သတိတရနန့်
အမှတ်ရဖြစ်နီခရေ ဓါတ်ပုံတိကို
အခါခါကြည့်ယင်း
ငါ၏စိတ်ကူးပုံရိပ်တိကလည်း
အယင်တစ်ချိန် သူနှင့်အတူဟိခဖူးရေ အချိန်တိကိုရာ
တမ်းတနီမိရေ.. ။
ဟောင်းနွမ်းလားရေ
ပြက္ခဒိန်ပေါ်က နိန့်ရက်တိကလည်း
ငါ့ကို
ဟားတိုက် ရီမောနီကတ်တေ ချစ်သူ..။
အခုတော့
ငါ့မျက်ရည်တိ ဝေ၊
သံယောဇဉ်အိပ်မက်တိနန့်
နှစ်သိမ့်ပီးဖို့
စကားသံချေ တစ်ချက်တောင် မကြားရဘဲ
နီးလျှက်နှင့် ၀ီးနီရစာ အဖြစ်လား ချစ်သူ… ။
ငါရောက်ဖူးခရေ နိန်ရာတိုင်းက
အတူတူ ခြီချ
လျောက်ဖူးခရေ နိန်ရာတိရာလေ..။
အဂုကျကေ
အရာရာတိုင်းက
အရိပ်တိပိုင် ကျန်နီခကတ်ယာလား
ချစ်သူ..။
ကမ္ဘာကြီး၏ ပြောင်းလဲမှုတိထဲမှာ
တည်မြဲနီရေ လောကကြီးအကြောင်းကို
အမြဲရှာဖွီနိန်တုန်းရာ။
ရည်ရွယ်ရာမဟိရေ
လူတိကြားမှာ နီထိုင်ယင်း
ဘ၀ကို ဖြစ်ပိုင် နီပစ်ချင်ရေ။
ကံတရား၏ အချိုးအကွေ့ထဲမှာ
တစ်ခါတစ်ရံတော့ သာယာမှုချေတိနန့်
တအောင့်ချေလောက်တော့
လူတိုင်ခံစားချင်ကတ်ဖို့ရာ.. ။
မပြောင်းလဲရေ သံယောစိုင်တိကို
ရင်ထဲမှာထာဝရ သိမ်းထားယင်း
ငါက...
မေတ္တာငတ်တေ လူတစ်ယောက်
ဖြစ်လားယာလား ချစ်သူ..။
ငါသိပါရေ..
ငါမပျော်ပိုင် သူလည်းပျော်နီဖို့ဆိုစာ
မဟုတ်မှန်းကို.. ။
ယေကေလည်း
ဟန်ဆောင် မျက်နှဖုံးတပ်ပြီးကေ
နီတတ်တေ သူ့အဖို့
အရာရာတိုင်းက ပုံမှန်ပိုင် ဟိဖို့မှန်း
ငါသိနိူင်ပါရေ..။
ပီးခဖူးရေ အမှတ်တရလို့
ထူးဆန်းခမ်းနာပနာ မဟိခကေလည်း
အတူဟိခရေ အချိန်တိုင်းကို
ငါမြင်ယောင်တမ်းတတိုင်း
တိုက်ဆိုင်မှုဆိုစာထက်
အချိန်တိုင်း လွမ်းမိပါရေ ချစ်သူ.။
---------------
(ကျောက်ဖြူသူချေ ဘလော့မှ)
Posts
0 မှတ်ချက်:
Post a Comment