာမဟီ၊ ကုန်းထက်မြီမှာ၊ တူညီကျက်စား၊ သတ္တ၀ါလေ၊ ထောင်ရာများနှင့်၊ လူသားတတန်၊ တိရိစ္ဆာန်ရို့၊ ရုပ်နာမ်နှစ်ရပ်၊ တည်မြဲပြန်၍၊ ရှင်သန်လတ်အောင်၊ နှမ့်စပ်များစွာ၊ ဤကမ္ဘာတွင်၊ ဇီဝါဓာတု၊ ငွေ့ရည်စိုကေ၊ ထိုဓာတ်စုလျှင်၊ ရီထုအောက်ဆိုင်၊ လီဝါယာနှင့်၊ သွင်းကာဖောက်ကေ၊ မရောက်နိုင်၍၊ တောမြိုင်ကျက်စား၊ တိရိစ္ဆာန်ကေ၊ ပိုးနှံများနှင့်၊ လူသားရို့သည်၊ ရီအောက်မှာလျှင်၊ ခန္ဓာသက်ကေ၊ ဆုံးပျက်တေဟု၊ အတည်တကျ၊ ဓာတ်ကျမ်းမှာလျှင်၊ ရွီးကာပြလို့၊ ဘောဂဌာနေ၊ ရီအောက်မှာ၌၊ တည်ကာထားကေ၊ နဂါးပြည်တွင်၊ ဘုန်းကြွယ်မင်းဖျား၊ တအေကာမှာ၊ တေဇာလွှမ်းကေ၊ စန္ဒြားလျှင်၊ နဂါးသမီး၊ နန်းဘုံပျံမှာ၊ လှစံသီးနှင့်၊ ပျော်မှီးစပ္ပါယ်၊ ဟိပါရေဟု၊ ဆိုပေတုံငြား၊ ယုတ္တိယုတ္တာ၊ မဟိပါဘဲ၊ ဆိုရာများကို၊ ပျိုထွားပန်းဖြူ၊ ကြားပြန်တုံလည်း၊ မယုံပါကဲ့၊ ရှိစာရို့ကို၊ အပိုချဲ့လို့၊ ရွီးခဲ့သည်သာ၊ သိန်းကျော့ဝေလေ၊ ပျိုမေချောက၊ ပြောသောခါတွင်၊ ၀မ်းသာရွှင်ပြ၊ ပန်းဖြူအောင်လေ၊ ပျိုမောင်ချောမှာ၊ သဘောကျလို့၊ နှမကျော့ဝေ၊ ယုတ္တိဖြာ၍၊ ရှည်ကြာလှအောင်၊ ယှင်းပြပေ၍၊ မောင်ဝေထင်လင်း၊ ဤပုစ္ဆာကို၊ သင်္ကာကင်းလို့၊ ယှင်းလတ်ပါပြီ၊ နောက်ဆက်ခါဖြင့်၊ ကြောင်းရာများကို၊ ကြားရစီဟု၊ ဆိုလီပြန်ကေ၊ သိန်းကျော့ဝေလေ၊ မေအလှမှာ၊ မျက်စချိုမော၊ သမိုင်းစဉ်ကို၊ စဉ်မပျက်အောင်၊ ဆက်လို့ပြောရေ။

(၂၀) ဆက်ပြောပြန်ကေ၊ လှီမြန်စီးကာ၊ ဖီးရန်စွယ်ကို၊ ကာကြွယ်ပြုဖို့၊ ရှိဦးလာကေ၊ သေနာမတ်စစ်၊ စွမ်းရည်သန်ကေ၊ ထမ္မရာဇ်လျှင်၊ လျှပ်စစ်လီယောင်၊ မီးခိုးမှောင်သို့၊ တိမ်တောင်ညိုမြ၊ သမုဒ်ကျယ်ကေ၊ ပင်လယ်ဝတွင်၊ မြင်ရတုံပြန်၊ သံကျော်ကျော်နှင့်၊ အော်ကာဟစ်လို့၊ ပြောလိုက်ဟန်ကား၊ လှီမြန်တော်သား၊ ရှိတပ်ချီကေ၊ ဗိုလ်ခြီများရို့၊ ကြီးမားလှစွာ၊ အဏ္ဏ၀ါလေ၊ သီဒါတွင်းမှာ၊ လီပြင်းလာမည်၊ သို့ဖြစ်ပေ၍၊ ခုဝယ်လျှင်လျှား၊ စီးလာပြန်ကေ၊ လှီမြန်များကို၊ တအားခတ်ကာ၊ မြစ်ကမ်းယံကို၊ အမြန်ကပ်အောင်၊ ကူးခတ်ပါဟု၊ သေနာဦးစီး၊ ဟစ်အော်ကာဖြင့်၊ အာဏာပီးသော်၊ လှီကြီးလှီငယ်၊ စီးကြပေကေ၊ စစ်သည်စစ်မှူး၊ မြစ်ကမ်းယံသို့၊ အားမာန်တင်းကေ၊ အပြင်းကူးလို့၊ အားလုံးစုံစွာ၊ ရောက်သောခါတွင်၊ လွန်စွာပြင်းလစ်၊ သမုဒ်ကျယ်ကေ၊ ပင်လယ်တွင်းမှာ၊ လီပြင်းတိုက်လို့၊ မဖြစ်အန္တရာယ်၊ ရဲမက်တော်လေ၊ ဖော်တသင်းမှာ၊ လွတ်ကင်းချေ၍၊ ထိုသည်ကာလ၊ လီပြင်းဟုန်လေ၊ ရပ်တုံကလျှင်၊ သေနမဟာ၊ မင်းရာဇာကို၊ မျှော်ကာစောင့်လျှက်၊ ထိုနီရာတွင်၊ ထွက်ခါစစ်ကေ၊ ခုနစ်ရက်ထိ၊ ကုန်းနှင့်ရီစပ်၊ မြစ်ကမ်းသာမှာ၊ ခြီရာထပ်အောင်၊ ရှာလတ်သောခါ၊ ဘုန်းရောင်ဖြာကေ၊ ရာဇာတုလွတ်၊ စီးကာပျော်ကေ၊ လှီတော်မြတ်လျှင်၊ ကွဲပြတ်ပိုင်းကာ၊ သမုဒ်ရီလေ၊ ကမ်းခြီစပ်မှာ၊ တွိလတ်ပါသော်၊ ထိုခါပြီးမှ၊ ပြည်ကြီးသျှင်လေ၊ သဇင်ကုံးကို၊ အဆုံးချလို့၊ တိုင်းမအောင်ချာ၊ မြို့ဝေသာကို၊ ပြန်လာတုံကြ၊ အာဂျိတ်ဆိုကေ၊ ထိုသည်ကျွန်းက၊ စခန်းချလျှက်၊ စန္ဒဒေ၀ီ၊ မဟေသီဟု၊ ကျော်ညီထင်ရှား၊ ရွှီနန်းတော်မှာ၊ စံပျော်ဟိကေ၊ မိဖုရားကို၊ လျှင်လျှားတလီ၊ ကြောင်းခြင်းဟန်ကို၊ တမန်များနှင့်၊ လျှောက်ကြားစီသော်၊ ဒေ၀ီအလှ၊ ဆွဆွခုန်၍၊ ယမ်းပုံထဲမှာ၊ မီးခဲကျသို့၊ ဒေါသဖြစ်ကာ၊ အကောက်ကြံ၍၊ စိတ်မာန်ပြင်းနှင့်၊ ပြောခြင်းရာကား၊ ရာဇာဘုန်းကြွယ်၊ သင်းထွီးပြည်သို့၊ လားမည်ပြုခါ၊ စကားဆိုလျှင်၊ မေကိုညွှန်းကေ၊ သုံးခွန်းမှာရေ၊ ပြည်ရွာထံမှောက်၊ မောင့်သက်နှံလျှင်၊ ပြန်မရောက်က၊ မင်းမြှောက်အံ့ငှာ၊ အလောင်းရှာသော်၊ မောင်သာဆင်လတ်၊ န၀ရတ်ကေ၊ လက်စွပ်နှင့်မူ၊ တန်သောသူကို၊ မင်းမူစီအပ်၊ နောက်တဖန်လျှင်၊ ပြောပြန်လတ်ကေ၊ လက်စွပ်တန်သူ၊ အဖန်ဖန်လျှင်၊ ရှာကြံကြ၍၊ မရမူလျှင်၊ ရွှီဘုံနန်းထဲ၊ မောင်လျှင်ကိုင်ကေ၊ နန်းစဉ်လှဲကို၊ ဆွဲကာလွယ်ကူ၊ တင်နိုင်သူကို၊ မင်းပြုပါစီ၊ နောက်တလီလျှင်၊ မှာသည်စကား၊ ညာနန်းစံမှာ၊ သန္ဓေသားကို၊ မြင်ဖွားတုံပြန်၊ အရွယ်တန်ကေ၊ နိုင်ငံတိုင်းမ၊ ဘအမွီလေ၊ ရွှီကြငှန်းကို၊ စံမြန်းရယောင်၊ လှမေခေါင်မှာ၊ ကြံဆောင်မစ၊ သားသက်ဝီကို၊ ပီးလီရမည်၊ နန်းဘုံသာမှာ၊ အာဏာမှတ်လို့၊ မိန့်လတ်တေခါ၊ (အမစွာလေ)၊ သေနာပတိ၊ မတ်မဟာလျှင်၊ ရာဇာပါးမှာ၊ ခစားဟိလို့၊ ကြားသိလတ်ရာ၊ မင်းမြတ်စွာနှင့်၊ ငါရာစင်စစ်၊ လုံးရပ်ညီကေ၊ တူသည်ဖြစ်၍၊ ရွှီနှစ်သိင်္ဂါ၊ ရတနာလေ၊ ရာဇာလက်စွပ်၊ သူ့လက်ကြွယ်မှာ၊ တန်မည်မှတ်လို့၊ မင်းမြတ်ကိုသာ၊ အဏ္ဏ၀ါတွင်၊ လွန်စွာရက်စက်၊ ရုပ်ခန္ဓာကို၊ ဖျောက်ခါဖျက်လို့၊ အရှက်မဟိ၊ မင်းပြုရန်ဟု၊ စိတ်ကြံဟိကေ၊ ဆိုးဘိယုတ်မာ၊ မတ်မိစ္ဆာလျှင်၊ လိမ်ကာလှည့်လျှက်၊ အကောက်ညာဏ်နှင့်၊ တမန်ဆက်ဟု၊ သွက်သွက်လည်းခါ၊ စိတ်မာန်ပါ၍၊ ကမ္ဘာမကြီ၊ ငါမသီကေ၊ မနီစီရ၊ မြို့တိုင်းပြည်က၊ နှင်မည်ပဟု၊ မေလှတောင်ညာ၊ ကြိမ်းဝါးရာကို၊ သေနာထွတ်ထား၊ မတ်တော်ဝန်မှာ၊ နာခံပြင်းအောင်၊ သတင်းကြားလို့၊ ရှက်အားလည်းကြီး၊ တိုင်းမြို့ခွင်က၊ ကြင်မယားနှင့်၊ သားသမီးကို၊ ခေါ်ပြီးယူလျှက်၊ စစ်သေနာနှင့်၊ မြစ်ညာထက်ကို၊ ဆန်တက်ဝီးစွာ၊ သင့်မြတ်ရာမှာ၊ မြို့ရွာတည်ချ၊ များဗိုလ်ခြီနှင့်၊ နီလီကြသော်၊ တိုင်းမအောင်ချာ၊ မြို့ဝေသာမှာ၊ ရာဇာကင်းဘိ၊ ဆောင်ချက်လယ်ကေ၊ ရဝေတွင်းမှာ၊ မင်းမဟိသော်၊ မူးကြီးမတ်ရာ၊ အဖြာဖြာနှင့်၊ တောင်ညာထွတ်ထား၊ ညီလာဝင်၍၊ တိုင်းပင်ငြားလို့၊ စန္ဒြားမင်းမွန်၊ အပ်ခဲ့ပြန်ကေ၊ ပြည်တန်ဖိုးမြတ်၊ ရောင်ဝင်းစိုကေ၊ ထိုလက်စွပ်နှင့်၊ စမ်းသပ်ပြီးခါ၊ မြို့ဝေသာတွင်၊ ပတ်ကာလည်လှည့်၊ အကြိမ်ကြိမ်လျှင်၊ အိမ်မလွတ်အောင်၊ စွပ်လို့ကြည့်လည်း၊ ၀င်းလဲ့ထိန်လျှံ၊ လက်စွပ်ပျံနှင့်၊ တန်သူမဟိ၊ ရက်လကြာအောင်၊ ရှာမတွိသော်၊ မြို့ကြီးကခွာ၊ တောရပ်ရွာတွင်၊ လည်ကာပတ်ထွေ၊ မင်းလောင်းလျာကို၊ ခါမပြတ်ကေ၊ ရှာလတ်တေလေး။

(၂၁) ရှာလတ်မယေတုံကြ၊ မြရောင်ဝီ၍၊ နဒီမြစ်ကေ၊ ဂစ္ဆပဟု၊ နာမတွင်စွာ၊ ထက်အညာသို့၊ တက်ကာချီလှမ်း၊ ရက်မခြာဘဲ၊ လက်ယာကမ်းတွင်၊ စုံစမ်းပြီးခါ၊ အရွာရွာမှာ၊ ခါခါပတ်လှည့်၊ လူများစွာ၏၊ လက်မှာစွပ်ကေ၊ ၀တ်လို့ကြည့်လည်း၊ ၀င်းလဲ့ရောင်လျှံ၊ လက်စွပ်ပျံနှင့်၊ တန်သူမရ၊ မတ်ထိုထိုမှာ၊ ရှိကိုမှန်းကေ၊ လှမ်းလို့ကြွသော်၊ ညိုမြရီမှောင်၊ မီးချောင်းခေါင်ကေ၊ (မြောင်သောင်ဖျားက)၊ ၀ါးများစွာကို၊ ထမ်းလာငြားကေ၊ မြိုသားဖဟု၊ အမရတူ၊ အမရကူနှင့်၊ ပဲဖြူတွင်မှတ်၊ သုံးယောက်လူကို၊ ခေါ်ယူလတ်၍၊ စွပ်ကြည့်တုံပြန်၊ သုံးယောက်ဝယ်၏၊ လက်ကြွယ်များမှာ၊ အားလုံးတန်လို့၊ မြင်ပြန်တုံကြ၊ မတ်များစွာနှင့်၊ လာသူများမှာ၊ လွန်အားရ၍၊ တိုင်းမချက်ချာ၊ မြို့ဝေသာကို၊ ခေါ်လာပြီးမှ၊ အမရတူကို၊ ထီးဖြူအောက်မှာ၊ မင်းမြှောက်ကြလို့၊ ညီလှဖြစ်သူ၊ အမရကူကို၊ ဆောင်ယူခြားသီး၊ အိမ်ရှိစံကေ၊ နန်းရံပီး၍၊ အိမ်ရှိရာဇာ၊ မင်းညီစင်မှာ၊ မြင်မ၀ကေ၊ သားလှပဲဖြူ၊ ချစ်သဲအူကို၊ ခေါ်ယူတထပ်၊ မြောက်ဦးရွာမှာ၊ ကောင်းစွာထားကေ၊ ပိုင်စားအပ်လို့၊ နန်းမြတ်စံကာ၊ သုံးနှစ်ကြာသော်၊ ရာဇာထိုမင်း၊ အမရကူလေ၊ ညီဖြူရင်းကို၊ စိတ်တွင်းတမူ၊ နန်းထီးဖြူကိုိ၊ လုယူမည်မှတ်၊ ၀င်္ဂဥာဏ်နှင့်၊ အကြံမှားကေ၊ လှည့်ဖျားသတ်လို့၊ စံလတ်သည်ဖြစ်၊ ခုနစ်နှစ်တွင်၊ ပြောင်းလိုက်ခန္ဓာ၊ စုတေ့ပါ၍၊ နောက်မှာတမူ၊ နန်းမွီယူကေ၊ ပဲဖြူစံပေ၊ နန်းသက်ဝေကား၊ တဆယ့်ခုနစ်၊ စံပြီးခါတွင်၊ ခန္ဓာတုံးကေ၊ ဆုံးသည်ဖြစ်၍၊ တနှစ်ကြာဘိ၊ မြို့ဝေသာလေ၊ ပြည်ရွာတွင်းမှာ၊ မင်းမဟိကေ၊ ကြွင်းဘိတုံထ၊ ဝေသာပြည်၏၊ ကြာသည်နှစ်ကို၊ တွက်စစ်ပြသော်၊ လေးရာခြောက်ဆယ်၊ ခုနစ်ကယ်၍၊ တသွေမှတ်ပါ၊ နှစ်ကောဇာကား၊ တရာ့ငါးဆယ်၊ ခြောက်ခုကယ်တွင်၊ ရွှီပြည်အောင်ချာ၊ မြို့ဝေသာကို၊ ရှိခါပိုင်ငြား၊ မင်းဘုရင်လေ၊ ဘုန်းအင်ထွန်းကေ၊ စန္ဒြား၏၊ သားလှသက်နှင်း၊ ပြူတိုင်းဘုံက၊ ငတုံမင်းလျှင်၊ များခြင်းလီလီ၊ သောင်းထိဝီအောင်၊ ဗိုလ်ခြီစုပေါင်း၊ ဘအမွီကို၊ ရစီကြောင်းနှင့်၊ လာတောင်းသောခါ၊ မတ်များစွာနှင့်၊ မာတာလှနတ်၊ နန်းထီးဖြူကို၊ အကုန်အပ်သော်၊ သားမြတ်သဲချာ၊ မင်းရာဇာလျှင်၊ ဝေသာကြငှန်း၊ ဘမင်းစံကေ၊ ဘုံပျံနန်းမှာ၊ စံမြန်းတုံရာ၊ တရံခါတွင်၊ ရာဇာဘုရင်၊ စိတ်မရွှင်ကေ၊ အလျှင်ချီကာ၊ ထွက်ကြွလာ၍၊ သိင်္ဂါနဒီ၊ မြစ်ကမ်းခြီသို့၊ ရောက်လီကြပေ၊ စမ္ပဝေဟု၊ အမည်ဆန်းနှင့်၊ မြို့နန်းတည်လို့၊ ထိုစဉ်ကစ၊ သမယကေ၊ ကာလနောက်ဝယ်၊ မြို့ဝေသာမှာ၊ ရာဇာကင်းကေ၊ သုဉ်ဖျင်းရေလေး။

(၂၂) သုဉ်ဖျင်းပေကေ၊ ဤ၀ယ်တခန်း၊ ရပ်ပြီးခါလျှင်၊ ရှိမှာဆန်းသော်၊ မြို့နန်းဌာန၊ စမ္ပေ၀ှက်ကို၊ တည်သည်ကစ၊ သံချိုချိုနှင့်၊ အတိုရုံးကေ၊ ကုံးလို့ပြမည်၊ ရာဇာမှန်ကင်း၊ ပြည်တိုင်းဘောင်မှာ၊ ဘုန်းရောင်လင်းကေ၊ ငမင်းငတုံး၊ မဟာဆွီလေ၊ သာဂီဘုန်းမှာ၊ စုရုံးများစွာ၊ အတန်တန်ကေ၊ မတ်ဝန်များရို့၊ ခစားကာဖြင့်၊ တရာ့ငါးဆယ်၊ ခြောက်ခုကယ်၍၊ ရောက်သည်သက္ကရာဇ်၊ ထိုအခါလေ၊ သိင်္ဂါမြစ်တွင်၊ မြို့သစ်တည်လျှက်၊ တွင်အမည်ကေ၊ စမ္ပေ၀ှက်မှာ၊ နန်းတက်တုံပြန်၊ မြင့်ရှည်ကြာ၍၊ ခန္ဓာယွန်းကေ၊ နတ်နန်းစံသော်၊ တဖန်နန်းတက်၊ ဆက်ခံကာဖြင့်၊ စဉ်လာမြောက်ကေ၊ ဆယ့်ခြောက်ဆက်တည်း၊ ရွီတွက်သင်္ချာ၊ စကာတည်၍၊ ကြာရှည်လျှားကေ၊ မြို့သက်မှာကား၊ သုံးရာကိုးနှင့်၊ သက္ကရာဇ်ကို၊ တွက်စစ်ပြန်သော်၊ လေးရာကျော်၍၊ စွန်းပေါ်ခြောက်ဆယ်၊ ငါးခုကယ်တွင်၊ ဌာနေကနက်၊ မင်းနီပြည်လေ၊ စမ္ပေ၀ှက်မှာ၊ နန်းတက်စံဟိ၊ အဆုံးစွန်တွင်၊ ဘုန်းကံဖျင်းကေ၊ မင်းပတိကို၊ သောင်းထိဝီကာ၊ ခြွီရံပါသည်၊ လက်ယာမင်းနန်၊ လက်ရုံးထောင်၍၊ ရအောင်တိုက်ကေ၊ သိမ်းပိုက်ပြန်၍၊ အလွန်သာစည်၊ မြို့ပရိန်ဟု၊ အောင်မည်ဆန်းကေ၊ ထီးနန်းတည်လို့၊ စံပေကြရာ၊ ထိုမြို့မှာပင်၊ စဉ်ကာစိုးမြောက်၊ မင်းများစွာကို၊ ရွီကာတွက်ကေ၊ သျှစ်ဆက်ရောက်၏၊ ထိုနောက်တသွယ်၊ မြို့သက်ဝယ်ကား၊ လေးဆယ့်ကိုးနှစ်၊ ကိန်းသင်္ချာလေ၊ အမှန်ဖြစ်လို့၊ သက္ကရာဇ်ငါးရာ၊ တခုမှာတွင်၊ ပြိုကာပျက်ပြုန်း၊ မြို့ပရိန်လေ၊ ရွှီကနက်မှာ၊ မင်းဆက်တုံးဟု၊ ချိုပြုံးမျက်နှာ၊ သိန်းကျော့ဝေလေ၊ လှမေချောမှာ၊ ပြောသောခါလျှင်၊ ဆင်းဝါရူပ၊ ပန်းဖြူအောင်လေ၊ ပျိုမောင်လှက၊ နှမပန်းနွယ်၊ လှဆန်းကြယ်၏၊ ပြောသည်စကား၊ ပေါင်းဖြာဖြာလေ၊ ကြောင်းရာများကို၊ မှတ်သားပြီးလျှင်၊ အဆောင်လယ်မှာ၊ မောင်ကြည်နူးကေ၊ ကျေးဇူးတင်ရေ၊ နောက်တွင်တ၀၊ သမိုင်းခံနှင့်၊ မှန်သမျှကို၊ မြွက်ဟချိုသာ၊ သိန်းကျော့ဝေလေ၊ လှမေချောမှာ၊ ဆက်ပြောပါဟု၊ ဝါစာချိုပျား၊ ပျိုနှောင်းစွန်ကို၊ တောင်းပန်ငြားက၊ စကားဆက်ခါ၊ မေအပျိုမှာ၊ မောင်ကိုထပ်လို့၊ ပြောလတ်ရာကား၊ အောင်ချာကြငှန်း၊ မြို့ဌာနီလေ၊ ပရိန်နန်းမှာ၊ သက်တန်းကုန်ခါ၊ ညှိုးမှိန်ပါ၍၊ နောက်မှာတခြား၊ မင်းဖုန်းစားလျှင်၊ တည်ထားစံမြောက်၊ ခြိတ်မြို့ဝယ်၌၊ စိုးသည်မင်းကို၊ စာရင်းကောက်လျှင်၊ ထီးအောက်ပျော်ရွှင်၊ ကြိမ်ဖန်ဖန်လေ၊ စံမပျက်ကေ၊ ဆယ်ဆက်ပင်တည်း၊ နောက်လျှင်တဖြာ၊ မြို့သက်မှာကား၊ အဋ္ဌာစာရ၊ နှစ်ကောဇာကို၊ တွက်ခါပြသော်၊ ငါးရာ့ငါးဆယ်၊ နှစ်ခုကယ်တွင်၊ နတ်ပြည်တနှုံး၊ ခြိတ်မြို့ဝယ်တွင်၊ ထီးစည်ပျက်ကေ၊ မင်းဆက်တုံးလို့၊ ပြိုင်နှုန်းမမြင်၊ မင်းရွှီသင်မှာ၊ ဂုဏ်အင်မချို့၊ များအိမ်ခြီနှင့်၊ ပရိမ်မြို့ကို၊ ထပ်လို့တည်ပြန်၊ နန်းဘုံဆောင်မှာ၊ ဘုန်းရောင်ပကေ၊ အစစံ၍၊ တဖန်နောက်မှ၊ ငနှလုံးကေ၊ အဆုံးကျအောင်၊ ရာဇဆယ်ဆက်၊ စံမြန်းလှုံကေ၊ ဂုဏ်မချို့ဘဲ၊ မြို့အသက်ကို၊ ရွီတွက်တုံပေ၊ ခါအညီလေ၊ ကြာသည်ဖြစ်ကေ၊ နှစ်ခြောက်ဆယ်လေ၊ တသွယ်မှတ်ပါ၊ ရောက်ကောဇာကား၊ ခြောက်ရာ့တဆယ်၊ နှစ်ခုကယ်တွင်၊ ဂုဏ်ရည်တောက်ထွန်း၊ အောင်ချက်မြီလေ၊ ပရိန်နန်းမှာ၊ ဆုံးခန်းတိုင်ထွေ၊ မင်းရာဇာနှင့်၊ ကင်းကွာပြီးကေ၊ ပျက်စီးရေလေး။

