ခိုင်အောင်အောင်


ရခိုင်သားတိုင်းမှာ အမျိုးချစ်စိတ်က ခေတ်အဆက်ဆက် သန္ဓေတည် ဖြတ်သန်းလာပနာ ခိုင်ခိုင်မာမာဟိနိန်ပြီးသားပင်ဖြစ်တေ။ ဒေအချက်က ငြင်းစရာမလိုရေ အားလုံးသူက သဘောတူထားကတ်တေ ဘုံယုံကြည်မှုလို့  ပြောကတ်ရဖို့ ထင်ရေ။ ယကေလေ့ ဒေနိန့် ကာလ ရခိုင်သားတိ ရင်ဆိုင်နိန်ကတ်ရရေ ပြဿနာတိက ဒေအမျိုးချစ်စိတ်ဆိုရေ ခံယူချက်ချေတခုတည်းနန့်  ဖြေယှင်းလို့ မရနိုင်ရေ မလုံလောက်တေ စိန်ခေါ်မှုအသစ်တိ ဖြစ်နိန်ကတ်တေ။ အမျိုးချစ်စိတ်ကြီးပြီးကေ မျှော်မှန်းထားကတ်တေ စည်းလုံးညီညွတ်မှုတိမဖြစ်လာရေခါ အချင်းချင်းလက်ညိုးထိုး အပြစ်တင်ခြင်းနန့် စီ အဆုံးသတ်လားကတ်စွာကို တွိမြင်နိန်ကတ်ရရေ။ ပုဂ္ဂလိကပဋိပက္ခတိဖြစ်ပနာ ညှိလို့ မရ ကွဲပြဲလားရကတ်တေ။ ဒေပိုင်နန့်  စုကွဲပြဲသံသရာလည်နိန်ကတ်ရစွာ အေနိန့်  ထက်ထိလို့ ပြောကေ လွန်လီဖို့ မထင်ပါ။

ဒေကမ္ဘာကြီးမှာ လူတိရင်ဆိုင်နိန်ကတ်ရရေ ပြဿနာပေါင်းစုံကို တထိုင်တည်းနန့် ဖြေယှင်းနိုင်ရေ ဆီးကြိမ်လုံးမဟိရေပိုင် နှစ်ပေါင်းနှစ်ရာကျော် အဖျက်ခံလာရရေ ရခိုင်ရို့ လူ့ ဘောင်ကို ပြန်ပနာတည်ဆောက်ဖို့ နန့်  ဆုံးယှုံးနိန်ကတ်ရရေ နိုင်ငံရေး စီးပွါးရေး လူမှုရေး အခွင့်အရေးတိအားလုံးကို ပြန်ရဖို့ အတွက် အချိန်ကာလတခုကိုပီးပနာ တဆင့်ပြီးကေတဆင့်တက်လို့  အဖြေရှာလားကတ်ရဖို့ စွာက လွန်ဆန်လို့ မရနိုင်ရေ သဘာဝတရားတခု ဖြစ်နိန်ရေ။ ပထမဆုံးလုပ်သင့်ရေ အချက်တခုကတော့ကေ ငါရို့  ဇာဖြစ်လို့  အချူပ်အခြာအာဏာဆုံးယှုံးပနာ ထီးနန်းပျောက်ပြီးကေ တိုင်းပြည်ပျက်လားခရလေ ဆိုစွာကို စနစ်တကျ ရှုထောင့်အမြင်ပေါင်းစုံက လေ့လာသင့်ရေလို့  ထင်ရေ။ ကိုယ်ရို့  အထဲက အမျိုးသားသစ္စာဖောက်တိဟိခလို့  ဗမာတိကစစ်မကြေငြာပဲ ၀င်တိုက်ခလို့ ၊ အချင်းချင်းကြားမှာ ညီညွတ်မှုမဟိလို့ ၊ စစ်တကောင်းဆိပ်ကမ်းကို လက်လွှတ်ဆုံးယှုံးလိုက်ရပနာ ရခိုင်ပြည်စီးပွါးရေးတခုလုံး နာလန်ပြန်မထူနိုင်လောက်အောင် အကျပ်အတည်းတိနန့်  ရင်ဆိုင်နိန်ခရလို့  စရေ အချက်အလက်တိအများကြီးတွိကတ်ရဖို့ စွာက ကျိန်းသီနိန်ပါရေ။ နောက်ပြီးကေ ၀ံလက်ရို့  အားမာန်ကို အောင်လံထူဆုပ်ကိုင်ပနာ ခေတ်အဆက်ဆက်တော်လှန်ပါလတ်တေ အမျိုးသားတော်လှန်ရေးလမ်းကြောင်းနန့်  လက်ဟိအခင်းအကျင်း၊ အားနည်းချက် အားသာချက် တိကို လေ့လာသင့်ပါရေ။ အဓိကပြောချင်စွာက နိုင်ငံရေးပြဿနာစွာ လူ့ ဘောင်၏ထောင့်ပေါင်းစုံကလာတတ်ပြီးကေ ဒေပြဿနာကို ဖြေယှင်းဖို့ ထောင့်ပေါင်းစုံက အဖြေရှာရခြင်းပင် ဖြစ်တေ။ ယင်းအတွက်နန့်  ကွဲပြားခြားနားရေအမြင်ရှုထောင့်ပေါင်းစုံက ချဉ်းကပ်ပနာ နိုင်ငံရေးပြဿနာကို ဆွေးနွေးအဖြေရှာရစွာက ပိုပြီးကေ အနှစ်သာရနန့် ပြည့်စုံလက်တွိကျဖို့ လို့ ထင်ရေ။

