အေနိ တလင်္ဂုနီနိ အလုပ်အားရေအတွက် မရောက်စွာလည်းကြာပျာယ်ဆိုခါ သူငယ်ချင်းတယောက်၏အိမ်သို့ လားလည်ဖြစ်ပါသည်။ သူငယ်ချင်း၏မယားသည်က အိပ်ရာခင်းတခုကို ခြုပ်လိုက်ကိုက်လိုက် အလုပ်ယှုတ်လျှက်ဟိသည်။ အကျွန်ုပ်ကလည်း အလာပ,သလ္လပ လောက၀တ်ပြုလျှက်
”ကုတ်ကုတ်ကုတ်ကုတ် ကကောင်းအလုပ်ယှုတ်နီရေကား ဇာလုပ်နီလဲ” ဟု မီးလိုက်သည်။
မယားသည်က “နမူနာ” ပီးစွာငယ်လားလို့ အိပ်ရာခင်းကို ပြန်ခြုပ်နီရေ” ဟု ဖြေသည်။
ထိုအခါ သမီးသည်က ”အမိ နမူနာ ဆိုစွာဇာလဲ” ဟု မီးသည်။
သမီးသည်မှာ ခုနစ်တန်းရောက်နီပြီးဖြစ်သည်။ မလေးသျှားတွင် နှစ်အင်တန်များများနီခရသဖြင့် ကျောင်းမတက်ခရ။ ”နမူနာ” စကားမှာ ပါဠိစကားဖြစ်သဖြင့် သူ့အတွက် ထူးဆန်းနီသည်။
အမိသည်က ”နမူနာ” ဆိုစွာ ”Example" ကို ပြောစွာဟု အင်္ဂလိပ်ပိုင်ယှင်းပြသည်။
“Example ဆိုစွာ ဇာလဲအမိ ” ဟု မီးပြန်သည်။
“Example” ကိုလည်းမသိဆိုကေ မယှင်းပြတတ်ပျာယ်ဟေး” ဟု အမိသည်က ဆိုသည်။
အကျွန်ုပ်လည်း မနီသာကေ ဆရာကြီးလုပ်ချင်စွာနှင့် ”နမူနာ” ဆိုစွာ တိုက်တိအမြင့်ကြီးဆောက်ကေ မဆောက်ခင် ပုံစံတူ တိုက်ရုပ်ချေတိ အယင်လုပ်တေမနား၊ တိုက်ရုပ်ချေတိလုပ်ပြီးခါမှ ယင်းအရုပ်ချေတိနှင့်တပုံစံတည်း တိုက်အမြင့်ကြီးတိကိုဆောက်စွာ။ ယင်းစွာကို ”နမူနာ” လို့ခေါ်ရေ” ဟုယှင်းပြသည်။
သမီးသည်မှာ ”ပုံစံ” ဆိုသည့်စကားကိုလည်း နားလည်ပုံမပေါက်။ ထိုအခိုက် နှမချေက ကားရုပ်ချေတရုပ်နှင့် အနားတွင် ကဇတ်နီသည်။ အကျွန်ုပ်က ကားရုပ်ချေကိုကောက်ယူလျှက်
”ကားသစ်တိထုတ်ကေ မထုတ်ခင် အေပိုင်ကားရုပ်ချေတိကို အယင်လုပ်တေ။ အငယ်ချေကိုကြိုက်ပျာယ်ဆိုခါမှ အကြီးမသန်ကိုလုပ်စွာ။ ယင်းစွာကို ”နမူနာ” လို့ခေါ်ရေ” ဟု ယှင်းပြသည်။ ထိုအခါ ထပ်၍
”ဗူစီပေါင်း” ပိုင် အငယ်ချေကို အကြီးမသန်ဖြစ်အောင်လုပ်စွာလား” မီးပြန်သည်။
အကျွန်ုပ်လည်း မတတ်သာကေ ”အေး ဟုတ်တေ” ဟု အမြင်ကပ်ကပ် ပြန်ဖြေလိုက်သည်။
(ရက္ခိတရို့ဆုံရပ်မြီမှ)
Posts
0 မှတ်ချက်:
Post a Comment