ခရစ်စမတ် ခရစ်စမတ်နဲ့ နားထဲမှာ ကြားနီရရေ..ခရစ်စမတ်ဆိုရေ အချိန်အခါကျရောက်ဖို့နီလာရာဖြစ်
လို့ ပတ်ဝန်းကျင်နီနားမှာ ဟိရေလူတိ ပြောနီကတ်တေ စကားသံတိပါ..လားဖြစ်တေ နိန်ရာတိုင်းက မြင်ကွင်းတိထဲမှာလည်း ခရစ်စမတ်သစ်ပင်တိ ၊ အလှအပ တန်ဆာဆင်ထားရေ မီးပန်းမီးဆိုင်တိက ထထိန်ထိန်နဲ့ လှပတင့်တယ်ပနာ နီရာယူနီကတ်တေ..တစ်နှစ်ထက်တစ်ပိုလှပအောင် ပြင်ဆင်ထားရေ မြင်ကွင်းတိက မျက်စိထဲမှာ ရိုးလို့ မလား..သူရို့နယ်မြေဒေသကို လူတိ က ပြုပြင်အလှပတိနက် တန်ဆာဆင်ထားကတ်တေ.. ယေကေလည်း ရင်ထဲမှာ နှစ်နှစ်ကာကာ တမ်းတအောက့်မိန့်စော်က မွီးဌာနီ တောရွာချေနဲ့ ကျောက်ဖြူမြို့ကိုပါ.. နှစ်တစ်နှစ်တာ ကုန်ဆုံးချိန်ဖြစ်တေ ဒေဒီဇင်ဘာလမှာ နှင်းတိတဖွေဖွေကျလို့ စိမ်းလန်းစိုပြေနီရေ တောင်တန်းကြီးတိ သဘာဝအလှ မြင်ကွင်းတိကိုရာ အောက့်မိန့်ပါရေ..တောမှာဆိုကေ စပါးရိတ်သိမ်းပြီးချိန်ဖြစ်နီရာ ဟိဖို့.. ကိုယ့်ရပ်ကိုယ့်မြီနက် ၀ီးနီစော်ကြာလို့ သီချင်း စာသားတိကပိုင်း တမ်းတမှန်းဆလို့ရာ ဖြစ်နီယာ။
အငယ်ချေခါဘ၀တိကိုလည်း အောက့်မိန့်ရေ..ဇီးသီးကောက်ဖို့ လားဖို့လိုလို့ စောစောစီးစီးကပင် အိပ်ရာက ထရေ.. ရာသီဥတုကလည်း ချမ်းစော်မှာ မပြောကေ့ဖိ.. တောင်တိကြားထဲမှာ ဟိရေ ရွာချေဖြစ်လို့ အအီးဒဏ်ကို ပိုခံရရေ..မြို့ပေါ်လူကုံတန်ရို့ ဂွမ်းစောင်ကြီးတိထဲမှာ ဇိမ်ခံလို့ ကောင်းနီတုန်းဟိဖို့.. တောရွာနီရေ တောင်သူ လယ်သမားတိအဖို့ အချမ်းဒဏ်ကို မသိချင်ယင်ဆောင်ပနာ လယ်တောဆင်းနီကတ်ရရေ အချိန်ပ..သတိရမိန့်ပါရေ..အချေခါဘ၀တိကိုလည်း..စလုံးလို့ လူတိခေါ်ကတ်တေ စင်္ကပူမှာတော့ ယင်းပိုင်း သဘာဝ ဆောင်းရာသီ အအီးဓါတ်ဆိုစော မဟိ.. နှင်းတိဝေေ၀ဆာဆာကျနီရေ နံနက်ခင်း အလှအပ တရားဆိုစော် မဟိပါ.. လူတိ ဖန်းတီထားရေ အလှအပတိကတော့ တစ်နိန်ရာနဲ့ တစ်နိန် မတူရလီအောင် မြင်ကွင်းတိက ဆန်းပြားနီရေ.. စလုံးက လူတိက နှစ်တစ်နှစ်ကုန်ဆုံးချိန် ဒီဇင်ဘာကို မျော်လင့်ကတ်တေ.. အလုပ်လုပ်နိန်ရေ အလုပ်သမားတိ အဖို့ ဒေလမှာ ခရစ်စမတ်ရုံးပိတ်နဲ့ ရေက်ရှည်ခွင့်ယူပြီးကေ အနားယူလို့ရစော်ရို့ (ဥမ္မာရို့ပိုင် အဖရခိုင်ပြည်ကြီးနဲ့ ခွဲခွာပြီးကေ လာအလုပ်လုပ်နိန်ရေ အလုပ်သမားတိအဖို့လည်း ကိုယ့်ပြည်ကို ခွင့်ရက်ယူပြီးကေ ပြန်နိူင်ရေ။
