ခိုင်အောင်အောင်


ကုလသမဂ္ဂဌါနခွဲတခုဖြစ်တေ ယိုင်ကျေးမှုထိန်းသိမ်းရေ အေဂျင်စီ ယူနက်စကို (UNESCO) အဖွဲ့က ကမ္ဘာမှာ ပြောဆိုသုံးစွဲနိန်ကတ်တေ ဘာသာစကားပေါင်း ခြောက်ထောင်ထဲက သုံးပုံတပုံစွာ မျိုးတုံးဆိတ်သုဉ်း ပျောက်ကွယ် လားဖို့ အန္တရာယ်နန့် ရင်ဆိုင်နိန်ကတ်ရရေလို့ ထုတ်ဖော်ပြောဆိုလိုက်ပါရေ။ ဒေပိုင် အခြိမ်းခြောက်ခံနိန်ရရေ ဘာသာ စကားနှစ်ထောင်ကို မပျောက်ပျက်လားအောင် ထိန်းသိမ်းစောင့်ရှောက်ဖို့ အစိုးရပိုင်းဆိုင်ရာ တာဝန်ယူလုပ်ဆောင်မှုတိ ဟိဖို့လိုအပ်တေပိုင် လူတိကလေ့သူရို့ ဘာသာစကားတည်တံ့ကျန်နိန်စီဖို့ “ကိုယ့်ရို့ စကားကို ကိုယ်ရို့ ပြောကတ်ခြင်း” ကိုတန်ဖိုးထားဂုဏ်ယူကတ်ဖို့ အေယူနက်စကိုအဖွဲ့ချူပ်က တိုက်တွန်းလိုက်ပါရေ။

ဘာသာစကားတခုနိဂုံးချူပ်သီဆုံးလားတိုင်း တန်ဖိုးမဖြတ်နိုင်ရေ ဓလေ့ထုံးတမ်းစိုင်လာယိုင်ကျေးမှုအမွီအနှစ်တိ မျိုးဆက်တိနန့် ရင်းပနာ စုဆောင်းထိန်းသိမ်းလာကတ်တေ အသိပညာ ကဗျာစာပီဂီတ သမိုင်းရိုးရာ ဂန္တ၀င်အနုပညာ လက်ရာကောင်းတိ အားလုံးဆုံးရှုံးလားကတ်ရရေ လို့ ဒေအဖွဲ့ကြီးက ထောက်ပြ ပြောဆိုပါသိမ့်ရေ။ ၂၀၀၈ ခုနှစ်မှာ အမေရိကန်နိုင်ငံ အလက်စကားပြည်နယ်၏မူရင်းဘာသာစကားကိုပြောတတ်တေ နောက်ဆုံးတယောက်တည်းရာ ကျန်ရေ အသက် ၈၉ နှစ် ၀ါကြီးမ အီးယာခ် (Eyak) ကွယ်လွန်လားရေခါ ဘာသာစကားလည်း ကပ်ပါလားခရပါရေ။