(၂၃) ပျက်စီးပါကေ၊ ထိုခါကာလ၊ ဘုန်းတော်ရောင်ဖြင့်၊ ပြောင်ပြောင်ပကေ၊ မင်းလှရာဇာ၊ မည်သညာမှာ၊ အလော်မာဖြူ၊ လောင်းကြက်ပြည်ကို၊ တည်တုံလတ်ကေ၊ နန်းစိုက်ထူလျှက်၊ မင်းမူသည်မှ၊ နောက်ဆက်ခံ၍၊ နန်းစံများကို၊ တွက်ငြားကလျှင်၊ ရာဇနွယ်မြောက်၊ ထီးအောက်ဝယ်၌၊ စံမ္ပါယ်ခဲ့ကေ၊ တဆယ့်ခြောက်တည်း၊ မှတ်လောက်တဖြာ၊ နှစ်ထွေထွေကို၊ စစ်ချေတွက်ကေ၊ မြို့သက်မှာကား၊ ရာဇာစောလွန်၊ သူရတန်မှာ၊ နီပြန်သည်ဖြစ်၊ ထိုမှပြန်၍၊ စံနှစ်နှစ်နှင့်၊ ပေါင်းလိုက်မလွဲ၊ တရာကယ်၍၊ ငါးဆယ့်လေးဟု၊ အမြဲမှတ်ပါ၊ ရောက်ကောဇာလျှင်၊ ခုနစ်ရာကိုးဆယ်၊ နှစ်ခုဝယ်တွင်၊ ဘုန်းကြွယ်စောမွန်၊ လောင်းကြက်မည်ကေ၊ ရွှီပြည်ရပ်ကို၊ စွန့်လွှတ်ပြန်၍၊ ဂုဏ်ဝှမ်ကဲမိုး၊ ဆောင်ဘုံပျံနှင့်၊ အလွန်ထူးကေ၊ မြောက်ဦးမြို့ကို၊ ဆောက်လို့တည်ပြန်၊ လှတင့်တယ်ကေ၊ မြို့သစ်ပြည်မှာ၊ သုံးနှစ်စံလို့၊ နတ်ထံပြောင်းကြွ၊ မင်းဘုန်းသန်ကေ၊ စောမွန်ကပင်၊ စ၍ရွီတွက်၊ မင်းတန်တန်လျှင်၊ နန်းစံခယ့်ကေ၊ ဆယ့်နှစ်ဆက်တွင်၊ မြို့သစ်မှန်စွာ၊ နှစ်တရာနှင့်၊ ကောဇာသက္ကရာဇ်၊ သျှစ်ရာကယ်၍၊ ကိုးဆယ်နှစ်တွင်၊ တခေတ်ကုန်ဆုံး၊ ရှိဦးစံကေ၊ စောမွန်ဆက်မှာ၊ နန်းသက်တုံးလို့၊ ပျက်ပြုန်းသောခါ၊ နောက်တဖြာကေ၊ ရာဇာစောထီး၊ ဘုန်းတေဇာနှင့်၊ မင်းဘာကြီးလျှင်၊ နန်းထီးနိုင်ငံ၊ ချုပ်အချာဖြင့်၊ အုပ်ခါမိုးလို့၊ စိုးလတ်ပြန်၍၊ စောမွန်ရာဇာ၊ ရှိဦးဆောင်၍၊ တည်ထောင်ခကေ၊ လှပတင့်တယ်၊ နန်းသိင်ဂါနှင့်၊ ရောင်ဝါမြူးကေ၊ မြောက်ဦးပြည်ကို၊ ကြာရှည်နောက်နောင်၊ လွယ်တကူနှင့်၊ ရန်သူဖျက်လို့၊ မပျက်နိုင်အောင်၊ မြင့်ခေါင်ကြီးကျယ်၊ ကျောက်အုဌ်ခံ၍၊ ရန်မဆိုင်းအောင်၊ တံတိုင်းတည်လို့၊ ပြင်ဝယ်တထပ်၊ ကျုံးတန်တန်ဖြင့်၊ ၀ိုင်းရံပတ်၍၊ သေသပ်ခိုင်မာ၊ မြို့နန်းဘုံ၏၊ လုံခြုံမှုကို၊ ပြုပြီးခါတွင်၊ မင်းဘာစောဘုန်း၊ ရှိရာဇာရို့၊ နန်းရာကုန်းကို၊ ပြိုင်နှုံးဖက်ကွာ၊ အဆန်းဖန်၍၊ မွမ်းမံမှုကို၊ ပြုပြီးခါတွင်၊ သိင်ဂါရွှီနန်း၊ မိုးအဆောင်မှာ၊ ကိုးခေါင်ယွန်းနှင့်၊ မြီနန်းလွှတ်ထုံး၊ အတွင်းဝန်နှင့်၊ ပြင်ဝန်များကေ၊ တရားယုံးက၊ ခွန်ထုံးသပြာ၊ ပေါင်းများစွာကို၊ ရှည်ကြာကောင်းနိုး၊ ထက်အခေါင်မှာ၊ သံနှောင်တွဲကေ၊ သရွဲမိုးလို့၊ မင်းမျိုးစံအိမ်၊ မတ်ဝန်အိမ်နှင့်၊ နှောင်အိမ်ချုပ်တန်း၊ ကုန်းအောက်ခြီမှာ၊ စီကာတန်းလျှက်၊ မင်းခန်းတန်တန်၊ ကျင့်ဆယ်ဖြာနှင့်၊ မင်းဘာကြီးမှာ၊ နန်းထီးစံ၍၊ နိုင်ငံကောင်းကျိုး၊ သာသနာနှင့်၊ ဘာသာကျိုးကိုိ၊ သယ်ပိုးဆောင်လစ်၊ နန်းသက်ဝေလေ၊ နှစ်ဆယ့်နှစ်တွင်၊ စွန့်ပစ်ပြည်ရွာ၊ မင်းရာဇာမှာ၊ ခန္ဓာကာယ၊ ချုပ်ပျက်ပြန်၍၊ နတ်ထံကြွသော်၊ သားလှနန်းပိုင်၊ မြီးမြစ်တိုင်အောင်၊ စဉ်ကာစိုးမြောက်၊ မင်းစနီပါ၊ တွက်ရွီထောက်သော်၊ ကိုးယောက်ရာဇာ၊ မြို့သက်မှာကား၊ တရာခုနှစ်၊ ရက်နှစ်ဆယ်လျှင်၊ လွန်သည်ဖြစ်၏၊ သက္ကရာဇ်ကောဇာ၊ တထောင်မှာတွင်၊ မှိန်ကာဆိတ်သုဉ်း၊ နွယ်မဟာလေ၊ မင်းဘာဆက်မှာ၊ နန်းပျက်ဆုံးသော်၊ တိုင်းလုံးကျော်ပြန်၊ ပညာဥာဏ်နှင့်၊ စွမ်းအင်ပြည့်ဝ၊ ကုသလကေ၊ နရပတိ၊ အရာရာတွင်၊ လိမ္မာတတ်ကေ၊ မတ်က၀ိကို၊ ဖြူထီးမိုးကာ၊ ဘိသိက်ထူ၍၊ ဆောင်ဘုံအောက်မှာ၊ မင်းမြှောက်ကာဖြင့်၊ ပြည်ရွာစိုးလစ်၊ ခုနစ်နှစ်လျှင်၊ မင်းဖြစ်တုံထ၊ နောက်တဖန်လျှင်၊ စိုးပြန်ရကေ၊ ဓမ္မရာဇာ၊ နန်းစံမှာလည်း၊ ရှည်ကြာခုနှစ်၊ သက္ကရာဇ်ကို၊ တွက်စစ်ခါဝယ်၊ တထောင်ကယ်၍၊ တဆယ့်လေးခု၊ တိုင်းဌာနီလေ၊ ပြည်မြောက်ဦးတွင်၊ လက်ရုန်းပညာ၊ ဘုန်းရောင်ဖြာကေ၊ စန္ဒသုဓမ္မ၊ ကျက်သရီနှင့်၊ တက်နီကြွသို့၊ ရာဇာဘုရင်၊ ယခုခါတွင်၊ သိင်ဂီနန်းမှာ၊ စံမြန်းရွှင်ဟု၊ ပျိုခင်လှနတ်၊ ရာဇ၀င်မှာ၊ စာတင်ထုံးကို၊ အဆုံးသတ်လို့၊ တန့်ရပ်ပြီးခါ၊ မောင်ရို့မှာလျှင်၊ လွန်စွာဝီးလှ၊ မြောက်ဦးပြည်က၊ လာပေရ၍၊ တူကွနှစ်ဖြာ၊ ခြီလက်နာ၍၊ ညောင်းညာလိမ္မည်၊ စက်မွိရာမှာ၊ ကောင်းစွာမှိတ်ကေ၊ အိပ်ကြပေဟု၊ ဆိုပေပြီးမှ၊ သိန်းကျော့ဝေနှင့်၊ မငွေလှလည်း၊ ထ၍ပြန်ကာ၊ ကိုယ့်အိပ်ရာမှာ၊ ၀င်မှိတ်မသွေ၊ သန်းခေါင်ယံမှာ၊ အသံတိတ်ကေ၊ အိပ်ကတ်တေလေး။

(၂၄) အိပ်ကတ်ပြန်ကေ၊ ကုန်လွန်ထိုည၊ နီအရောင်လျှင်၊ ထိန်ပြောင်ဝင်းကေ၊ မိုးလင်းမှလျှင်၊ နိုးကြသောခါ၊ ဗျာကယာနှင့်၊ အသာထလိုက်၊ ဆားစိုစိုနှင့်၊ သွားကိုတိုက်လို့၊ သစ်ကြမျက်နှာ၊ သန့်ယှင်းစင်ယောင်၊ ကိုယ်တွင်တိုးကေ၊ ရီချိုးကာဖြင့်၊ ညီညာသိမ်းရုံး၊ မြကေဆံကို၊ ဆီကျံထုံးလို့၊ ပိုးတုံးသစ်လွင်၊ ပန်းအထည်ကို၊ ဆန်းကြယ်ငြားအောင်၊ ၀တ်ထားဆင်၍၊ မယ်လျှင်တည်ခင်း၊ ငါးမိစ္ဆာနှင့်၊ ကြိုင်စွာသင်းကေ၊ ထမင်းဘတ္တာ၊ ဘောဇနာကို၊ ၀စွာစားမြောက်၊ ပြီးတုံပေသော်၊ မောင်မေများမှာ၊ ဆီးဝါးသောက်လို့၊ ထိုနောက်ပြီးမှ၊ သိန်းကျော့ဝေနှင့်၊ မငွေလှလည်း၊ ခန်းမဆောင်တွင်၊ အသာဝင်၍၊ ၀တ်ဆင်တုံပြီး၊ သဇင်ခိုင်ကို၊ ကြိုင်ကြိုင်မွှီးအောင်၊ ကျံလိမ်းပြုပျင်၊ ပြီးလတ်ကျင်သော်၊ ဆောင်ခွင်ထဲမှ၊ ပျိုကညာရို့၊ ထွက်လာကြ၍၊ အိမ်မှဆင်းငြား၊ တူပျော်ပျော်လေ၊ သိမ်တော်လမ်းကို၊ လှမ်းလို့လားခါ၊ နီးပါးဝန်းကျင်၊ ပန်းသစ်ပင်ရို့၊ ရှုမြင်မ၀၊ ရွက်ဟောင်းဝါလျှင်၊ ကြွီကာကျ၍၊ စိမ်းမြညိုစွာ၊ ပရစ်ဥနှင့်၊ ရွက်နုလာကေ၊ ငုံအာပွင့်ဖူး၊ ပန်းပွင့်လယ်မှာ၊ ၀တ်ရည်စားကေ၊ ပျားပိတုံးရို့၊ ရုံးရုံးပုံကာ၊ ငှက်များစွာလည်း၊ ဘာသာဘာဝ၊ ဥသြညိုရို့၊ သံချိုမြနှင့်၊ ကျူးကြညိုးညံ၊ ငှက်ဖိုးခေါင်လေ၊ အရောင်စိမ်းကေ၊ ကျီးညိုလှရို့၊ ချိုအသံဖြင့်၊ ဟေမန်ကုန်ဟောင်း၊ နွီရာသီလေ၊ ဂိမှာန်ပြောင်းကေ၊ တပေါင်းမာသ၊ တင့်တယ်ပုံလေ၊ ဟူသမျကို၊ ၀၀ရှုကာ၊ မောင်မေပျိုလေ၊ ထိုလေးယောက်မှာ၊ လမ်းလျှောက်လာ၍၊ ဖြူဝါနီမြန်း၊ လမ်းဘယ်ညာက၊ မာလာပန်းကို၊ လက်လှမ်းဆွတ်ကိုင်၊ စေတနာနှင့်၊ သဒ္ဓါပွား၍၊ လာကြစဉ်တွင်၊ ကတညုတ၊ မြတ်တောင်ခြီကို၊ ရောက်လီကြ၍၊ ပြုပ္ပဒိသာ၊ မင်းရာဇာရို့၊ စဉ်လာတက်ကေ၊ ရှိမျက်နှာက၊ လွန်စွာရိုညွတ်၊ လက်ဦးမျှော်၍၊ တောင်ပေါ်ထက်ကို၊ တက်ကြလတ်၍၊ မြတ်မုနိသျှင်၊ ရှိတော်ပြင်မှာ၊ ပန်းတင်ပြီးမှ၊ အတန်တန်လေ၊ လွန်ကြည်နူးကေ၊ (--------ဆိုင်)၊ သုန္ဒရီကို၊ စသည်မြွက်ကေ၊ ရီစက်တိုင်ဟု၊ သံပြိုင်ဆိုပြီး၊ ခါသုံးဖန်လေ၊ သံညောင်းညောင်းနှင့်၊ ခေါင်းလောင်းတီး၍၊ ထွန်းညီးရောင်လျှပ်၊ မုနိသျှင်လေ၊ ရင်ပြင်ရပ်မှ၊ လှမ်းထွက်ပြီးသော်၊ ကုန်းထိပ်ပေါ်က၊ ရှုမျှော်ကောင်းရာ၊ နိဂုဏ်းရွာနှင့်၊ ဓညာမြို့မ၊ တည်ဟိပြန်ကေ၊ ဟူသမျကို၊ ဒိဋ္ဌတဖန်၊ လက်ညှိုးညွှန်၍၊ မှန်ကန်တိကျ၊ ပန်းဖြူအောင်နှင့်၊ မောင်ထွန်းမြကို၊ အလှနုနယ်၊ သိန်းကျော့ဝေက၊ ပြပေပြီးမှ၊ ရပ်မျက်နှာကို၊ ပတ်ကာလှည့်ကေ၊ ကြည့်ရှုကြ၍၊ ထိုမှဤမှာ၊ အဖြာဖြာကို၊ လေ့လာပြီးသော်၊ မြတ်ကုန်းပေါ်က၊ ပျော်ပျော်ပါးပါး၊ ရိုသေစွာဖြင့်၊ ဆင်းလာငြား၍၊ စည်ကားသာယာ၊ လွန်တင့်တယ်၍၊ ပျော်ဖွယ်ကောင်းကေ၊ ဇီးချောင်းရွာသို့၊ လှည့်လာတုံမြောက်၊ ညချမ်းခါတွင်၊ ပြန်ကာရောက်လို့၊ တန့်ထောက်ပြီးခါ၊ ရီချိုးပါ၍၊ အိမ်မှာတက်ငြား၊ လသာသာနှင့်၊ ညစာစားလို့၊ ဆီးဝါးသောက်လျှက်၊ လပရောင်နှင့်၊ တောင်တန်းဗျင်းကို၊ ထွက်လျှက်တဖန်၊ သပေါက်ဖျာကို၊ ယူကာခင်းကေ၊ လီညင်းခံရေ။

-----------------
ဆက်လို့ဖော်ပြပီးပါမည်

(ရက္ခိတရို့ဆုံရပ်မြီမှ)