ဂုလောလောဆယ် မပြန်ဖြစ်စော်ကတော့ မမဥမ္မာဖြစ်နီေ၇..)၊ Bonus လို့ခေါ်ရေ နှစ်တစ်နှစ်ကုန်လို့ အပိုဆုအဖြစ် အလုပ်ရှင်တိက အလုပ်သမားတိကို ပီးစော်ရို့ ၊ အ၀တ်အထည် အသုံးအဆောင် အစဟိသဖြင့် ပစ္စည်းတိကိုလည်း ချိုသာရေ ဈေးနူန်းတိနဲ့ ရစော်မျိုးရို့တိပ...နှစ်ဟောင်းကစော်တိကို နှစ်သစ်ကို မကူးခင် ဈေးနူန်းလျော့ချ စနစ်ဖြင့်ရောင်းပိုက်စော်တိပါ..စလုံးကလူတိကတော့ ကောင်းပျော်ကတ်ပုံရရေ.. ဥမ္မာကတော့ ရင်ထဲမှာ တသသနဲ့ ရိုးမတောင်တန်းတစ်ဖက်က ကိုယ့်ပြည်ကိုရာ အောက်မိန့်ပါရေ..ခရစ်မမတ်လို့ ထူး၂ခြားပွဲကျင်းပရေ ပွဲမဟိကေလည်း လူကလုပ်စရာ မလိုဘဲလှပနီရေ သဘာဝအလှအပတိက ရင်ထဲမှာ တမ်းတမ်းတတ နီရယူထားပါရေ.. အခွင့်ရကေ ခွင့်ယူပြီးကေ ကိုယ့်ပြည်ကို ပြန်ချင်ပါရေ.. ခွင့်ယူလို့ မရ အဆင်မပြေပါ..သူငယ်ချင်းတိနဲ့ ချိန်ထားရေ ကံကော်တော ဘုရားကို ဖူးဖို့လားဖို့.. မိုးသောက်ဖက် ၅နာရီခွဲလောက်က အိပ်ရာက ထ..ချမ်းကလည်း ချမ်းနဲ့.. နှင်းတိကျနီလို့ ဟိုဖက်အိမ်နဲ့ ဒေဖက်အိမ်ကို ဖောက်လို့ မမြင်ရနိူင်.. ၆နာရီလောက်ဆိုကေ ဥမ္မာရို့ အိမ်မှာ လူစု..ပြီးကေ စက်ဘီး ကိုယ်စီးနက် ဘုရားကို လားဖို့ ချီတက်ကတ်ရာ..ဒေပိုင်း မိုးသောက်ဖက် စော၂စီးလားမှ အပြန်ခရီးက နီကောင်းမပူခင် အိမ်ကို ပြန်ရောက်ပါဖို့..ဥမ္မာရို့ အိမ်ဖက်က စလို့းလားကေ ကုမဏီဈေးလို့ခေါ်ရေ ဇေတီယျရွာကို ဖြတ်လို့လားရရေ..ပွိုင့်ဖက်ကိုလည်းဖြတ်လို့လားရရေ..ယင်းလမ်းတစ်လျောက်မှာ နှင်းတိကကျနီလို့ တစ်ယောက်နဲ့ တစ်ယောက် အပါးချေမှ မြင်ရရေ..အချမ်းဒဏ်ကတော့ သက်သာရေ..စက်ဘီးနင်းနီရလို့.. ၀မ်းဆာလူတိက ယင်းမှာ မုန့်တီဝင်ဝယ်စားကတ်တေ။
ပြီးကေ ဆက်လားကေ ကျောက်တစ်လုံး ဘုရား.. ယင်းမှာတော့ ခရီးတစ်ထောက်နားရရေ..ဥမ္မာရို့ အိမ်က ကံကော်တော ဘုရားကို စက်ဘီးနဲ့လားကေ တစ်နာရီခွဲလောက် လားပါရရေ...ယင်းပိုင်နဲ့ ကံကော်တော ဘုရားကို မရောက်ခင် ဂုံးချိန်ရွာက ဈေးမှာ ဘုရားမှာ ကပ်လူုဖို့ ဘုရားပန်းတိ ဆင်းဝယ်ကတ်တေ.. ဘုရားရှိခိုးပြီးကေ စားဖို့ ကောက်ညှင်းထုပ်ရို့ ပဲတောင့်ရှည်ပြုတ်စားရို့ ၀ယ်လားကတ်တေ.. ဘုရားကို နှင်းတောတိကြားက ၀ိုးတိုးဝါးတားလှမ်းမြင်နီရရေ..ယင်းအနားမှာ စက်ဘီးနဲ့ဆိုကေ စကေချေ အားစိုက်ပနာ နင်းရရေ..