ရခိုင်ပညာကျော်များ

ကျွန်တော်ရို့၏ “အမှောင်ကိုခွင်း၊ အလင်းကိုဆောင်၊ ရခိုင်အလင်းရောင်”ဘလော့သည် အိန်တာနက်ထက်မှာ တက်လာသမျှ ရခိုင်ဘာသာနန့် ဆောင်းပါး၊ကဗျာ စသည်တိကို ရှာဖွီတင်ဆက်ဖို့အတွက် စမ်းသပ်ပြုလုပ်နိန်ပါသည်။ လိုအပ်ချက်တိဟိပါက c'box မှာအမှာစာရေးထားခကတ်ပါ။ အတတ်နိုင်ဆုံး အကောင်းဆုံးဖြစ်အောင် ကြိုးစားနိန်ပါသည်။ ဆက်သွယ်ချင်ပါက alrevelation@gmail.com ကိုဆက်သွယ်နိုင်ပါရေ။

ရခိုင်ပညာကျော်များ

ရခိုင်ဆိုရေနာမည်စွာ နက္ခတ်ကောင်းနိမိတ်ကောင်းတိဟိရေအတွက်နန့် ရခိုင်ပြည်ဆိုစွာ ပညာတတ်လူတော်တိထွန်းမြတ်တေ အရပ်ဒေသတခုလည်းဖြစ်ပါရေ။

အနောက်ကိုကြည့်လိုက်တေခါ ဒေါက်တာအေးကျော်၊ ဒေါက်တာနာယက အစဟိရေပညာသျှင်တိကိုတွိရပါဖို့။
အရှိဖက်ကိုကြည့်လိုက်တေခါ ဒေါက်တာအေးချမ်းကိုတွိပါလိမ့်မေ။ သမိုင်းကိုလှန်လို့ကြည့်ကေ ယင်းထက်အများကြီးတွိပါဖို့ဆိုစွာကို ငြင်းပါယ်ကတ်ဖို့မထင်။ မီဒီယာကဏ္ဍကိုကြည့်ကေ ဦးကျော်ဇံသာစွာကကောင်းတော်ရေလို့ အားလုံးကလက်ခံထားယင့်။

ယေကေလည်းသော့ အခုတင်ပြဖို့ပညာသျှင်တိက ရခိုင်ပြည်ကပြိုင်ဖက်ကင်းပညာသျှင်တိပါ။ တသက်မှာတယောက်ပေါ်ဖို့ဆိုစွာခက်ခဲရေပညာသျှင်မျိုးပါ။ ကမ္ဘာမှာ ပညာရပ်မျိုးစုံဟိရေပိုင် ရခိုင်ပြည်မှာလည်း ပညာသျှင်မျိုးစုံဟိယင့်။

ပထမဆုံးတင်ပြဖို့ပုဂ္ဂိုလ်က သိပ္ပံနန့်သဘာဝကိုစူးစမ်လေ့လာရေဖက်မှာ ပြိုင်ဖက်ကင်း အကျွန်ုပ်ရို့ရွာက အဖိုးသျှင်ဝေဇံဖြူပါ။ အဖိုးသျှင်ဝေဇံဖြူစွာ ဇာလောက်တော်လီဖို့လဲ။ တရက်နိမှာ အကျွန်ုပ်ရို့ရွာကျောင်းမှာ လူစုလူဝေးချေတခုဖြစ်ပါရေ။ ယင်းအထဲမှာ ဗဟုသုတမျိုးစုံကို ကိုယ့်အမြင်သူ့အမြင်ကိုတင်ပြကတ်တေခါ အငြင်းခုံချေတခုဖြစ်ပါရေ။

အကြောင်းက ကမ္ဘာလည်ပတ်တေဆိုစွာ ဖြစ်နိုင်၊ မဖြစ်နိုင်။ တယောက်လည်မဆုံးဖြတ်နိုင်ဖြစ်နီယင့်။ ယင်းအချိန်မှာ အဖိုးသျှင်ဝေဇံဖြူဝင်လာယင့်။ ဝင်လာစွာနန့်တပြိုင်နက် အဖြေတန်းလို့ပီးလိုက်ယင့်။ မင်းရို့စိုင်းစားကြည့်ကတ်ဝေ ... ကမ္ဘာလယ်ကေ ငါ့ရို့ကျောင်းရှိကအုန်းပင် ကျောင်းနောက်သို့ တခါလည်းမရောက်လားကာဝေ။ "ကမ္ဘာလယ်ပတ်ရေဆိုစွာ လုံးဝမဖြစ်နိုင်" ကာ။

အဆုံးမှာ အားလုံး ဟဟဟဟဟဟဟဟ..... နန့် ဟားပစ်လိုက်ကတ်ယင့်။

နောက်တယောက်ကတော မီဒီယာလို့ခေါ်ရေ ဝေဖန်ရေးသမားတယောက်ပါ။

ထွန်းသာအောင်နန့် လှဖေ ရေဒီယိုတလုံးကိုအလယ်ကချပနာ ဝေဖန်နီကတ်စွာ (၄) ချက်တီးလောက်ပင်ကြာပါပျာယ် မပြီးနိုင်သိမ့်။ အကြောင်းက ကျူးဘားဒုံပျံစခန်းကိစ္စပါ။ အမေရိကန်ကတားလို့နိုင်ဖို့လား ...... ရုသျှကတော့ အလျှော့လုံးဝပီးဖို့မထင်။ စကားလုံးတိက လုံးဝ special ဖြစ်ပါရေ။ အငယ်ချေတလုံးလည်းမပါ။ အကြီးမသန်တိကျည်း။ နောက်ပြီးကေ ကုလသမဂ္ဂက ဒေပြဿနာဇာပိုင်ဖြေယှင်းဖို့လဲ၊ မျိုးစုံဆွေးနွေးနီရေအချိန်ခါ လှဖေမယား ဒန်အိုးတလုံးကိုကိုင်လို့ မီးဖိုဂျောင်ကထွက်လာပျာယ် "ယော ...ယော...ဒေစွာကို အယင်ဖြေယှင်း၊ ကနိအိုးမှာထည့်ဖို့ဆန်တစိလည်းမဟိဒေ" လို့ဆိုပနာ ဒန်အိုးကိုတိုင်မှာ (၄/၅) ချိန်းလောက်ထုပစ်လိုက်ယင့်။ မီဒီကဏ္ဍကတော့ ယင်းမှာပင် အဆုံးသတ်လိုက်ယင့်။

နောက်ပညာသျှင်တိကိုလည်း ဆက်ပြီးတင်ပြလားပါဖို့။

အသျှင် (Ashun)

-----------
(ရက္ခိတရို့ဆုံရပ်မြီဘလော့မှ)