သားထွီးချေ




ဂစ်တာမဟိရေ အရပ်မှာ ဂီတပညာသျှင်ပေါ်ထွန်းလာဖို့ ဆိုစွာ လုံးဝမဖြစ်နိုင်ပါ။ ယင်းပိုင်ဗျာလ် အခွင့်အလမ်းနန့်  လူမှုတက်လမ်းတိကို ယိုစိမ့်ထွက်ကျမလာအောင် လူတစုက စနစ်တကျ
ပိတ်ဆို့ ထားရေ နိန်ရာဒေသမှာ ထူးချွန်ထက်မြက်ရေ တခြားလူတိအတွက် အောင်မြင်မှုလမ်းကြောင်းစွာ
ရှာတွီ့ ဖို့ ခက်ခဲရေ အရှားပါးဆုံးအရာတခု ဖြစ်လို့  နိန်ဖို့ စွာက ကျိန်းသီရေ။ ယကေ ကံကြမ္မာကိုရာ လက်ညိုးထိုးအပြစ်တင်ပနာ ရလာရေဘ၀ကို ဖြစ်တေပိုင်နိန်ပစ်ကတ်ဖို့ လား။ အေယှင့်ကလေ့
လူရို့ ၏မွီးရာပါမာနနန့် အသိတရားကို စော်ကားရာ ရောက်နိန်ဖို့ လို့  ထင်ရေ။

နှစ်ဆယ့်တစ်ရာစုမျက်နှာစာမှာ သတင်းနန့် နည်းပညာတိက နံရံတံတိုင်းအတားအဆီးတိကို ဖြိုချပနာ ကမ္ဘာကြီးကို ရွာချေတရွာဖြစ်လာအောင် လုပ်လိုက်တေအချိန်မှာ ထွက်ပေါက်ပိတ်နိန်ရေ လူတိအတွက်ပါ ဖောက်ထွက်ဝံ့ရေသတ္တိတိကို သယ်ဆောင်ယူလာလမ်းပြပီးနိန်ရေလို့  ယူဆမိရေ။ အသေချာဆုံးတခုက မဖြစ်နိုင်ခြင်းသက်ပြင်းတိကြားမှာ ဦးနှောဏ်၏တန်းခါးပေါက်တိကို ပိတ်ပနာ ဖြစ်နိန်ရရေ လက်ဟိဘ၀ကို ကျေနပ်နိန်ခြင်းထက်တခြားအရပ်ဒေသမှာ သစ်လွင်လန်းဆမ်းရေ အိမ်မက်စိတ်ကူးဘ၀သစ်တိကို တွီ့ အောင်ရှာဖို့  ကြိုးစား ကြည့်ခြင်းက လူအဖြစ်ရှင်သန်ခြင်း၏အနှစ်သာရတခုလို့ ယုံကြည်မိရေ။ အရာအားလုံးကို ကြောက်ပနာ တထပ်စာအတွေးအခေါ်နန့် လူညွန့် တုံးနိန်ရေ မျိုးဆက်တိထက် ဇာကိစ္စကိုမဆို စူးစမ်းအဖြေရှာ ဖောက်ထွက်ဝံ့ရေ မျိုးဆက်က လူ့ အဖွဲ့ အစည်းအပြောင်းအလဲနန့် နိုင်ငံရေး စီးပွါးရေးအခင်းအကျင်းသစ်တိကို ဦးဆောင်နိုင်စွမ်းအပြည့်နန့်  မောင်းနှင်စီမံခန့် ခွဲအုပ်ချူပ်လာနိုင်
ဖို့ စွာက အမှန်ပင်ဖြစ်တေ။ အဖထက် သားတော်ခါမှရာ မိသားစုတစု၏မျိုးရိုးဂုဏ်သိက္ခာကို
ပိုလို့ မြှင့်တင်ပီးနိုင်ဖို့ စွာ ယုံမှားသံသယဖြစ်စရာမလိုပါ။