ကုန်းစကေချေ မြှင့်လို့.. ဘုရားကို ရောက်ကေ ဘုရားပန်းတိ ကပ်လူု..အလုငွေတိဘာတိထည့်.. ပုတီးစိပ်လူက စိပ်.. ပတ်ဝန်းကျင်တစ်ခုလုံးကို သန့်ရှင်းရေလုပ်လူက လုပ်နဲ့..ပြီးကေ စကားစမြည်ပြော.. ဓါတ်ပုံရိုက်..ပါလာရေ မုန့်တိကို စားကတ်နက်.. ကောင်းပျော်ဖို့ ကောင်းပါရေ.. အပြန်လမ်းမှာလည်း အစာပုတ်တေ ဥမ္မာရို့ အဖွဲ့က ဂုံးချိန်မှာ ဆီထမင်းနက် ငါးခြောက်ဖုတ်၊ လဖက်ရည်သောက်လူက သောက်၊ မုန့်တီစားလူကစား၊ အကြော်စုံစားလူက စား.. ပြီးကေ အိမ်ရောက်ကေ စားဖို့ ယင်းအနားမှာ ရောင်းရေ ဇီးသီးရို့ကို တနိူင်ဝယ်လာကတ်သိမ့်ရေ။
ကျောက်တစ်လုံးရောက်ကေ ဘုရားဝင်ဖူးကတ်သိမ့်ရေ..ယင်းနိရာမှာကတော့ အုန်းသီအရည်သောက်ရောင်းရေ..ဥမ္မာရို့အုပ်စုကတော့ နိူင်လောက်ဝယ်လာကတ်သိမ့်ရေ.. အိမ်ကိုေ၇ာက်ကေ နီလည်းကောင်းမပူသိမ့်ရေ အချိန်ရောက်လို့ ကွက်တိရာ..ယင်းပိုင်းနိ့တိကတော့ ဥမ္မာရို့အိမ်က ဒိုင်ခံ.. ထမင်းချက်ကျွေးရသီရေ.. တစ်ရက်လုံးပိုင်း ဥမ္မာရို့ အိမ်မှာ ချက်ပြုတ်စားသောက် စကားတပြောပြောနဲ့.. ညစာတိုင်းမှာ ကိုယ့်အိမ်ကို ပြန်ကတ်တေ..ယင်းပိုင်း ပပျော်ပပါးရက်တိကို အောက်မိန့်ရေ.. နောက်အားလပ်တေ ရက်တိဆိုကေ အုပ်စုတိ ဖွဲ့ပနာ ထမင်းချက်စားဖို့ လားကတ်သီရေ.. ကားစီလုံးငှါး၊ကားထက်မှာ ဆောင်းဘောက်စ်တိ ဖွင့်၊ ချက်ပြုတ်ဖို့ အိုးခွက်တိတင်ပနာ တပျော်တပါး လားကတ်စော်လည်း ဒေလ ဒေရာသီမှာရာ မဟုတ်ပါလား..ကျောင်းသူ၊ ကျောင်းသားတိ အဖို့ ဒီဇင်ဘာကျောင်းပိတ်ရက်ရှည်ကလည်း ဒေလမှာရာဆိုခါ သူရို့တိအဖို့လည်း အပျော်ဆုံး အချိန်မဟုတ်ပါလား.. ဇာတ်ပွဲ သဘင်တိကလည်း ဘုရားကြီးတောင်မှာ ကလိုက် ၊ဘောလုံးကွင်းမှာ ကလိုက်နဲ့.. ဥမ္မာရို့ အုပ်စုကတော့ ပွဲကြည့်ဖို့ လားစော်ထက် ပွဲဈေးတန်းလျောက် မုန့်စား..ပြီးကေ ပြန်လာကတ်တေ.. လရောင် ထိန်ထိန်နက် အီးချမ်းနီရေ ညအလင်းရောင်အောက်မှာ ဥမ္မာရို့ သူငယ်ချင်းတိ အုပ်စု အိမ်ဖက်ကို ခြီကျင်ပြန်လျောက်လာကတ်တေ.. စက်ဘီးယူလားကေ ကောင်းအလုပ်ရှုပ်လို့..ဆောင်းရာသီမှာ ဒေလကို အနှစ်သက်ဆုံးပါ..ဆောင်းရာသီနဲ့ အတူပျော်ပွဲရွင်ပွဲများ၊ သူငယ်ချင်းတိ အားလုံးကို ဥမ္မာဒေနိန်ရာက ကကောင်းသတိရ အောက့်မိန့်ပါကြောင်း ရင်ထဲက တမ်းတယင်း။
(ကျောက်ဖြူသူချေဘလော့မှ)
Posts
0 မှတ်ချက်:
Post a Comment