ပြောရဖို့ ဆိုကေ ရခိုင်သားတိစွာ disorder ဖြစ်နိန်ကတ်တေ။ ယင်းအတွက်နန့်  order အသစ်တခု
ရခိုင်ရို့ လူဘောင်ကို ဖြတ်သန်းစီးဆင်းလားပလိုက်ရဖို့ ။ soft-order သို့ မဟုတ် hard-order နှစ်ခုထဲက တခုကို ရွီးချယ်ပနာ ကျင့်သုံးလည်ပတ်ရဖို့ ။ ကမ္ဘာမှာဟိရေ နိုင်ငံလူ့ အဖွဲ့ အစည်းတိုင်းမှာ order ဟိရေ။ လူ့ အဖွဲ့  အစည်းတိုင်းမှာ Policy-making လုပ်တေအလွှာနန့်  implementing လုပ်တေအလွှာ ဆိုပြီးကေ အလွှာနှစ်ခုစီဟိရေ။ ဒေအလွှာအထပ်နှစ်ခုကို အော်ဒါက ဆက်စပ်ချိုင်ပီးထားရေ။ ၀ါးလုံးတစ်ရာကို ချိုင်ပီးထားရေ ကြိုးပိုင်ဖြစ်တေ လို့  ဥပမာပီးရဖို့ ထင်ရေ။ အထက်ကအောက်ကို စီးဆင်းရေ အော်ဒါ (Authoritarian state တိမှာ တွိကတ်ရရေ) နန့်  အောက်ကအထက်ကိုဆန်တက်တေ အော်ဒါ (Democratic state တိမှာ တွိကတ်ရရေ) နှစ်ခုရာ ခြားဖို့ ထင်ရေ။ ဒေပိုင် အော်ဒါကို သွင်းဖို့  အင်အားကောင်းရေ အဖွဲ့ အစည်း သို့ မဟုတ် အုပ်စုတစု ဟိဖို့ လိုအပ်တေ။ ဒေအုပ်စုရေ subjective ဖြစ်တေ ယေဘုယအမျိုးသားရေးစိတ်ဓါတ်ထက် objective ဖြစ်တေ နိုင်ငံရေးယုံကြည်ချက်တခုခုဟိရေ အင်အားစုတစု ဖြစ်သင့်ရေ။ ဥပမာ- ရခိုင်ပြည်မှာ ဇာပိုင်နိုင်ငံရေးစနစ် စီးပွါးရေးပေါ်လစီ တိကျင့်သုံးဖို့ လဲ၊ လာဖို့ နှစ်ပေါင်း ၅၀ မှာ ရခိုင်ပြည်၏အခြေအနေ ဇာဖြစ်လာနိုင်ဖို့ လဲ အစဟိရေ အနာဂတ်အမြင်တိပါ ဟိနိန်ရေ အဖွဲ့ မျိုးဖြစ်နိန်ရပါဖို့ ။ အဓိကရန်သူဖြစ်တေ ဗမာတိ၏အားနည်းချက်အားသာချက် မဟာဗျူဟာအနာဂတ်ခြီလှမ်းပရိယာယ်တိကို သုံးသပ်ပနာ နိုင်ငံရေးအရ အာဏာချိန်သီးကို ဇာပိုင်ညှိယူနိုင်ဖို့ လဲ ဆိုရေ နိုင်ငံရေးပြည့်ဝရေ အဖွဲ့ မျိုးဖြစ်သင့်ရေ။