ယကေလေ့ မျိုးဆက်ဟောင်းတိက တခုလေ့မလုပ်ပီးခကတ်။ ထိုသူဒေလူရို့ က အသုံးမကျ။ ထိုပုဂ္ဂိုလ်က ဇာပိုင်။ ဒေပုဂ္ဂိုလ်ကို မယုံရ အစဟိရေ အတင်းအဖျင်းအခြင်းတိ ပြောပနာ အပြစ်တင်ကဲ့ရဲ့ တတ်တေ မျိုးဆက်သစ်ကတော့ကေ လူ့ ဘောင်ကိစ္စအ၀၀ကို နည်းမှန်လမ်းမှန်နန့်  ဖြေရှင်းနိုင်ဖို့  မဟုတ်လို့  ထင်မြင်မိရေ။ ပြင်ပဖိအားတိကြောင့် လမ်းချော်နိန်ရရေလူ့  အဖွဲ့  အစည်း (disorder society) တိမှာ ဖြစ်လေ့ဖြစ်ထဟိရေ သဘောသဘာဝအတိုင်းအချင်းချင်းအပြစ်တင်ဝေဖန်ပုတ်ခတ်တတ်ခြင်းက မမြင်ရရေနတ်ဆိုးကြီးတကောင်ပိုင် ရခိုင်ရို့  လူ့  ဘောင်မှာလေ့ အမြစ်တွယ်နိန်စွာကြာနိန်ပါဗျာလ်။ ပြဿနာတိကို အဖြေရှာဖို့ ကြိုးစားအားထုတ်တတ်ခြင်းထက် ပြဿနာတိကိုထိုင်ပြောခြင်းမှာ အရသာတွီ့ တတ်တေ အကျင့်ဆိုးကလေ့ ရခိုင်ရို့ ၏နိုင်ငံရေး လူမှုရေး အစဟိရေ နယ်ပယ်တိုင်းမှာ မြင်တွီ့ နိန်ကတ်ရရေ အနုတ်လက္ခဏာရပ်တခု ဖြစ်နိန်ရေ။ အတွင်းထဲမှာလှိုက်စားပနာ ပဋိပက္ခဖန်တီးတတ်တေ အမြင်ဆိုးတိကို ဖျောက်လို့  ကမ္ဘာ့ရွာမျက်နှာစာမှာ အာရုံဖြန့်  ပနာ အမြင်အတွေးသစ်တိရှာဖွေနိုင်စွမ်းဟိရေ မျိုးဆက်ကရာ ဘက်ပေါင်းစုံကအောက်ကျနောက်ဖြစ်နိန်ရရေ ရခိုင်ရို့ လူ့  ဘောင်ကို ပြုပြင်ပြောင်းလဲလာနိုင်ဖို့ စွာက ကျိန်းသီနိန်ရေ။