ဘာသာဗေဒပညာသျှင်အများစုက အဂုလက်ဟိ ကမ္ဘာ့ရွာထဲက ဘာသာစကား ခြောက်ထောင်မှာ အနည်းဆုံးတ၀က် လောက်က သက္ကရာဇ် ၂၀၅၀ မှာ ပျောက်ကွယ်သီဆုံးလားနိုင်ရေလို့ ခန့်မှန်းထားကတ်ပါရေ။ ဘာသာစကားတိ မျိုးတုံး ပျောက်ကွယ်ခြင်းရေ အယင်ခါထက်နှစ်ဆမြင့်ပါလတ်ပနာ အေပုံစံအတိုင်းရှိဆက်ပြီးကေလားနိန်ကေ အနာဂတ်ကမ္ဘာ မှာ တစ်ဒါဇင်နှစ်ဒါဇင်လောက်ဘာသာစကားတိကရာ လွှမ်းမိုးချူပ်ကိုင်ထားနိန်လီဖို့လို့ သုံးသပ်ကတ်ပါရေ။ အေချင့် ထက်ဆိုးရေ ပျက်စီးဆုံးရှုံးမှုနှုန်းမြင့်တက်လာခြင်းတိ ဖြစ်လာနိုင်ပနာ ၉၀ ရာခိုင်နှုန်းလောက် ဘာသာစကားတိ သက္ကရာဇ် ၂၁၀၀ မှာ မျိုးပြုန်းလားခြင်းတိ ဖြစ်လာနိုင်ရေ လို့ အကြံပြုထောက်ပြရေ ဘာသာဗေဒပညာသျှင်တိလေ့ ဟိပါသိမ့်ရေ။ ဒေပိုင် ကြုံတွိလာနိုင်ရေ ဘာသာစကားတိပျောက်ကွယ်လားနိန်ခြင်း အခြေအနေဆိုးကို တမျိုးတဖုံဖြစ် လားအောင်ပြောင်းလဲလာစီဖို့  လိမ်မာပြီးကေ ဥာဏ်အမြော်အမြင်ကြီးရေ သူရို့ ဘာသာစကားပျောက်ပျက်လားဖို့စွာကို စိုးရိမ်ရေ လူမျိုးတိက အဂုအချိန်ကပင်စပနာ ကိုယ်ပိုင်ဘာသာစကားကို ကျယ်ကျယ်ပြန့် ပြန့် ပြောဆိုသုံးစွဲခြင်းတိ ထိန်းသိမ်း စောင့် ရှောက်ဖွံ့ ဖြိုးတိုးတက်လာအောင်လုပ်ခြင်းတိကို ဆောင်ရွက်လားပြီးကေ အကောင်းဆုံးအဖြေရှာလား နိုင်ရေ ကိုယ်ရို့  ဘာသာစကားအန္တရာယ်ကျရောက်နိန်ခြင်းက ကာကွယ်လားသင့်ရေ လို့ ပညာသျှင်တိက တိုက်တွန်း ထားပါရေ။

ခိုင်မာသန်စွမ်းရေ ဘာသာစကားတခုကို အဓိပ္ပါယ်ဖွင့်ဆိုရဖို့ ဆိုကေ စကားပြောရေလူသစ်တိ စိုင်ဆက်မပြတ်ရဟိ နိန်ခြင်းပင် ဖြစ်ပါရေ။ လက်ဟိလူကြီးတိ ဇာလောက်ပင် ယင်းဘာသာစကားကို သုံးနိန်ကတ်ပတ်စီ ဒေဘာသာ စကားကို လက်ဆင့်ကမ်းပီးလားဖို့  မျိုးဆက်သစ်တိ မဟိကေ ဒေဘာသာစကား၏ကံကြမ္မာစွာ မှေးမှိန်ပနာ အရောင် နွမ်းလားဖို့ စွာ ကျိန်းသီနိန်ပါရေ။ နှစ်ပေါင်းထောင်နန့် ချီပြီးကေ ဘာသာစကားတခုတည်တံ့လာကေလေ့ ဒေနိန့် ကာလ မှာ အချေသူငယ်တိက ဒေဘာသာစကားသင်ယူခြင်းကို ရပ်ပစ်လိုက်စွာနန့်  အေဘာသာစကားနိဂုံးချူပ်လားဖို့ စွာပါ ဗျာလ်။

လူမျိုးတမျိုးဖြစ်ခြင်း၏ဂုဏ်အင်္ဂါလက္ခဏာရပ်ဖွံ့ ဖြိုးတိုးတက်လာခြင်းနန့်  ယိုင်ကျေးမှုထွန်းကားလာခြင်းတိကို ဘာသာစကားကရာ ပုံဖော်ပီးနိုင်ပါရေ။ လူမျိုးတမျိုးအဆင့်ဟိခြင်းကို ဘာသာစကားနန့် ရာ တိုင်းတာနိုင်ပါရေ။ ဘာသာ စကားပျောက်ကွယ်လားစွာနန့် လူမျိုးတမျိုးဖြစ်ခြင်း၏အနှစ်သာရတည်တံ့ရှင်သန်ခြင်းတိလည်းနိဂုံးချူပ်လားနိုင်ပါရေ။