နိုင်ငံရေးစွာ ရေရှည်လားရရေ ဖြစ်စဉ်တခုဖြစ်တေပိုင် ရက်ပြတ်ကဇတ်ရရေ ဂိမ်းတခု (Repeated Game) လေ့ ဖြစ်တေ။ ယင်းအတွက်နန့် နိုင်ငံရေးသမားခေါင်းဆောင်တိလုပ်ချင်ရေ လူတိရေ နိုင်ငံရေးလောကစည်းဝိုင်းထဲကို
ဝင်ဖို့ ဆိုကေ စိတ်ကူးယိုင်မှုတိကို အိမ်မှာအယင်သိမ်းပနာထားပစ်ခသင့်ရေ။ အမျိုးသားရေးစိတ်ဓါတ်အမြင်စွာ အခြေခံဟိထားဖို့ လိုအပ်ကေလေ့ လက်တွိနိုင်ငံရေးလုပ်တေခါ အေထက်ပိုပြီးကေ ခိုင်မာရေနိုင်ငံရေးအယူအဆ ၀ါဒတိဟိသင့်ရေ။ ယပြီးကေ တိုက်ပစ်လိုက်ဖို့  ခွပ်ပစ်လိုက်ဖို့  ထိုးပစ်လိုက်ဖို့ ဆိုရေ ပြောလို့ ဆိုလို့ စည်းရုံးလို့  ကောင်းရေ ယေဘုယျအမျိုးသားရေးစကားလုံးတိကိုပြောနိန်ရေလူတိထက် ပိုပြီးကေ လက်တွိကျ လိမ်မာပါးနပ်ပနာအမြင်ကျယ်ရေ မဟာဗျူဟာနည်းဗျူဟာနန့်  ဒီပလိုမေစီတိ ကျင့်သုံးတတ်တေ ခေါင်းဆောင်အရည်အချင်းတိနန့် ပြည့်စုံရေနိုင်ငံရေးသမားကောင်း တိအများကြီးဟိလာဖို့  လိုအပ်နိန်ရေ။