နိုဗလ်ဆုရ ဘောကဗေဒပညာရှင်တယောက်က စီးပွါးရေးကို ပုရွတ်စိတ်တိ ပြုမူဆောင်ရွက်လှုပ်ယှားခြင်းနန့်  နှိုင်းယှဉ်ပြပနာ ရွီးထားစွာကို စာအုပ်တအုပ်မှာ ဖတ်ဖူးရေ။ သူက
“ ပုရွတ်စိတ်တကောင်စွာ အစာတခုကိုတွီ့ ကေ ကျန်ရေ ပုရွတ်စိတ်တိကို အကြောင်းကြားရေ။ ယပြီးကေ ပုရွတ်စိတ်တကောင်နောက်မှာ ကျန်ရေ ပုရွတ်စိတ်တိတန်းစီပနာ ယင်းအစာကို ပုရွတ်စိတ်အအုံပါးကို ယူလားကတ်ဖို့ ကြိုးပမ်းကတ်တေ။ တခြားနိန်ရာတိမှာ အစာရှာဖို့ မလုပ်ကတ်။ တကောင်နောက်မှာ ကျန်ရေ အကောင်တိလိုက်တေ ပုရွတ်စိတ်တိအကျင့်အတိုင်း လူတိကလေ့ တယောက်က တခုလုပ်လို့ အောင်မြင်ကေ ကျန်ရေလူတိကလေ့ ယင်းအလုပ်ကို လိုက်လုပ်ကတ်တေ။ ယေခါ ဈီးကွက်မှာ ၀ယ်လိုအားကျဆင်းပနာ စီးပွါးရေးကမောက်ကမဖြစ်တတ်တေ” လို့  ထောက်ပြထားရေ။ ရခိုင်တိလေ့ ပုရွတ်စိတ်တိအကျင့်
နန့် တူရေ။ တယောက်က ပုဇွန်လုပ်လို့ စီးပွါးဖြစ်ကေ ကျန်ရေ လူတိကလေ့ ပုဇွန်လိုက်လုပ်ကတ်တေ။ယင်းအတွက်နန့်  တယောက်ရှုံးကေ ကျန်ရေလူတိလေ့ တန်းစီပနာအရှုံးပေါ်ကတ်တေ။ ပညာရေးမှာလေ့ ဆရာဝန်ဆိုကေ အားလုံးက ဆရာဝန်။ ကျန်ရေ ဘာသာရပ်တိကို လုံးဝစိတ်မ၀င်စားကတ်။ ပညာရေးစနစ်ကိုယ်နှိုက်ကကို ရီများပနာ ငါးမတွီ့ နိုင်ရေ ပညာရေးစနစ်မျိုးနန့်  လူတော်တိကို အညွန့် ခူးစားတတ်တေ ထောင်ချောက်ကြီးဖြစ်နိန်ရေ။ ဒေပိုင် လူဖြစ်ရှုံးဇာတ်သွင်းခံနိန်ရရေ အဖြစ်က လွတ်မြောက်ဖို့  ပွင့်လင်းရေ ကမ္ဘာ့ပညာရေးစီးကြောင်းထဲမှာ ခြီစုံပစ်ဝင်ပနာ အသိပညာရှာခြင်းကရာ တန်းဖိုးဟိရေ နှစ်ဆယ့်တစ်ရာစုလူသားဘ၀အစစ်အမှန်ကို ရဟိဖို့ လွတ်မြောက်ရာလမ်းပင် ဖြစ်တေလို့  ပြောချင်ရေ။ သမိုင်းမှာ ထင်ရှားရေ ပုဂ္ဂိုလ်ထူးခေါင်းဆောင်တိကို လေ့လာကြည့်လိုက်ကေ နိုင်ငံရပ်ခြားမှာ ပညာတိသင်ပြီးခါမှ ကိုယ့်တိုင်းပြည်လူ့  ဘောင်ကို ပြန်လာပနာ ဦးစီးဦးဆောင်ပြုနိုင်ခစွာကို တွီ့ ကတ်ရရေ။

အနောက်နိုင်ငံတိမှာ ဒုတိယကမ္ဘာစစ်အလွန်ကစရေ မျိုးဆက်တိကို Baby Boomers, Generation X, Generation Y, Generation Z လို့  ခွဲခြားသတ်မှတ်ခေါ်ဆိုကတ်တေပိုင် ရခိုင်ရို့ ၏
ဒေနိန့် ကာလမျိုးဆက်ကိုလေ့ “၀ံလက်မျိုးဆက်” လို့  ခေါ်ကေ သင့်တော်မှုဟိဖို့ လို့ ယူဆမိရေ။ အသိပညာတိပေါက်ကွဲနိန်ရေ ကမ္ဘာ့ရွာမှာ တန်ဖိုးဟိပြီးကေ အပြုသဘောဆောင်ရေ လုံ့ လစွမ်းအားနန့်  ရခိုင်ရို့ လူဘောင်ကို လက်တွီ့ ကျကျပြုပြင်ပြောင်းလဲ တိုးတက်စီဖို့  သမိုင်းပီးတာဝန်က ဒေ ရခိုင်ရို့ အသက်ဖြစ်တေ ၀ံလက်မျိုးဆက်တိပခုံးထက်မှာ အဂုကျရောက်လာနိန်ဗျာလ်လို့  ပြောကတ်ရဖို့ ထင်ရေ။ အပြင်ပန်းနန့် အနှစ်သာရကို ခွဲခြမ်းစိတ်ဖြာကြည့်မြင်တတ်တေ အရေအတွက်ထက် အရည်အချင်းကိုဇောင်းပီးတတ်တေ မျိုးဆက်ကရာ ရခိုင့်အနာဂတ်သစ်ကို ဖန်တီးတည်ဆောက်လာနိုင်ဖို့  လို့  ယုံကြည်မိကြောင်း ပြောချင်ပါရေ။ ။ ။

အနာဂတ်လှိုင်းဘလော့မှ