ဘာသာစကားတခု လူမျိုးတမျိုး၏ပင်မသုံး ရုံးသုံးအနေအထားက ပျောက်ကွယ်လားပြီးခါမှ ယင်းလူမျိုး၏ကိုယ်ထူ ကိုယ်ထ ထိန်းသိမ်းမှုနန့်  ပြန်ပြီးကေ နိုင်ငံသုံးဘာသာစကားအဖြစ် အသက်ဝင်လာစွာတိလေ့ ဟိပါသိမ့်ရေ။ ပြန်ရှင် ပါလတ်တေ ဘာသာစကားတခုက အဂုအစ္စရေးနိုင်ငံသားဂျူးလူမျိုးတိ ပြောဆိုသုံးစွဲနိန်ကတ်တေ ခေတ်သစ် ဟီဘရူး (Hebrew) ဘာသာစကားပင် ဖြစ်ပါရေ။ ဒေဘာသာစကားက ရာစုနန့် ချီပနာ လူမျိုးသုံးနိုင်ငံသုံးဘာသာစကား အဆင့်က ပျောက်ကွယ်လားပြီးကေ ဘာသာရေးနန့်  ပညာရပ်ဆိုင်ရာ ဘာသာစကားအဖြစ် ကျန်ဟိနိန်ခပါရေ။ ယကေ လေ့ လားရေနိန်ရာ ရောက်တေအရပ်နန့် နိန်ထိုင်ရေ တိုင်းပြည်နိုင်ငံတိုင်းမှာ ဂျူးလူမျိုးအသိုင်းအ၀ိုင်းတိက သူရို့  ဘာသာ စကားကို မပျောက်ပျက်အောင် ထိန်းသိမ်းစောင့်ရှောက်လားပြီးကေ ၁၉ ရာစုနှောင်းပိုင်းမှာ ဒေ ဟီဘရူးဘာသာကို အယ်လီဇာ ဘမ် ယေဟူဒါ (Eliezer Ben-Yehuda) ၏ ဦးဆောင်မှုနန့်  ပါလက်စတိုင်းဒေသမှာ ပြန်ပနာ ဂျူးလူမျိုးတိပြောဆိုရေ စကားအဖြစ် မိတ်ဆက်အသက်သွင်းလာနိုင်ပြီးကေ အစ္စရေးနိုင်ငံထူထောင်လာရေခါ ကျောင်းတိမှာ သင်ကြားပို့ ချပနာ အဓိကပင်မ ဘုံရုံးသုံးဘာသာစကားတခုအဖြစ် ပြဌါန်းနိုင်ခစွာ အေနိန့် ထက်ထိ ပင်ဖြစ်ပါရေ။

ရခိုင်ရို့ ဘာသာစကားကလေ့သော့ ဒေနိန့် ကာလမှာ မျိုးတုံးပျောက်ကွယ်လားဖို့  စိုးရိမ်ရရေ အဆင့်ကိုရောက်ပါ လတ်ပါရေ။ နှစ်ပေါင်းထောင်နန့် ချီပနာတည်တံ့လာရေ ဒေရခိုင်ရို့ ဘာသာစကားစာပီနိဂုံးချူပ်လားစွာနန့် ရခိုင်လူမျိုး လေ့ ကမ္ဘာ့မြီပြင်ထက်က ပျောက်ကွယ်လားဖို့ စွာ ကျိန်းသီနိန်ပါရေ။ ကိုယ်ရို့ ဘာသာစကားစာပီ မပျောက်ပျက်လား အောင် ထိန်းသိမ်းစောင့်ရှောက်ရဖို့ စွာက ရခိုင်သားတိုင်း၏ မွီးရာပါ တာဝန်ဝတ္တရားတခု ဖြစ်ပါလတ်ပါရေ။ ရခိုင် စကား ကိုပြော ရခိုင်စာကိုရီးလို့  ရခိုင်ဖြစ်ခြင်းကိုဂုဏ်ယူကတ်ခါမှ အဘိုးအဖီးရို့ လက်ဆင့်ကမ်းပီးခရေ အမွီအနှစ်ကိုမြတ်မြတ်
နိုးနိုးတန်ဖိုးထားရာ ရောက်ပါဖို့ ။ နောက်လာနောက်သားမျိုးဆက်သစ်တိကိုလေ့ရခိုင်ရို့ ကိုယ်ပိုင် ယိုင်ကျေးမှု အစိုင်အ
လာကောင်းတိကို မျှဝီပီးလားနိုင်ဖို့  ကိုယ့်ရိုးရာစာပီကို မြှင့်တင်လားပနာ သမိုင်းပီးတာဝန်ကို ထမ်းဆောင် လားကတ် ပါမေ။ ။ ။


ခိုင်အောင်အောင်
၀၄၊ ၀၇၊ ၂၀၀၉

အနာဂတ်လှိုင်းဘလော့မှ