နောက်တခုက ရခိုင်သားတိရက်ပြတ်ပြောနိန်ကတ်တေ စည်းလုံးညီညွတ်ရေးကိစ္စ။ ဒေနိန့်  ရခိုင်သားတိ ပြောနိန်ကတ်တေ ဖြစ်ချင်နိန်ကတ်တေ စည်းလုံးညီညွတ်ရေးကို ပဒေသရာဇ်စည်းလုံးညီညွတ်ရေးလို့  အဓိပ္ပါယ် ဖွင့်ဆိုပနာ နာမေပီးကတ်ရဖို့ ထင်ရေ။ ရခိုင်သားမှာ အဖွဲ့ တခုတည်းဖြစ်ရဖို့ ။ ယင်းပိုင်အဖွဲ့ တခုတည်းဖြစ်လာကေ ရခိုင်ခေတ်သစ်ပဒေသရာဇ်တယောက်နှစ်ယောက်က လက်ဝါးကြီးအုပ်ပနာ ဆရာကြီးလုပ်နိန်ဖို့ ။ ရာသက်ပန်နာယက ထာဝရဥက္ကဌလုပ်လားဖို့ ။ ဒေနိန်ရာမှာ ပြဿနာက အေပိုင်ပဒေသရာဇ်စည်းလုံးညီညွတ်ရေးကို ယုံကြည်လက်ခံကျင့်သုံးနိန်ကတ်လို့  ပုဂ္ဂလိကကိုးကွယ်မှုတိပေါ်လာပနာ ရခိုင်သားတစ်ဦးချင်းစီ၏ လွတ်လပ်တေတွေးခေါ်မှု၊ ကိုယ်စွမ်းကိုယ်စ၊ ကိုယ့်ခြီထောက်မှာရပ်ပနာ တီထွင်ကြံဆချင်စိတ်တိ အားလုံး ပျောက်လားခရရေ။

ဖြစ်သင့်စွာက နိုင်ငံရေးဆိုကေ နိုင်ငံရေးလိုင်းကို လားကတ်ပနာ ပရိုဖက်ရှင်းနယ် နိုင်ငံရေးပါတီ၊ စွမ်းရည်ဟိရေ လက်နက်ကိုင်အဖွဲ့ တိ သူ့ လမ်းကြောင်းနန့် သူ လားကတ်စွာက ပိုလို့ ကောင်းဖို့ လို့ မြင်ရေ။ လူမှုရေးအဖွဲ့ ဆိုကေ ထိရောက်တေ လူမှုရေးအလုပ်တိကို လုပ်လာနိုင်အောင် ကြိုးစားအားထုတ်လုပ်ဆောင်လားကတ်စွာက ရခိုင်ရို့  လူ့  ဘောင်ကို ပိုလို့ အထောက်အကူဖြစ်စီဖို့ လို့ ထင်ရေ။ အိမ်တဆောင်ကို လိုအပ်တေ တိုင်တိနန့်  အခြီခံဖောင်ဒေးရှင်းတိချပနာတည်ဆောက်ရရေပိုင် လူ့ အဖွဲ့ အစည်းမှာလေ့ အရေးကြီးရေ မဏ္ဍိုင်တိ (Pillars) ဟိဖို့  လိုအပ်တေ။ လူမှုအထောက်အကူပြု ပညာရေးအထောက်အကူပြု အစဟိရေ အသင်းအဖွဲ့ ချေတိ အများကြီးပေါ်လာပနာ ကိုယ်နိုင်ရေ တာဝန်ကို ထမ်းဆောင်လားကတ်ခြင်းက ပိုပြီးကေ လူ့ အဖွဲ့ အစည်းအတွက် အကျိုးဖြစ်ထွန်းစီပါဖို့ ။ ပညာရေးအကျိုးဆောင်လုပ်ငန်းချေတိ အများကြီးလုပ်ပနာ အနာဂတ်ခေါင်းဆောင်သစ်တိကို ပြုစုပျိုးထောင်မွီးထုတ်ပီးခြင်းက အားလုံးသူစုပနာ အဖွဲ့ တခုထောင်ပြီးကေ တခုလေ့အကျိုးရလဒ်ကောင်းထွက်တေ အလုပ်တိကို မလုပ်နိုင်ခြင်းထက် ပိုပြီးကေ သွီးစစ်တေအမျိုးချစ်ခြင်းလို့ ပြောကတ်ရပါဖို့ လို့ ယူဆမိရေ။

ကျဆုံးလားခရရေ ဗိုလ်ခိုင်ရာဇာ လက်ထက်မှာ ဖဲသာတောင့်ရေ။ အနည်းဆုံး အမေရိကန်ဒေါ်လာ သန်းဆယ်ဂဏန်းကျော်လောက်ကို ကိုင်ပနာ ဦးဆောင်လုပ်နိုင်ခလို့  ရခိုင်ပြည်ခေတ်သစ်တော်လှန်ရေးသမိုင်းမှာ အင်အားအကောင်းဆုံးရခိုင်တပ်မတော်ကို ထူထောင်နိုင်ခရေ။ ဟိဟိသမျှရခိုင်တော်လှန်ရေးနိုင်ငံရေးအဖွဲ့ ချေတိ အားလုံး ခိုင်ရာဇာနန့် ပူးပေါင်းခကတ်တေ။ ယင်းအတွက်နန့် ဒေနိန့် ကာလ ရခိုင်တော်လှန်ရေးနိုင်ငံရေးလောကမှာ အင်အားကောင်းရေ ဖဲသာတောင့်ရေ အုပ်စုတစုပေါ်ပါလတ်ကေ ဇာသူကို ဇာပိုင်အယင်တိုက်ရဖို့ လဲ ဆိုစွာကို ငြင်းနိန်ဆွေးနွေးနိန်စရာမလိုပဲ အေနိန့် ပေါ်လစီချ အေနိန့် လားတိုက်လို့ ရရေ။

ဝမ်းနည်းဖို့ ကောင်းစွာက အေနိန့် ကာလ ရခိုင့်နိုင်ငံရေးတော်လှန်ရေးလောကစွာ အင်အားအနိမ့်ဆုံးအချိန်ကို ရင်ဆိုင်နိန်ကတ်ရရေလို့ ပြောရဖို့ ထင်ရေ။ ရခိုင်လူမှုရေးနိုင်ငံရေးအဖွဲ့ အစည်းတိအားလုံးက စည်းစနစ်ကျရေ အဖွဲ့  အစည်းတည်ဆောက်ထားမှုတိမဟိခြင်း (Structural deficiencies) နန့်  အတွင်းပဋိပက္ခ (inner conflicts) တိကို ရင်ဆိုင်နိန်ကတ်ရရေ။

နိဂုံးချူပ်ပြောရဖို့ ဆိုကေ ငါရို့ တိ အဂုခေတ်ရခိုင်သား၊ ရခိုင်သမချေတိ အယင်ကထက် နှစ်ဆပိုတိုးပနာ ကြိုးစားကတ်
ရပါဖို့ ။ လူစွမ်းလူစမြင့်လာအောင်လုပ်ကတ်ရဖို့ ။ ထူးချွန်ထက်မြက်လာအောင် ပီးအပ်လာရေ အမျိုးသားရေးတာဝန်ကို ကိုယ်နိုင်ရေဖက်က ထမ်းဆောင်နိုင်အောင်လုပ်ကတ်ရပါဖို့ ။ ယင်းအတွက်နန့်  ငါရို့ နန့် အနီးဆုံးမှာ ဟိနိန်ရေ ရန်သူ (Ignorance and illiteracy) ကို အရင်ဆုံးတိုက်ပစ်လိုက်ရဖို့ လို့ ထင်မြင်မိပါယင့်။ အမျိုးသားရေး အချစ်တိ လွန်ပြီးကေ ထိုလူကို အပြစ်တင် ဒေလူကို ဝေဖန်နိန်စွာထက် မိမိကိုယ်ကို ဇာလုပ်နိုင်ဖို့ လဲ။ ဇာလောက်ပီးဆပ်နိုင်ဖို့  လဲလို့  ဆင်ခြင်သုံးသပ်နှလုံးသွင်းပနာ တာဝန်ယူနိုင်ခြင်းက ပိုပြီးကေ ကောင်းဖို့ လို့ ပြောချင်ပါရေ။ ။ ။



ခိုင်အောင်အောင်
၂၉၊၃၊၂၀၀၉

အနာဂတ်လှိုင်းဘလော့မှ